TAUNET 9
9
Maranet
1Ak kiiberur Kamuktaindet Noa ak werikyik, ak kolenji, Oiiye, otesage, ak onyi ng’ony kogeny. 2Ak koiyweak tiony age tugul ne bo ng’ony ak konyor tobotiet agobo okwek, agot tarit age tugul ne bo barak, ak tuguk tugul che bendoti eng’ ng’ony, ak njirenik tugul che bo nyanjet, kaginde eunekwok. 3Egu amitwogikwok kiy age tugul ne sobei ne wendoti; kagonok tugul ko u ye kiga agonok ngwek alak tugul che nyalilen. 4Ago moam banyek koboto sobondanyi; sobonoto ko korotikyik. 5Amagenok iman korotikab sobonwekwok agobo sobondab chi; eng’ tiony age tugul amage korotichoto; ak eng’ chi, agot eng’ tupchetab chi age tugul, amage sobondab chi. 6Ak ne tumdoi korotikab chi, kotumdoi chito chechik agine: amu kiyai Kamuktaindet chi eng’ itondanyi. 7Oiiye anyun okwek; otesage; oiiye mising’ eng’ ng’ony, otesage eng’ oloto.
Noa ak ketitab sabibuk
8Ak kilenji Kamuktaindet Noa, ak werikyik che kimi koboto inendet, 9Ogeero, kaagimit, ane, kayomisennyu kobotok ak koboto iyoteng’wong’ ne biitu let; 10ak koboto kiy age tugul ne sobei ne mi kobotok, tarit, tany ak tiony age tugul ne mi kobotok eng’ ng’ony; eng’ tugul che mandoi eng’ melit, agot tiony age tugul ne bo ng’ony. 11Ak agimit kayomisennyu kobotok, ale, ma kebarei kiwong’u eng’ beek che bo maranet kogeny, tugul che soptos; ak ma kobiitu kogeny maranet ne ng’emei ng’ony. 12Ak kimwa Kamuktaindet kole, Kaborunet ni, ne bo kayomiset ne kagiyomisge eng’ kwenunnyo ane, ak okwek ak kiy age tugul ne sobei ne mi kobotok ak ibinwek che bendi agoi koigeny. 13Kande chemng’isiriet boldet, si koek kaborunet ne bo kayomiset ne mi kwenunnyo ak ng’ony. 14Ak ye kaauure boldet ng’ony, kotook anyun eng’ yoto chemng’isiriet eng’ boldet, 15abwat anyun kayomisennyu ne mi kwenunnyo ane, ak okwek ak kiy age tugul ne sobei ne tinyei borto; ak ma kobiitu beek kogeny che egu maranet ne iwong’u tugul che bo borwek. 16Ak ye took anyun chemng’isiriet eng’ boldet, ageer, si kobiit abwat kayomiset ne tebyei agoi koigeny ne mi kwenutab Kamuktaindet ak kiy age tugul ne sobei ne bo bor, ne mi ng’ony. 17Ak kilenji Kamuktaindet Noa, Kaborunet ni, ne bo kayomiset ne kaagimit eng’ kwenunnyo ane, ak tugul che bo borwek che mi ng’ony.
18Ak werikab Noa che kimong’ eng’ melit, ko ki Sem, Ham, ak Japet: ak Ham ko kwandab Kanan. 19Chuto somok ko ki werikab Noa: ak kiyom ng’ony komugul iyotenywa.
20Ak kitoi Noa koek kabatindet, ak kimin ketikab sabibuk eng’ mbar: 21yeityo koee maiyek ak kobogit ak koteb ach ngor eng’ emainnyi. 22Kigeer Ham, kwandab Kanan, kotebyei kwandanyi ach ngor, ak kimwachi tupchosiekyik aeng’ che kimi sang’. 23Ak kiinem Sem ak Japet sambut, komure tigigoikwak ichek tuwai ak kibee batai, ak kotuch ach ngorietab kwandanywa; ak kiituktochi batai, si mageer ach ngorietab kwandanywa. 24Ak kisob Noa eng’ bogitennyi, ak konai tuguk che kagoyachi werinnyi ne ming’in. 25Ak kile,
Ingochubok Kanan;
Koek otwogindetab otwogik che bo tupchosiekyik.
26Ak kile,
Ingoberurok Sem eng’ Jehovah Kamuktaindennyu;
Ak ingoek Kanan otwogindennyi.
27Ingobara Kamuktaindet Japet,
Ak ingotebote emaisiekab Sem;
Ak ingoek Kanan otwogindennyi.
28Ak kitar Noa kenyisiek bogol somok ak konom ye kingobata maranet. 29Ak betusiek tugul che bo Noa ko ki kenyisiek bogol sogol ak konom: si komee.
Obecnie wybrane:
TAUNET 9: BUKUIT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
God's word open for all
©Bible Society of Kenya, 2020
