लुका 22
22
यीशुन विरोद होमच्यो
(मत्ती 26:1-5; मरकुस 14:1-2; योहान 11:45-53)
1बिगेर खमीरान रोटान तिवार जो फसह केवाह, आहने ईतो; 2एने मुखी चाकर्यो एने देरेमगुरू यीशुह मारावणेन गालो काड़ने बाजरियेल एता, पुण ता माणहाह बिताला।
यहुदा इस्कोरितीन बुरहो तोड़ने
(मत्ती 26:14-16; मरकुस 14:10-11)
3यहुदाह इस्कोरिती बी केताला तो यीशुन बारा चेलाम रेन एक ईतो ता माय सैतान रिग गीयो। 4यहुदा मुखी चाकऱ्या एने मोंदिरान सिपायड़ान मुखी फाय गीयो, एने यीशुह किहीक देराव सेकु, ज्यान बाराम ता हिऱ्यो वातु किऱ्यो। 5ते ता जुलूम खुस एय गीया एने यहुदाह पोयशा आपणे तियार एना। 6यहुदा मान लिदो एने जा माणहे नाय रेती ता यीशुह देरावणेन गालो होदणे बाज गीयो।
चेला हिऱ्यो फसह तिवारान सेवल्यो खाणो
(मत्ती 26:17-25; मरकुस 14:12-21; योहान 13:21-30)
7जेवी बिगेर खमीरान रोटान तिवारान दिह आवो, तेवी ता फसह तिवारा माय गीदल्यो चेड़ावणे जोरेवरी एतो। 8यीशु पतरस एने योहानाह इहकेरीन केयीन मुकल्यो: “जावो आपणे केरता फसह तिवारान खाणो तियार किरो।”
9तेवी चेला यीशुह फुशा, “आमु तान काहरी तियारी किरज्यो तारी मोरजी काय हे?”
10यीशु ताह केयो, “गावा माय रिगताच तुमूह एक माणुह पाणी बुरेल गुंडो उखलीन जुड़ी, एने जा गेरा माय तो जाय ताच गेराम तुमू बी जाज्यो” 11एने ता गेरान मालक्याह किज्यो: “गुरू तुवाह फुसेह, काय मार चेला हिऱ्यो फसह तिवारान खाणो खाणेन खोली का हे?” 12तो तुमूह उपेर हिंगारेल एक मोटली खोली देखाड़ देय; ताच फसहान खाणान तियारी किरज्यो।
13तेवी चेला जाईन जिहकेरीन यीशु कियेल ईतो, तिहेच केरीन ता देख्या एने ताहरी ता फसहान खाणान तियारी केऱ्या।
मालीकान खाणो
(मत्ती 26:26-30; मरकुस 14:22-26; 1 कुरिंथीयो 11:23-25)
14जेवी टेम आव लागु, ते यीशु बारा प्रेरिता हिऱ्यो खाणो खाणे बुठो। 15एने यीशु ताह केयो, “माहु दुख वेठणेन पेल तुमरे हिऱ्यो फसह तिवारान खाणो खाणेन जुलूम आसा एती। 16मी तुमूह केथु काय जाह वोर बोगवानान राज माय ज्य आखो पुरो नाय एय, ताह वोर मी ताह केदी नाय खाव।”
17तेवी यीशु वाटको लेन दन्यवाद केरीन केयो, “ज्याह लिवो एने तुमरे माय वाट लिवो। 18मी तुमूह केथु काय एवी रेन बोगवानान राज आवता वोर मी अंगुरान रोह केदी नाय पिव।”
19ओवतो यीशु रूटो लिदो, एने दन्यवाद केरीन मुड्यो एने चेलाह आपीन केयो, “ज्यो मारो सेरीर हे जो तुमरे केरता आप मीलेल हे, माहु एर केरनेन केरता इहीचकेरीन केऱ्या किरज्यो।” 20तिहेच केरीन यीशु वाटको लेन चेलाह कितेन आप्यो, “ज्यो वाटको मारी लुय माय नोवालो वायदो हे जो तुमरी केरता वोयाड़ाय जाथे।#22:20 थोड़ाक लेख माय वचन 19 मायवालो ज्यो मारो सेरीर हे ने पासाण यीशुन सोबदो, एने आखो 20 वचन बी नाह लिखेल सोतो।
21“पुण दिखो, माहु देरावणारान आथ मार हिऱ्यो पाटला पोर हे। 22काहाकाय माणहान बेटाख ने केरता ठेराव मेल्यह, तिहेच केरीन माराय जाय पुण जा माणहा केरीन यीशु देराय जाय ता माणहान केरता हाय!”
23तेवी चेला एका दिहराह फुसणे बाज गीया काय आपणाम ओहलो केरनार कुण एय।
आखाम रेन मोठो कुण? ज्या पोर बोलचाल
24 #
मत्ती 18:1; मरकुस 9:34; लुका 9:46 उंजु चेलाम ज्यो बोलचाल बी एनो काय आपणाम आखाम रेन मोठो कुण हे। 25यीशु चेलाह केयो, “बिगेर यहुदि पोर तान राजा राज किरेह; एने जा ता पोर आदिकार केरतेह, ता उपकार केरनार केवातेह।” 26#मत्ती 20:25-27; मरकुस 9:35; 10:42-44तुमू ओहला मा बुणहो; पुण जो तुमरे माय रेन मोटलो हे, तो आतल्यान गेत रेय, एने जो तुमू माय रेन मुखी हे, तो पावोरान गेत रेय। 27#योहान 13:12-15काहाकाय मोटलो कुण हे, तो जो खाणो खाणेन बोह रिनोह, नाहते तो जो वाटणार पावोर? खाणो खाणार ते मोठो हे, पुण तुमरे विची माय मी पावोरान गेत हे।
28“तुमू ता हेते, जा मारी पारेख माय मार हेऱ्याच रेना” 29एने जिहकेरीन मारो आबोख एक राज पोर माहु आदिकार आपेल हे, तिहेच केरीन मी बी तुमूह आदिकार आपथु, 30#मत्ती 19:28काहाकाय तुमू बी मार राज माय मार पाटला पोर खावो पिवो, एने राजगादि पोर बोहीन इस्राएल ने बारा गेराणान नियाव किरहो।
पतरसान नाकारान जाणाव
(मत्ती 26:31-35; मरकुस 14:27-31; योहान 13:36-38)
31उंजु यीशु केयो, “शिमोन, एय शिमोन! होमेल, बुतड़ो तुमूह पारेखणेन केरता परवांगी मांग लियेल हे, काय तुमू आखाह खाराबाम रेन हाजालाह आंगे केरी जिहकेरीन किरसाण गोवान दाणाह बुहटाम रेन आंगे किरेह। 32पुण मी तार केरता विन्ता किऱ्यो काय तारो बुरहो कोमजोर नाय एय; एने जेवी तु मार फाय पुशो आवहे, ते तारा बायाख ईमोत आपजे।”
33पतरस यीशुह केयो, “एय मालीक तार हिऱ्यो मी जेली माय जाणेन एने मोरनेन केरता बी तियार हे।” 34यीशु केयो, “एय पतरस, मी तुवाह केथु काय आज कुकड़ो वाहणेन पेल तु तीन वार माहु नाह ओलखेत ओहलो केयीन नाकारो किरहे।”
वाहली, जोलनो, एने तालवार
35 #
मत्ती 10:9,10; मरकुस 6:8,9; लुका 9:3; 10:4 ओवतो यीशु ताह फुशो, “जेवी मी तुमूह बिगेर बोटवो एने जोलनो, एने बिगेर खाहड़ान मोकेलतालो, ते काय तुमूह काल्ली चिजीन कोमी पोड़नाली काय?” ता केया, “काल्ली चिजीन नाह”
36यीशु ताह केयो, “पुण एवी जा फाय बोटवो एय तो तीह लेय लेय एने तिहेच केरीन जोलनो लेय लेय, एने जा फाय तालवार निहे एय तो तान फाड़का वेचीन एक तालवार वेचाती लेय लेय 37काहाकाय मी तुमूह केथु काय पुस्तेक माय इहकेरीन लेख मेल्योह: तो गुनेगारा हिऱ्यो गेणाय गीयो, काहाकाय तान बाराम कायदा माय लिखेल ती वातु पुऱ्यू एणेन जोरेवरी हे।”
38चेला केया, एय मालीक, “देख! न्या दुय तालवार हेत्यु!” यीशु चेलाह केयो, “ओल्युच जुलूम हेत्यु।”#22:38 तो जुलूम हे, नाहते ज्यो जुलूम हे।
जेतुन बोयड़ा पोर यीशुन विन्ता
(मत्ती 26:36-46; मरकुस 14:32-42)
39ओवतो यीशु ता रेन निकलीन तान आदेतीन गेत जेतुन बोयड़ा पोर गीयो, ते चेला बी यीशु हेऱ्या गीया। 40ता जागा पोर पोच गीया, ते यीशु चेलाह केयो, “तुमू विन्ता किरो काय पारेख माय नाय पोड़हो।”
41यीशु चेलाह रेन दिगोड़ टाकणे उलोक सीटे जाईन मांड्या वोलीन विन्ता केरने बाज गीयो, 42यीशु इहकेरीन विन्ता केरने बाज गीयो, “एय आबा, तारी मोरजी एय ते ज्या दुखान वाटकाह मार फाय रेन सिटो केर ले, तीबी मारी नाह पुण तारीच मोरजी पुरी एणे दे।” 43तेवी हेरगाम रेन एक हेरोगदुत यीशुह देखानो जो ताह ताकेत आपतालो। 44यीशु जुलूम दुखी एन उंजु बी जुलूम दुख माय विन्ता केरने बाज गीयो; एने यीशुन उबारो लुयान मोट मोटला टिपकान गेत बुई पोर पोड़ताला।#22:44 थोड़ाक लेख माय 43-44 वचन नाह लिखेल सोतो।
45जेवी यीशु विन्ता केरीन उठ्यो एने तान चेला फाय गीयो, ते ता नाराज ने कारेण हुवणे बाजरियेल एता। 46एने यीशु चेलाह केयो, “तुमू काहा हुवणे बाजरेनाह? उठो, विन्ता किरो काय तुमू पारेख माय नाय पोड़हो।”
यीशु दोका माय देराय जाणे
(मत्ती 26:47-56; मरकुस 14:43-50; योहान 18:3-11)
47यीशु इहकेरीन केणे बाजरियेल ईतो, ते जुलूम माणहे ता आवा, एने बारा चेलाम रेन यहुदा बी तान ओंगाण ओंगाण आवतालो, तो यीशुन आहने आवो काय ताह गुल्या देय। 48यीशु ताह केयो, “एय यहुदा, काय तु गुल्या देयीन माणहान बेटाख देरावेह?”
49यीशुन चेला जा ता हेऱ्या एता देख्या काय एवी काय एण्यो हे, ते ता केया, “एय मालीक, आमु तालवार चालाड़ज्यो काय?” 50एने ता माय रेन पतरस तालवार केरीन मुखी चाकर्यान पावोरान जीवड्यो कान काट दिनो। 51पुण यीशु तो देखीन केयो, “थुबो, इही मा किरो।” एने यीशु तान कानाह सापलीन ताह हाजो किऱ्यो।
52तेवी यीशु मुखी चाकऱ्याह एने मोंदिरान राखवाल्यान आदिकाराह एने डायडायाह जा यीशुन विरोद चेड़ाय केरीन आयेल एता, ताह केयो, “तुमू माहु कायदो तोड़नार सोमजीन तालवार्यु एने डेंगा लेयीन आवाह काय? 53#लुका 19:47; 21:37जेवी मोंदिर माय मी दाड़ीन तुमरे हिऱ्यो रेतालो, ते तुमू माहु काहा देरनेन कोसीत नाह केऱ्या; पुण ज्यो तुमरो टेम हे, एने आदारलान राज हे।”
पतरसान नाकार
(मत्ती 26:57-58,69-75; मरकुस 14:53-54,66-72; योहान 18:12-18,25-27)
54ओवता ता यीशुह मुखी चाकर्यान गेर लावा। ते पतरस बी तान पासाण पासाण आवो। 55एने जेवी ता आक्ठो पेटाड़ीन खोली माय टोलवाएन बोह रियेल एता, ते पतरस बी ता हिऱ्यो बोह गीयो। 56तेवी एक पावेरनी पतरसाह आक्ठीन मीरे बोह रियेल देखीन, एने ती तान उगे देखीन केयी, “ज्यो एदमी बी यीशु हिऱ्यो ईतो।”
57पुण पतरस नाकारतेन केयो, “एय बायकु, मी ताह नाह ओलखेत।”
58थोड़ीक वारीन पासाण दिहरो माणुह पतरसाह देखीन केयो, “तु बी ते ता माय रेन एक हे।” पतरस केयो, “नाह, मी ता माय रेन नाह।”
59एक गेंटान पासाण उंजु एक एदमी जोर लेएन केयो, “खेरीच ज्यो एदमी बी ता हिऱ्यो ईतो, काहाकाय ज्यो गेलील वालो हे।”
60पुण पतरस केयो, “तु कायतान बाराम केणे बाजरिनोह तो मी नाह जाणेत!” पतरस इहकेरीन केणे बाजरियेल ईतो, ते चालोच कुकड़ो वाह दिनो। 61तेवी मालीक पासाण फिरीन पतरसान उगे दिख्यो, ते पतरसाह बी यीशु कियेल ती वात एर आवी काय “आज विगोस कुकड़ो वाहणेन पेल, तु माहु नाह ओलखेत इहकेरीन तीन वार किहे।” 62एने पतरस बाहेर निकलीन उहकी उहकीन रेड़ने बाज गीयो।
सिपायड़ा यीशुन ईजुत उड़ावणे
(मत्ती 26:67-68; मरकुस 14:65)
63जा यीशुह देर रियेल एता, ता सिपायड़ा यीशुन मोजाक उड़ावीन देणे बाज गीया; 64एने ता यीशुन डुले पाटो बांदिन ताह फुशा, “जाणाव केरीन के काय तुवाह कुण देनोह!” 65एने ता जुलूम होवट्यु उंजु बी चिहटान वातु यीशुन विरोद माय केया।
मुखी चाकर्यो एने देरेमगुरून ओंगाण यीशु
(मत्ती 26:59-66; मरकुस 14:55-64; योहान 18:19-24)
66जेवी दिह उगनो ते डायडाया एने मुखी चाकऱ्या एने देरेमगुरू एकठा टोलवाना, एने यीशुह तान मुखी पोंचा माय लावीन केया, 67“केदी तु मसी एय? ते आमुह केय दे!” यीशु ताह जापाप आप्यो, “मी तुमूह केह ते तुमू बुरहो नाय किरहो। 68एने केदी मी तुमूह फुसूह ते जापाप नाय दिहो। 69पुण एवी रेन माणहान बिटोख आखाम रेन ताकेतवाला बोगवानान जीवड़े उगे बोह रेय।”
70इहकेरीन होमलीन आखा माणहे फुशा, “ते तु बोगवानान बिटोख हे काय?” यीशु ताह जापाप आप्यो, “तुमूच ते केतेह मी हे।”
71तेवी ता केया, “आमुह एवी काल्ला पुरावान गिरेज नाह; काहाकाय खुद आमु तान मुया केरीन होमली लियेल हेते।”
Obecnie wybrane:
लुका 22: NTNii2020
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
