LUKA 19

Yesu nende Zakayo

1Yesu yinjila mu litaala lia Yeriko khandi yali nakhalakanyilanga mulio. 2Khwaliho nu mundu walaangwangwa Zakayo; yali musololi mukali wu vushuru khandi yali mundu muhinda. 3Yenyanga khumanya Yesu ni viina; navutswa yakhaywa, shichila shituma shia vandu, khandi yali mundu mwiimbi muno. 4Zakayo yilukhaka natsia imbeli wi shituma shia vandu, nanina khu musala ku mukhuyu alole Yesu, wali navirilanga khunjila yeneyo. 5Lwa Yesu yatukha havundu henaho, yaheenza ikulu, namuvoolela, “Zakayo, yikha hasi vwangu, shichila nunundi nzitsanga khukhucheniha munzu mwomwo.”

6Zakayo yikha hasi vwangu, niyinjilitsa Yesu munzu mwemwe, nasangalanga muno. 7Lwa vandu valola ndio, varaanga khung'ung'una nivavoola, “Mundu uyu atsili khuva mucheni mu inzu yu mundu mwoni!”

8Navutswa Zakayo yasinjila navoolela Mwami, “Hulishitsa! Nzitsanga khuhaana inusu yi miandu chianje khu vandu vamanani; khandi niiva nahuuvilakhu mundu shindu shiosi, niitsa khumurunga hali khane mu vunyishi.”

9Yesu yavoolela Zakayo, “Nunundi yivi nende vandu vi inzu yoyo mumali khuhonyinywa, shichila khali yivi mwene nu mwitsukhulu wa Aburahamu. 10Khulwa yako, Mwana wu Mundu yitsa khukhava khandi khuhonyinya vandu vakora.”

Lukanu lwa Tsisenti tsialombwa khu Itsahabu Likhomi

(Mat 25:14-30)

11Lwa vandu vali nivashihulishitsanga makhuva kenako, Yesu yatsililila khulomoloma navavoolela lukanu. Yali nali himbi khutukha Yerusalemi, ma vandu nivakanakana ndi Vwami vwa Nyasaye vuli himbi khulolekha vwangu. 12Khulwa yako, Yesu yavavoolela, “Litukhu lindi, mundu mulala khurula mu inzu yu vwami yasimukha natsia mu shivala shindi khwamihitswa, khandi akalushi. 13Nashili khusimukha, yalaanga varumishi veve likhomi, navaha shia mulala isenti yi tsahabu navavoolela, ‘Mukholele vukhala tsisenti yitsi khutukha lwa ngalukha.’#19:13 Muluguriki vali ni likhuva, “Mina.” Mina nu murungu kwa mundu arungwangwa niyakhakhola muhinzilu khumieli chivaka. 14Navutswa vandu vu mu shivala shieshie vamuhima, khandi nivaruma vandu inyuma wewe vavoole, ‘Khwambakhane mundu uyu khuva mwami weru.’

15“Mundu mwenoyo yamihitswa nava Mwami, khandi nakalukha. Yavoolela varumishi veve valoleshe imbeli wewe, arunishitsi vukhala vwa vali nivanyoli. 16Murumishi wu khuraanga yalolekhaho, navoola ‘Mwami, tsisenti tsia wamba nanyolelakhu vukhala vwi tsindi likhomi.’ 17Mwami yavoolela murumishi mwenoyo, ‘Wakhola vulahi; uli murumishi mulahi! Shichila uli musuuvilwa mu vindu vitititi, utsitsanga khusinjilila mataala makali likhomi.’ 18Murumishi wa khavili yalolekhaho, navoola, ‘Mwami, tsisenti tsia wamba nanyolelakhu vukhala vwi tsindi tsiranu.’ 19Mwami yamuchipa, ‘Yivi ulasinjilila mataala makali karanu.’

20“Murumishi wundi yalolekhaho, navoola, ‘Mwami, isenti yoyo nayo yiyi. Navisa mushilaka shi inguvu. 21Nakhuria, shichila uli mundu mutamanu. Uvukulanga vindu via yivi mwene wakhamanya ni viovio, khandi uchesanga ha wakharaaka tawe.’ 22Mwami yavoolela murumishi mwenoyo, ‘Yivi murumishi mutamanu! Narumishila makhuva koko mwene khukhukhalachila! Nivi wamanya inzi khuva mundu mutamanu, khandi mbukulanga vindu via inzi mwene nakhamanya ni vianje khandi njesanga vindu via nakharaaka tawe. 23Shichila shina nuvula khuvikha tsisenti tsianje mu livishilu liu khulera vukhala, nyolelekhu vukhala lwa ngalukha?’

24“Mwami yavoolela yavo vali nivasinjileho, ‘Munuuli isenti yeneyo muhe woyo uli ni tsisenti likhomi.’ 25Navutswa vavoola, ‘Mwami, ali ni tsisenti likhomi.’ 26Muvoolelanga, ‘Mundu uli ni shindu shitititi, aliitsa khuheelwa vinyishi; navutswa mundu uvula shindu shiosi, khali shiali nashio shitititi, aliitsa khunuulwa. 27Navutswa khulondokhana khu vatsiku vaanje vambakhananga inzi khuva mwami wavo, valeri hanu, muviiri nindolanga.’ ”

Yesu Yinjila Yerusalemi ni Likhoya Muno

(Mat 21:1-11; Mk 11:1-11; Yoh 12:12-19)

28Lwa Yesu yali namali khuvoola ndio, yatikulukha natsia Yerusalemi. 29Lwa yatukha himbi mu mataala ka Betsefage nende Betsania, ha Shikulu shia Misayituni, yaruma veechi veve vavili, 30navavoolela, “Simushi mutsi mu muchitsi kuli imbeli wenyu yoko; lwa muliitsa khuva numwinjilamu, muliitsa khunyola shimoli shi ipunda nishivoheelwi; khandi shiu mundu ashili khuninakhu. Mushivoholole mushilere hanu. 31Niiva mundu alamureeva shivune shichilanga nu muvoholola, muvooleli ndi Muruchi ashienyanga.”

32Khulwa yako, veechi vavili venavo vasimukha nivatsia, nivanyola shia shindu shiosi khuli Yesu yali navavoolele. 33Lwa vali nivavohololanga shimoli shi ipunda, vene shio vavareeva, “Shichila shina muvohololanga shimoli shi ipunda yishi?”

34Vachipa, “Muruchi ashienyanga.” 35Valerela Yesu; nivasiuva tsinguvu tsiavo khu muruku kwenoko khandi nivakhonya Yesu aninikhu. 36Lwa Yesu yali niyakhaninakhu, vandu vaala tsinguvu tsiavo khu muhaanda.

37Lwa Yesu yali niyakhikha khurula khu Shikulu shia Misayituni, shituma shikali shia veechi veve voosi varaanga khusanditsa Nyasaye; khandi khumwitsominya nu mwoyo mukali shichila vindu viu khuchenyinya via vali nivaloli; 38nivavoola: “Nyasaye akasitse mwami witsanga khuvirila mu lira liu Mwami! Milembe chive mwikulu khandi vukhumi vuve khu Nyasaye!”

39Vafarisayo valala vali nivali mu shituma shia vandu vavoolela Yesu, “Mwechitsi, voolela veechi vovo vahonjele!”

40Navutswa Yesu yavachipa, “Muvoolelanga ndi niiva valahonjela, machina kene kaliitsa khuraanga khulaanjilila.”

Yesu Yalilila Vandu va Yerusalemi

41Lwa Yesu yali nali himbi khutukha mu litaala likali lia Yerusalemi, yalilila litaala likali lienelo, 42navoola, “Nzikombanga muve numumanyi nunundi vindu vileranga milembe! Navutswa nunundi mwaviswa vindu vienevo. 43Matukhu kaliitsa khutukha lwa vatsiku venyu valiitsa khumuvotokhana nu lukaka khandi khumuseera khurulila mu tsimbeka tsiosi. 44Valiitsa khupomola litaala likali lia Yerusalemi, nu khwiira vandu vamenyamu. Livulakhuho lichina liliitsa khurikala ni licheleshe khu lindi, shichila mwa yambakhana khumanya matukhu ka Nyasaye yitsa namuhonyinya.”

Yesu Yatsia mu Litempeli

(Mat 21:12-17; Mk 11:15-19; Yoh 2:13-22)

45Yesu yinjila mu Litempeli, naraanga khukhunga vandu vakuulanga vindu nivakuulitsila mwenomo; 46navavoolela, “Kahandikwa mu Mahandiko Matakatifu ndi Nyasaye yavoola, ‘Litempeli lianje lilalaangwa inzu yi lisaala, navutswa mulikholi khuva shivisilu shia vanuuli!’ ” 47Shia litukhu lwa Yesu yechitsanga mu Litempeli, vasalisi vakali, veechitsi va malako nende vimilili va vandu vakhava khuli vanyala khumwiira; 48navutswa shivanyolakhu injila yu khumwiira tawe, shichila vandu voosi vatsililila khumuhulishitsa.

Obecnie wybrane:

LUKA 19: LLLCATHOLIC

Podkreślenie

Udostępnij

Kopiuj