Joani 2
2
1Hefuku damu chisatu, kuKana wamuŊaliliya kwadiŋi antu akudisumbula; mama yaYesu wadiŋi kwoku. 2Hiyakutambika Yesu niatumbanji twindi enzi kwakudisumbulawu, 3Chelili vinyu yinamani dehi, mama yaYesu hakumwila nindi, Hiyakweti vinyuku. 4Yesu hakumwila nindi, Eyi mumbanda, hinsaŋu yetuku. Mpinji yami kanda yishiki.
5Mama yindi hakuyila atuluŋwiji nindi, Mwonsu mwakuyilejayi, ilenu. 6Henohu hadiŋi nsaba jamalola jitanu nayimu jakutenteka dehi, jadiŋi jakudiŋilika nachu aYudeya; munsaba mwayaloŋa nswaha jiyedi indi kwiji jisatu. 7Yesu hakuyila nindi, Inzeshenu nsaba nameji. Hiyakujinzesha to-o, nikunyivumbu. 8Hakuyila nindi, Huŋununenu dinu, mumutwe U mwini mawŋa. Hiyakutwala. 9Mwini mawŋa chanatompiyi meji anabalumuki dehi vinyu, helukili kuyinafumuku, atuluŋwiji atahili meji diwu elukili. Owu mwini mawŋa hakutambika nsumbuli, 10hakumwila nindi, Antu ejima asambilaŋa kwidisha vinyu yayiwahi; neyi antu ananwi dehi yayivulu, aletaŋa yatama. Ilaŋa eyi wunasweki vinyu yayiwahi nihanu. 11Dichi chinjikijilu chakutachika cheliliyi Yesu kuKana wamuŊaliliya, hakumwekesha kulema kwindi, atumbanji twindi hiyakumwitiya.
12Chaneliyi yumiyi, yena namama yindi niatumbanji twindi hamu, hiyakuya kuKaperinawu; ashakama nikwenoku mafuku antesha hohu.
13Paseka yawaYudeya hiyikushika kwakwihi, Yesu hakukanduka kuYerusalema. 14Hakuwana mutembeli antu adi nakulandisha aŋombi ninyikoku nitupompa; akwakuhimpa mali anashakami. 15Hakushinta chikoti chanfuŋa, hakuyihaŋa wejima wawu mutembeli, hamu nanyikoku ni aŋombi; hakumwaŋa mali awakwakuhimpa, hakuhinuna nijimesa jawu. 16Hakuyila adiŋi nakulandisha tupompa nindi, Yumiyi yifumishenu munu; bayi mubalumuna itala daTata yami diikali itala dakulandilaku. 17Atumbanji twindi hiyakwanuka chasonekeluwu nawu, Iyena detala deyi dikuŋudya kumuchima. 18Dichi aYudeya hiyakumwakula nawu, Tuleji chinjikijilu chakwiluka nachu hanafumi Ŋovu jeyi jakwila yumiyi. 19Yesu hakwakula nindi, Sandenu tembeli iyi, mafuku asatu nakayituŋulula cheŋi. 20Dichi aYudeya nawu, Tembeli iyi yakutuŋa nyaka makumi awana nanyaka yitanu nawumu, eyi wuyituŋululi mafuku asatu? 21Ilaŋa yena wadiŋi nakutena tembeli yamujimba windi. 22Dichi chamusaŋwiluwu mudi afu, atumbanji twindi hiyakwanuka mwahosheliyi, hiyakwitiya nyikanda yajila, nimwahosheliyi Yesu.
23Hadiŋiyi muYerusalema kuchawija chapaseka, antu amavulu hiyakwitiya ijina dindi chamwenuwu yinjikijilu yeliliyi. 24Ilaŋa Yesu hayikuhweleleluku, muloŋa yena wadiŋi weluka chekalawu antu ejima. 25Muloŋa yena hakeŋeli wakumuleja chekalawu antuku, yomwenindi diyi welukili yekala mudi antu.
Obecnie wybrane:
Joani 2: MW62
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The Bible in Lunda: Ndembu (Lunda of Kalunda) © B. F. B. S. 1962.
