Omochakano 3
3
Ogotaigwera kwa Mwanyabaanto
1 #
Okom 12:9; 20:2 Bono eng’iti engenda inse nigo yarenge eng’aini kobua ching’iti chinde chionsi, echi Omonene Nyasae akorete. Engiti ekaboria omokungu: “Inee! Namaene ng’a Nyasae nigo abakanetie ng’a timoria amatunda ’omote onde bwonsi ore mogondo?”
2Omokungu oria akairaneria eng’iti eria: “Amatunda a kera omote ore ase omogondo ’natonyare koyaria 3otatiga amatunda y’omote ore mogondo gati-gati. Nyasae nigo atokanetie titoria amatunda korwa ase omote oria gose koyakuna, toise gokora bo nigo torakwe.”
4Eng’iti eria ekairaneria omokungu oria “Ayio tari bo ogokwa, timogokwa. 5Nyasae nigo akwanete bo akiagera amanyete ng’a ekero moraarie amatunda y’omote oyio nigo morabwekane Nyasae mobe mokomanya amaya na amabe.”
6Omokungu oria agachia korora omote oria buna ore omuya okoriegwa na okogwenera amaiso, na omote oria noyo bw’okoganigwa, ekiagera okobaa okomanya, agatwa amatunda aye, akaria. Erio agwo akairera omosacha oye amatunda ande nere akaria. 7Erio agwo nyuma ko barire, bakaegwa okomanya bakamanya ng’a ngetirianda bare; erio bagatabora amato y’omoko, bakayasonerania, erio bakeboyia.
8Emogoroba eria bakaigwa eriogi ri’Omonene Nyasae ogotaara ase omogondo, erio barabwo bakebisa mogondo gati y’emete. 9Korende Omonene Nyasae akarangeria omonto oria, akamobooria: “Ng’ai ore?”
10Ere akamoiraneria: “Nigo naigwa eriogi riao ase omogondo, noboa ase ayio nebisa ekiagera igo nde getirianda.”
11Omonene akamobooria: “Ing’o ogoteebia ng’a ngetirianda ore? Inee! Nkwarire amatunda y’omote oria nagokanetie ng’a toria?”
12Omonto oria akamoiraneria: “Omokungu oyo kwang’ete ng’a abe amo nainche, nere ong’ete amatunda y’omote oyio, na inche nkaria.”
13 #
2 Abakr 11:3; 1 Tim 2:14 Eri’Omonene Nyasae akabooria omokungu oria: “Ninki kiagera gwakora aya?” Omokungu oria akamoiraneria: “Neng’iti yang’ainete, nkaria.”
Omonene okorua okoragereria
14Omonene Nyasae agateebia eng’iti eria,
“Ekiagera gwakorire aya,
aye bweka kwaragererigwe kobua ching’iti chionsi;
aye nenda oragendere,
na orotu orarie buna endagera ase obogima bwao bwonsi.
15 #
Okom 12:17
Inche nimbeeke obobisa ase egati yao na omokungu oyo,
na ase egati y’oroiboro rwao na oroiboro rwaye;
noroiboro orwo narogosenyente omotwe oo,
na aye nomoorome egetingiro kiaye.”
16Akaonchokera omokungu, akamoteebia,
“Ninkomentere emechando emeenge ekero okoba morito,
na ekero okoibora abana nonyore obororo;
nonya nabo okogania kwao nigo korabe ase omosacha oo,
na ere nakogaambere.”
17 #
Abaibr 6:8
Erio agateebia Omosacha oria,
“Ekiagera kwaigwerete mokao
na okaria amatunda ’omote oria nagokanetie ng’a toria,
riroba riaragererigwe ase engencho yao.
Ase ogwechanda kwao norie okwama kwaeriroba
amatuko onsi ay’obogima bwao.
18Riroba narikwamere amagwa na amageri,
na aye norie okwama kw’ebimeri bi’orosana.
19Goika okore omokia na goitera ebigeri gokora riroba riame kende gionsi
omanye konyora endagera orie;
goika oirane ase riroba, ekiagera agwo nao kwarwete.
Naki aye norotu,
naende noirane ase orotu.”
20Adamu akaaroka mokaye Hawa#3:20 Hawa: engencho yaye: okoba moyo, ekiagera ere nere ng’ina bw’abare moyo bonsi. 21Erio Omonene Nyasae akaroiseria Adamu na mokaye chingobo chi’amasankwa, erio agwo akababoyia.
Adamu na Hawa bagoserigwa korwa ase omogondo o Edeni
22 #
Okom 22:14
Eri’Omonene Nyasae agateeba: “Rora, omonto oyo obeire buna oyomo oito ase okomanya amaya na amabe. Tabaisa gwancherwa gochia korambora okoboko kwaye atwe amatunda ’omote bw’obogima arie, erinde abe moyo kare na kare.” 23Ase ayio Omonene Nyasae akamoseeria korwa ase omogondo o Edeni, akamobeka areme riroba agwo ase arwete. 24Ase ensemo ya moocha y’omogondo o Edeni akabeeka ebitongwa bibwate chimbaba, n’omoyio o birende ogwoka omorero okona‐koonchaonchoka chinsemo chionsi. Erio korenda onde bwensi tacha ase omote bw’obogima.
Obecnie wybrane:
Omochakano 3: EKGE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Bible Society of Kenya, 2021
