Fuɗɗoode 37
37
Kabaaru Yuusufi e sakiraaɓe mum
1Yaakuuba hoɗi leydi Kanaana ɗo bammum hoɗunoo ɗoon. 2Inan kabaaru ƴuwdi Yaakuuba: Yuusufi ina tawra duuɓi 17. Imo durdannoo e mawniraaɓe makko baali. Imo wondi e ɓiɓɓe Bilha e Jilpa, deekiraaɓe baabiiko. Imo haaltanannoo baabiiɓe kabaaru maɓɓe bonɗo.
3Tawi Yaakuuba na horsini Yuusufi faa ɓuri ɓiɓɓe muuɗum heddiiɓe ɓeen fuu, sabo ley naywaaku makko o heɓi ɗum. O waɗani ɗum saayo ŋarɗungo. 4Mawniraaɓe ɓeen nji'i no o yiɗiri Yuusufi faa ɓuri ɓiɓɓe makko fuu. Saabe ɗuum de kiri Yuusufi, ɓe kunngii haaldude ɗum e jam.
5Nyannde gomma Yuusufi hoyɗi, de haalani koyɗol ngool mawniraaɓe muuɗum. Caggal ɗuum ɓe ɓeydi wanyude o.
6Inan no o fiirtirani ɓe koyɗol ngool. O wi'i ɓe:
— Kettinee koyɗol ngol koyɗumi. 7Mi hoyɗii eɗen kaɓɓa bokkooje ley ngesa, de inan bokkoore am ummii, darii! bokkooje mooɗon piilii nde, ina cujidana nde.
8Mawniraaɓe ɓeen njaabii mo, mbi'i:
— Yalla laamaade min njiɗɗaa naa? Laataade joomii amin kaajaɗaa naa?
Ɓe ɓeydi wanyude mo saabe koyɗi makko e haalaaji makko.
9Yuusufi hoyɗi koyɗol gonngol katin, de haalani mawniraaɓe muuɗum ɓeen, wi'i:
— Kettinee, mi hoyɗii katin. Mi yi'i naange e lewru e koode 11 ina cujidana kam.
10O fillanii ngol baabiiko e mawniraaɓe makko. Baabiiko feli mo, wi'i:
— Ɗume koyɗol ngol koyɗuɗaa ngool wari wi'ude! Yalla min ngarowan, miin e inna maa e mawniraaɓe maa, min cujidane naa? 11Mawniraaɓe makko ɓeen kiri mo, ammaa baabiiko heddii ina miccitoo ko narri mo ɗuum.
No Yuusufi soottiraa de yaaraa Misira
12Mawniraaɓe makko ɓeen njehi Sikem faa ndurowa dammuuli baaba muɓɓen. 13Yaakuuba wi'i Yuusufi:
— Mawniraaɓe maa na ngoni Sikem ina ndura dammuuli. War, mi nele to maɓɓe.
O jaabii, o wi'i:
— Wooɗi, miɗo wara!
14Oon wi'i mo:
— Yahu, ndaaroy yalla mawniraaɓe maa e dammuuli muɓɓen fuu ina ndeenii, de ngartaa, kaalanaa kam.
O neli Yuusufi ƴuwa naɗɗol Heberon, yaha faa Sikem.
15Gorko gomma tawi Yuusufi na yiiltoo ley ladde, ƴami ɗum wi'i:
— Ɗume pilotoɗaa?
16O jaabii, o wi'i:
— Wo mawniraaɓe am pilotoomi. Miɗo ŋaare, tindinaa kam to ɓe ndurata.
17Gorko oon wi'i mo:
— Ɓe eggii ɗoo, sabo mi nanii iɓe mbi'a: «En njaha Dotan».
Yuusufi tewti ɓe, yiitowi ɓe Dotan toon. 18Ɓe kaynii mo to woɗɗi. Fadde makko e ɓadaade, ɓe ndawri faa ɓe mbara mo.
19Ɓe mbi'ondiri:
— Inan ngel koyɗi na wara. 20Joonin kaa, ngaree faa mbaren mo, paɗɗen mo ley wootere e lugge ɗee de mbi'en wo huunde ladde nyaami o. Ndaaren no koyɗi makko ɗiin laatortoo!
21Ammaa nde Ruben nannoo ɗum fu, danni mo e juuɗe maɓɓe, wi'i:
— Taa en mbara o!
22Ruben filii dannude o e juuɗe maɓɓe faa hokkita o baabiiko, de wi'i:
— Taa ndufee ƴiiƴam makko. Paɗɗee mo ley luggere wonnde ley ladde ɗo ngonɗen ɗoo, ammaa taa meemon o.
23Nde Yuusufi yottinoo mawniraaɓe muuɗum fu, ɓe ɓoorti ɗum saayo muuɗum heso ngo ɓoorninoo ngoon. 24Ɓe nanngi ɗum, ɓe paɗɗi ley luggere. Luggere ndeen wo ɓolde, ndiyam walaa e mayre. 25Caggal ɗuum, ɓe njooɗii faa ɓe nyaama. Nde ɓe njooɗinoo fu, ɓe ɓanti gite maɓɓe, ɓe kaynii sewre geelooɗi Ismaa'iilankooɓe ina ƴuuri Galaad, na wara. Geelooɗi ɗiin ina ndimndaa ɗakke e nebbeele e urdiiji, faa njaara Misira.
26Yahuuda wi'i sakiraaɓe muuɗum ɓeen:
— Ɗume keɓeten si en mbarii sakiike meeɗen de en cuuɗii ƴiiƴam muuɗum? 27En njaha coottiren mo Ismaa'iilankooɓe ɓeen, taa ndeken junngo dow makko, sabo wo o sakiike men, wo o ƴiiƴam men.
Sakiraaɓe makko ɓeen njaɓi ko o wi'i ɗuum. 28Nde Ismaa'iilankooɓe luumotooɓe ƴuwɓe Madiya ɓeen paltotonoo ndeen, sakiraaɓe Yuusufi mburtini ɗum ley ɓunndu nduun, cootti ɗum buuɗi cardi 20. Luumotooɓe ɓeen njaari mo Misira.
29Nde Ruben ndaaroynoo ɓunndu nduun de tawaay Yuusufi ndeen, seeki kaddule muuɗum, 30yeccii to sakiraaɓe muuɗum, wi'i:
— Suka oon walaa toon! Joonin noy ngaɗanmi miin le?
31Ɓe kooƴi saayo Yuusufi, ɓe kirsi ndamndi, ɓe cuuwi ngo e ƴiiƴam ɗaam.
32Ɓe neldi ngo baabiiɓe, ɓe mbi'i:
— Inan ko min kocci. Ndaar yalla wo saayo ɓiya oon, naa wanaa.
33Nde baabiiɓe oon ndaarnoo ngo fu, annditi, de wi'i:
— Ngo, wo saayo ɓiyam! Kaari! Huunde ladde nyaamii mo. Sikke walaa Yuusufiyel am taƴaama.
34Yaakuuba seeki kaddule muuɗum, ɓoornii bootooji de woyiri ɓiyum oon balɗe keewɗe.
35Ɓiɓɓe makko worɓe e rewɓe fuu ngari faa ndeƴƴina mo, ammaa o salii deƴƴineede, o wi'i:
— Mi woyan ɓiyam oon faa nyannde tawtoymi ɗum.
Noon baabiiko ɓeydiri woyude mo. 36Luumotooɓe ƴuwɓe leydi Midiya ɓeen njaari Yuusufi Misira, coottiri ɗum Potifaar, mawɗo sordaasiiɓe doomuɓe Fira'awna.
Obecnie wybrane:
Fuɗɗoode 37: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
