LIRAANGA 4
4
Kaini Yiira Abili
1Adamu vali na Hawa; Hawa yaheelitsa niyivula mwana wi shiyayi, namukulikha lira Kaini. Yavoola, “Mwami Nyasaye umbeele tsingulu tsiu khwivula mwana wi shiyayi.” 2Lwa matukhu mati kali nikamali khuvira, Hawa yivula mwana wundi wi shiyayi, namukulikha lira Abili. Abili yakwa mwayi, navutswa Kaini nava mundu mulimi. 3Matukhu mati nikamali khuvira, Kaini yalera injeso yeye khurula khu viraakwa via yali nachesi, nahaana khuli shihanwa khu Mwami Nyasaye. 4Abili yalera shimeme shi likondi shiukhuraanga khwivulwa khu makondi keke, nashisinza, nahaana shitonye shilahi muno khushio khuli shihanwa. Mwami Nyasaye yayaanzitswa na Abili nende shihanwa shieshie shia yali narulitse, 5navutswa yambakhana Kaini ni shihanwa shieshie. Khulwa yako, Kaini yali nu vurima vululu, navelela mu mwoyo kwekwe. 6Mwami Nyasaye yareeva Kaini, “Shichila shina uli nu vurima? Shichila shina uvelele mu mwoyo? 7Niiva wakhavele nukholi shindu shilahi, khani usekhanga; navutswa shichila ukholi shindu shitamanu, vwoni vuli himbi khukhura mu maraava. Vwenyanga khukhwimilila, navutswa uliitsa khuvukuura.”
8Nalwo lwa Kaini yavoolela amwavo wewe Abili, “Hamba khutsi mu mulimi.” Lwa vali nivali mu mulimi, Kaini yakwana amwavo wewe Abili, ma namwiira.
9Mwami Nyasaye yareeva Kaini, “Ni hena ha amwavo wowo Abili ali?”
Kaini yamuvoolela, “Shinyala khumanya tawe. Ulolanga ninzi unyala khulinda amwavo wanje toto?”
10Khulwa yako, Mwami Nyasaye yamuvoolela, “Ni shina shiukholi? Hulishitsa! Musahi kwa wasuundula kwa amwavo wowo, kunanjililanga khurula hasi mu malova! 11Umali khulaamwa nunundi! Shiuliitsa khulimakhu khandi mulimi tawe. Kumali khutsunzuna masahi ka amwavo wowo Abili, khuli kwayasama munwa khukang'wa, lwa wamwiira. 12Lwa uliitsa khuchelitsa khuraaka viraakwa mu mulimi, shiraakwa shivulakhuho shilitsa khwama. Uliitsa khuhaya haya mu shivala, khuli mundu uvula havundu hanyala khumenya.”
13Kaini yavoolela Mwami Nyasaye, “Mbirilanga mu matiinyu makali muno; mbulakhu khuli nyala khwikhutsila. 14Umali khukhunga nunundi khurula mu mulimi; khandi wambakhane khulolekhu. Niitsa khuva mundu ukhuhaya haya mu shivala, uvula havundu hanyala khumenya. Mundu nanyoli aliitsa khunziira.”
15Navutswa Mwami Nyasaye yavoolela Kaini, “Shikaliitsa khuva kario tawe! Nikava mundu aliitsa khukhwiira, vandu saba valiitsa khwiirwa khuvanzila.” Nalwo lwa Mwami Nyasaye yavikha shimanyilu khu Kaini, khwikalila mundu unyala khuchelitsa khumwiira. 16Kaini yarula imbeli wu Mwami Nyasaye, natsia khumenya mu shivala shia Nodi, khuluveka luli ivukwi wu Mulimi kwa Edeni.
Vitsukhulu va Kaini
17Kaini yakona nu mukhali wewe, naheelitsa khandi niyivula mwana wi shiyayi, nivamukulikha lira Enoko. Kaini yumbakha litaala likali, nalikulikha lira liu mwana wewe Enoko. 18Enoko yivula mwana wi shiyayi walaangwangwa Iradi, wivula Mehuyeli. Mehuyeli yivula mwana wi shiyayi walaangwangwa Metsushaheli, wivula Lameki. 19Lameki yali wahila vakhali vavili, mulala yali ni lira Ada, na wundi nalaangwa Zila. 20Ada yivula Yabali, kuuka wa vandu vavaayi vi miruku khandi vandu vamenyanga mu maheemo. 21Yabali yali na amwavo wewe Yubali, nali kuuka wa vandu voosi vayaanza khwimba tsinyimbo nivarumishilanga shilili nende indulelo. 22Zila yivula mwana wi shiyayi walaangwangwa lira Tubali Kaini, wiraanyanga vindu khurula khu mukasa nende shivia. Mbotso Tubali Kaini yalaangwangwa Nahama.
23Lameki yavoolela vakhali veve,
“Munyi Ada nende Zila, mumbulishitsi!
Munyi vakhali vaanje, mulonde kambolanga:
Mali khwiira musatsa muvukha shichila yasalilitsa,
mwana wi shiyayi shichila wandumula tsinguma.
24Niiva vandu saba valiitsa khwiirwa khuvanza khwiirwa khwa Kaini,
vandu makhomi saba na saba valiitsa khwiirwa, niiva mundu aliitsa khunziira.”
25Adamu yakona khandi nu mukhali wewe, naheelitsa, niyivula mwana wundi wi shiyayi. Hawa yavoola “Nyasaye umbeele mwana wi shiyayi khukalukha havukono wa Abili, wa Kaini yiira.” Hawa yamukulikha lira Setsu. 26Setsu yivula mwana wi shiyayi, namukulikha lira Enoshi. Nako matukhu ka vandu varaanga khurumishila lira litakatifu liu Mwami Nyasaye, nu khusaala khuye.
Obecnie wybrane:
LIRAANGA 4: LLLCATHOLIC
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© The Bible Society of Kenya, 2013
