LUKA 16

Muhinzili Wambakhana Khuva Musuuvilwa

1Yesu yavoolela veechi veve, “Litukhu lindi, khwaliho nu mundu muhinda wali nu muhinzili wasinjililanga miandu chiechie. Yavoolelwa ndi muhinzili wewe arumishilanga munjila indamanu miandu chiechie. 2Muhinda woyo yalaanga muhinzili wewe namureeva, ‘Makhuva shina kambulilanga khulondokhana khu yivi? Mbolelakhu shindu khulondokhana khuli ulindanga miandu chianje, shichila shiunyala khutsililila khusinjilila khandi miandu chianje tawe.’ 3Muhinzili mwenoyo yireevana mwene, navoola, ‘Ni shina shianyala khukhola nunundi? Muruchi wanje yenyanga khusinjilitsa khu mihinzilu chianje? Mbula tsingulu tsiu khulima; khandi ndi ni tsisoni tsiu khusava sava vandu vindu viavo. 4Manyi nunundi shianyala khukhola! Lwa vasinjilitsa khu mihinzilu, nava na valina vanyishi, navo valiitsa khunzinjilitsa mu tsinzu tsiavo.’

5“Khulwa yako, yalaanga shia mulala khu vandu voosi vali na makoovi ku muruchi wewe. Yareeva mundu wu khuraanga, ‘Uli ni likoovi liu muruchi wanje litukha shina?’ 6Yachipa, ‘Mapipa imia indala ka makura ku musayituni.’ Yamuvoolela, ‘Vukula ikaratasi yoyo yi likoovi, wikhale hasi vwangu, uhandichi makhomi karanu.’ 7Yareeva wundi, ‘Uli ni likoovi litukha shina?’ Yamuchipa, ‘Makunia ki inganu imia indala.’ Yamuvoolela, ‘Vukula ikalatasi yoyo yi likoovi, wikhale hasi, uhandichi makhomi munane.’

8“Muruchi mwenoyo yitsominya muhinzili wambakhana khuva musuuvilwa khuvirila mu vusitsa vwevwe; shichila vandu vu mu shivala shinu vali nu vusitsa vunyishi khukhola makhuva kavo ku mu shivala shinu khuvira vandu vamenyanga mu vulavu.” 9Yesu yatsililila khuvavoolela, “Muvoolelanga ndi murumishile miandu chiu mu shivala shinu khwinyolela valina, khu lwa chiliitsa khuvwa, mulinjilitswa hango hi mihika ni mihika. 10Mundu uli musuuvilwa mu vindu vitititi nu musuuvilwa mu vindu vinyishi; mundu wambakhananga khuva musuuvilwa mu vindu vitititi shianyala khuva musuuvilwa mu vindu vinyishi tawe. 11Niiva mwa yambakhana khuva vasuuvilwa khusinjilila miandu chia mwanyola mu shivala, ni viina wanamuhe vunyali vu khusinjilila miandu chiatoto? 12Niiva mwa yambakhana khuva vasuuvilwa khu miandu chia vandi, ni viina uliitsa khumuha miandu chienyu munyi vene?

13“Murumishi avulakhuho unyala khurumishila varuchi vavili; anyala khuhima mulala khandi ayaanze wundi inoho aliitsa khuva musuuvilwa khu mulala khandi alechelitse wundi. Shiumunyala khurumishila Nyasaye nende tsisenti tawe.”

Mechitso Kandi ka Yesu

(Mat 11:12-13; 5:31-32; Mk 10:11-12)

14Vafarisayo, vali nivayaanza tsisenti, vahulila makhuva kenako koosi, nivachaya Yesu. 15Navutswa Yesu yavavoolela, “Munyi navo vamwikhola kholanga khuva valunji imbeli wa vandu; navutswa Nyasaye wamanya kali mu mioyo chienyu; shichila vindu via vandu vitsominyanga mu shivala shinu vilolekhanga khuli ni shifwavi imbeli wa Nyasaye.

16“Malako ka Musa nende mahandiko ka Vaprofeti kaliho khutukha khumatukhu ka Yohana Mubatisi. Khuraanjila mumatukhu kenako, Ivanjeli khulondokhana khu Vwami vwa Nyasaye yamala khwilwatswa; khandi shia mundu wosi arumishilanga tsingulu khwinjilamu. 17Navutswa nu vutoro likulu nende lilova khurulaho, khuvira khali indukuta indititi yene ya Malako khuvula khurweshitswa.

18“Musatsa wosi ukhunganga mukhali wewe, khandi ahila mukhali wundi akholanga vuheeyi; khandi musatsa uhilanga mukhali wa musatsa wewe yakhunga, akholanga vuheeyi naye.

Mundu Muhinda nende Lazaro

19“Litukhu lindi, khwaliho nu mundu muhinda, wali niyifwala tsinguvu tsia sambarau tsiu vukuuli vululu muno; khandi shia litukhu yali wamenya limenya liu khwiyaanzitsa mwene. 20Ha shilivwa hehe khwaliho nu mundu mumanani walaangwangwa Lazaro, wali niyitsula makuule khu mmbili, 21khandi wikombanga khulia shiukhulia shiali nishironyi hasi khurula khu imesa yu muhinda mwenoyo. Khali tsisiimbwa tsiatsitsanga khandi tsikhoomba mu makuule keke. 22Mumanani mwenoyo yakhutsa nahilwa ni tsinjelosi khwikhala himbi na Aburahamu mwikulu. Mundu muhinda woyo yakhutsa, nayeveelwa mu shilindwa. 23Muhinda mwenoyo nali mu shihatisi, navirilanga mulinyakhana linyishi, yachinguula tsimoni tsietsie, nalola Aburahamu ihale wene, na Lazaro niyikhale himbi khuye. 24Khulwa yako, yalaanga nu mwoyo mukali, ‘Tata Aburahamu! Mbela tsimbavasi; ma urumi Lazaro atsi khwinikha shitere shieshie mu matsi ashinditsi lulimi lwanje; shichila salilanga vululu muno mu mulilu yuku!’

25“Navutswa Aburahamu yavoola, ‘Mwana wanje, wamanyakhu ndi mu limenya liolio wali nu waheelwa shia shindu shiosi shilahi; navutswa Lazaro shiyali waheelwakhu shindu shiosi tawe. Navutswa nunundi umali khuleminywa mwoyo hanu; nikhali yivi usalilanga vululu muno. 26Khumeeta khu kenako, khuli nu vwina vukali muno hakari hoho nende heru, khu khali yavo venyanga khwambukha khurula wa khuli hanu khwitsa wa uli yaho, shivanyala khunyala tawe. Mundu avulakhuho unyala khwambukha khurula wa uli yeyo khwitsa wa khuli hanu.’ 27Muhinda mwenoyo yavoola, ‘Tata Aburahamu, khusayanga nuyaanza urumi Lazaro mu inzu ya tata wanje, 28shichila ndi na vamwavo vaanje varanu. Lekha atsi khuvachelihitsa, khu vavuli khwitsa havundu hanyakhanilanga hanu.’

29“Navutswa Aburahamu yavoola, ‘Vamwavo vovo vali na Malako ka Musa nende mahandiko ka Vaprofeti; lekha vahulishitsi shia kavoolanga.’ 30Yavoola, ‘Tata Aburahamu, shikali kario tawe; navutswa niiva mundu mulala aliitsa khutsia khuvo niyisimukha khurula mu likhutsa, valiitsa khwikanila khurula mu vwoni vwavo.’ 31Aburahamu yamuvoolela, ‘Niiva vakhaywa khuhulishitsa Malako ka Musa nende mahandiko ka Vaprofeti, valiitsa khuvula khusuuvila khali niiva mundu anyala khwisimukha khurula mu likhutsa.’ ”

Obecnie wybrane:

LUKA 16: LLLCATHOLIC

Podkreślenie

Udostępnij

Kopiuj