TOBITƐ 4
4
Tobitɛ tɔ̃a mbula hã be 'da a
1Do kpo kɔ̃ tũi ni, nɛ ta zu Tobitɛ gba ngɔ mbili kɛ a la zi tɛ 'da Gabaɛlɛ, tɛ kɔ le Ragɛsi, ngɔ nù Medi i ni. 2Nɛ a tɔ̃ do kɔ sila a na: “Ɔ nɛ kɛ mi aka Gale na mi fe ni, ma dia fɛ̃ na, mi sa mɔ hã bulu be 'da mi Tobi, hã mi tɔ̃ we mbili ni hã a, sɛ nɛ mi fe de.” 3Nɛ a sa mɔ hã Tobi, nɛ a tɔ̃ hã a na: “Be 'daa, fala kɛ mi fe, nɛ mɔ dɛ́ mɔ ngɔ fio mi do dia nɛ. Mɔ dɔnggɔ naa mɔ, nɛ mɔ tɛ là a gɔ. Mɔ zɔ́ mɔ tɛ̃ a gbaa na a fe nɛ. Mɔ fá we hã yangga hã a, nɛ mɔ dɛ́ na, dɛa mɔ tɛ mɔ kpo tɛ hã 'bako hã a gɔ. 4Be 'daa, ta zu mɔ tɛ èlè ngɔ fɛnanɔ a hɔa zi do zã mɔ ni gɔ. Kɔ fala kɛ a fe, nɛ mɔ mi a dɛ kɛ zã mi dɛ kpo kɔ zuni 'da mi ni.
5“Tũ kpo kpo kɔ dungu nza 'da mɔ vɛ̃, mɔ lénggé do NWA Gale 'da lɛ. Mɔ tɛ dɛ̀ 'dã mɔ gɔ, nɛ mɔ tɛ bɛ we nu a gɔ. Mɔ dɛ́ bɔlɔ zu dɛa mɔ 'da fala fai, nɛ mɔ tɛ yɛ̀nggɛ̀ li wala 'dã mɔ gɔ. 6Mba gɔ, wanɔ kɛ wa dɛ mɛnɔ do bɔlɔ nɛ ni, wa kpa sɛ si olo dɛa tonɔ 'da wa. 7Mɔ dɛ́ gbɛla hã wanɔ wa dɛ mɛnɔ do bɔlɔ nɛ ni, nɛ mɔ tɛ dɛ̀ sila gɔ. Mɔ tɛ bɛ we gala wi sã gɔ, sɛ a Gale gbaka tɛ mɛ 'bɔ mɔ de. 8Mɔ dɛ́ gbɛla hã winɔ ɔ nɛ kɛ ma wia do mɔ ni. Fala kɛ mɔ kpa a gã, nɛ mɔ hã a gã. Fala kɛ mɔ kpa be sĩ, nɛ mɔ hã tɛ mɛ 'bɔ be sĩ. 9Mɔ dɛ na mɛ ni, nɛ nde mɔ tɛ ngɛmɛ gã kpamɔ we 'bɔ do kɔ tũi kɛ sã ma ba sɛ mɔ ni. 10Mba gɔ, wi kɛ a hã mɔ hã wi sã ni, a tɛ gɔnɔ zu a wele nɛ ti kɔ̃ fio, nɛ gbɛla a dɛ ni, ma amba sɛ zu a na, a tɛ lè kɔ le 'da fionɔ gɔ. 11Wele kɛ a ba tɛ̃ a we gala ongba a ni, a tɛ hã dia dɔnggamɔ hã Gale tɛ li nza i.
12“Be 'daa, mɔ tɛ lè kɔ ba ko kɛ mbula 'da Mɔizɛ bɛ̃a gɛnɛ nɛ ni gɔ, nɛ nde mɔ bá wuko kɔ nu fɛlɛ kula 'da obaa mɔ. Mɔ tɛ bà gele wuko kɛ a kɔ nu fɛlɛ kula 'da baa mɔ bina ni gɔ, we kɛ lɛ a obe zã wi dɛa tonɔ 'da Gale. Ta zu mɔ gba ngɔ kuti oyaa lɛ: Nowe, Abrahama, Izaka do Yakɔbɔ. Wa vɛ̃ wa ba zi wuko dɛ kɔ nu fɛlɛ kula 'da wa. Gale wila zi nu ɛ tɛ wa, nɛ a hã zi obe hã wa. Nɛ a kpua mbulu hã obe zã wa na, ɛ ba sɛ nù Israɛlɛ hã wa do mɔ́ wa. 13Kɔ aa be 'daa, mɔ kɔ̃́ gɛnɛ onya mɔ, Oisraɛlɛ. Mɔ tɛ lènggè na, mɔ nɛa ngɔ onya mɔ, Oisraɛlɛ gɔ, nɛ mɔ tɛ bɛ we ba wuko sanga wa gɔ. Mba gɔ, owi dɛ ngatɛ, sila wa fai a ngɔ, nɛ wa sɔ́kpɔ́ do dia nɛ gɔ, kpasaa ɔ nɛ kɛ yɔnda, ma ko sã, do gã zɛlɛ tɛ, do gba wɔ ni.
14“Wele dɛ to hã mɔ sɔɛ gɛ, nɛ mɔ tɛ 'bɔ̀ na, bindɛ sɛ nɛ mɔ futa a de gɔ. Mɔ futa a do ti. Fala kɛ mɔ dɛ to hã Gale na mɛ ni, nɛ mɔ kpa sɛ si olo nɛ. Be 'daa, li mɔ sɔ̃́ kɔ odɛa mɔ tɛ mɔ vɛ̃, nɛ dɛa mɔ tɛ mɔ ma be na, wa dala mɔ do dia nɛ. 15Mɔ kɛ mɔ kɔ̃ na wa dɛ́ do mɔ gɔ ni, nɛ mɔ tɛ dɛ̃ tɛ mɛ 'bɔ do ngba mɔ gɔ. Mɔ tɛ nɔ̀ dɔ̃ gbaa nɛ ma ba mɔ gɔ, nɛ mɔ tɛ hɔ̀ ngbá 'da ba dɔ̃ gɔ, nɛ bá dɔ̃ tɛ hɔ̀ nwa ngɔ mɔ gɔ.
16“Mɔ ha nyɔngɔmɔ hã wi wɔ, nɛ mɔ hã tulu hã wanɔ wa zɔlɔ ma ni. Fala kɛ mɔ ɔ do kpamɔ wena, nɛ mɔ hã mbe hã Owi sãnɔ do de sila, nɛ mɔ tɛ dɛ̀ sila gɔ. 17'Da fala kɛ wi bɔlɔ zu fe, hã wa dɛ mɔ nu tɔa fio a, nɛ mɔ hã nyɔngɔmɔ hã owinɔ ni. Kɔ ma ɔ do nu tɔa fio 'dã wi, nɛ mɔ tɛ dɛ̃ mɔ hã wa gɔ.
18“Mɔ áká Owi hãnɔ na, wa tɔ̃ mbula hã mɔ, nɛ mɔ tɛ zɔ̀ mbula 'da wa li mɔ yala iko gɔ. 19Mɔ hã iɔ̃nae hã NWA Gale 'da fala fai. Nɛ mɔ sámbálá a na, a kã mɔ li dia wala, nɛ a dɛ na, mɛnɔ mɔ lengge we dɛ ma ni, ma sɔkpɔ do dia nɛ. Mba gɔ, fo wele hã zã ngɔ nù gɛ bina. NWA zu a kpo, a hã ma ɔ nɛ kɛ zã a kɔ̃a ni, nɛ a ba 'bɔ wele dɛ nù gbaa we e a kɔ le 'da fionɔ i.
“Kɔ be 'daa, ta zu mɔ tɛ èlè ngɔ mbulanɔ gɛ gɔ, nɛ da dɛ kɔ ma fó tɛ̃ ɛ kɔ sila mɔ fala kpo gɔ!
20“Be 'daa, ngangga ni, mi kɔ̃a we mbese mɔ na, mi usu zi mbili kilo kama talɛ 'da Gabaɛlɛ, be 'da Gabri, tɛ kɔ le Ragɛsi, ngɔ nù Medi. 21Be 'daa, gɛnɛ kɔ lɛ ɔ do Owi sã, nɛ nde mɔ tɛ dɛ̀ kili gɔ. Fala kɛ mɔ dɛ olo nu Gale, hã mɔ yu 'dã mɛnɔ, nɛ a kɔ̃ sɛ gɛnɛ mɔ, nɛ a hã gã kpamɔ hã mɔ.”
Obecnie wybrane:
TOBITƐ 4: NGB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Ngbaka DC Bible (We Nu Gale) Version © Bible Society of the Democratic Republic of Congo, 1995.