Luk 23
23
1Haḡe sinombu duluai ram domare ram lai Jisas vai aben Paelat, 2ram dau bwatuna ram dul bonogai aluna. Ram bevea be, “Gam habwe wani geki gabe mwa domuai leteletei nomai sinombu, mwa bevea be rasav vol te takis lalai Ratahigi lavoa ata Rom, i mwa bevea sibona be, kea Kraes gabe wani Vurai Ratahigi Lavoa.”
3Paelat mwa hudalinia mwa bevea be, “Matu giḡo haḡea ratahigi lavoa nora Jius?”
Jisas mwa bwaliua be, “Gom bevea haḡea.”
4Haḡe Paelat mwa bevea lalai ira muai tataroi maira sinombu be, “Nam hav habwe te ginau be nai vevegi dum wani geki ginia.”
5Take ram bev wasinia be, “Kea mwa dau bwatuna mwa lol loḡeloḡe sinombu gin non silo vagahi mwa dau bwatuna Kalili, Judia duluai, i kadogaha mwa mai teti.”
Paelat mwa Hora Jisas Vai Aben Herod
6Mahavana Paelat mwa ron̄oe kunia mwa hudaligi be, “Matuke wani geki kea ata Kalili?” 7Batena mwa iloe be Jisas kea ata lol ute gabe Herod mwa lavoa ḡoroe, kunia mwa horae vai aben Herod, be kea mulei lol vanua Jerusalem lol mahavana gea. 8Herod mwa samsamwara maragai mahavana mwa ḡita Jisas, bwatuna be nu ron̄ roroi huria i nu doron be vi gitae mahavan n̄ava huba. I nu vinihia be vi gita Jisas be men lol ginau dan̄an̄a. 9Kunia Herod mwa hudali Jisas gin avoana ivusi, take mwa hav vwaliu te avoana gaituvwa. 10Haḡe ira muai tataroi mai ira vagahin Silo ram domare ram dul bonogai maragai vai alun Jisas. 11Herod maira non atatun bwaloana ram lol leilei Jisas i ram rav savwiria; ram dau koti tavuha vwate aluna i ram hora muleinia vai aben Paelat, 12La mahavan gea Paelat mai Herod ramuru dau bwatuna ramuru bulbulu mulei; take amua raru ivwaluinira.
Ram Bevegi Jisas huri Mateana
(Mat 27.15-26; Mak 15.6-15; Jon 18.39–19.16)
13Haḡe Paelat mwa uloi ira muai tataroi mai ira tomuai, i sinombu, 14mwa bevea lalainira be, “Gim lai wani geki lalaiau gim bevea be mwa domuai letei sinombu. Nam hiḡe non vahalana lol matamiu, take nam hav habwea tehe be nu vahala la hava te lolian hantai be gim dul bonogai vai aluna. 15Herod mulei mwa hav habwe te vahalana aluna, bwatuna gea mwa hora muleinia lalai gida. Ginau vahala vwate sigai be wani geki nu lolia huri be nu dadariha be vi mate huria. 16Nav talvusia vuvuri nav derainia vi vano.” 17Lol vataha Samsamwaran Halbisḡalau Paelat mwa derai hohoigi atat vauvauhi gaituvwa.
18Take sinombu duluai ram haharigi amare, ram bevea be, “Wehia! Lin̄ Barabas lalai kamai!” 19(Nu tau Barabas lol imwa vauvauhi huri lalaḡov hantai gabe nu lol loḡeloḡe sinombu lol bwatutun vanua, i huri be nu wehi bamat atatu.)
20Paelat nu doron be vi derai Jisas, kunia mwa uloi sinombu mulei mwa hudaligi. 21Take ram haharigi mulei be, “Vohae vai alun volovolo! Vohae vai alun volovolo!”
22Haḡe Paelat mwa bev muleinia vatoluna lalainira be, “Matu mwa lol havanau vahala? Nam hav habwe te havanau gabe nu lolia, mwa dadariha huri mateana! Nav talvwus vuvuria ba lin̄ derainia.”
23Take ram bato radu amare gin silo gaivua be, Jisas haḡea vi vohana vai alun volovolo, kunia nora haharigiana mwa mwasigi. 24Paelat mwa lolia haḡea lalai Jisas kun gabe ram hudalinia. 25Mwa derai wani gabe tam doronia, kea gabe nu taua lol imwa vauvauhi huri lalaḡov hantai i mwa lol loḡeloḡe sinombu lol vanua i huri be nu wehi bamat atatu, i mwa lin̄ Jisas lalainira be rav lolia kun gabe ram doron.
Ram Boha Jisas Vai Alun Volovolo
(Mat 27.32-44; Mak 15.21-32; Jon 19.17-27)
26Mahavana be atatun bwaloana ram lai dagai Jisas, ram bano, ram habwe Saemon ata Saerini, kea mwa himai nin vanua avare vai la bwatutun vanua. Ram haḡo batugehia, ram lolia be vi tatal volovolo atagun Jisas.
27Haḡe sinombu gaivua ram hurira; i vavine rituai alolon sinombu ram dan̄ihia ram dalan̄lan̄a. 28Take Jisas mwa ban burigai mwa bevea lalainira be: “Ira vavine ata Jerusalem! Gisav dan̄ihiau tehe, take giv dan̄ihi mulei kimiu mai ira nitumiu. 29Bwatuna be gubwen̄i rav mai i sinombu rav vevea be, ‘Samwarana lalai ira vavine gabe ira nitura sigai, i naturigi ram hav vovora te lalainira, i ram hav gitaḡorora tehe!’ 30Vi vora haḡea batena be sinombu rai vevea lalai vusi be, ‘Hovi vai alumai!’ i lalai vusi ririgi be, ‘Haravui kamai!’ 31Bwatuna be si vora ginau kungeki ras loli lol mahavan gai mwa bwaro, kun hanigi lol mahavan gai mwa ḡoru?”
32Haḡe ram lai atatu gairua mulei, kera saraḡo hantain lalaḡo, be raru vi mate bul mai Jisas. 33I batena be ram mai lol ute mwa uloinia be, “Bwalan bwatu,” aia ram boha Jisas vai alun volovolo, mai ira hantain lalaḡo gairua vwate la mwatuana i vwate la mwairina. 34Jisas mwa bevea be, “Tata, gov binihi kaburai vurora! Ram hav ilo te havanau be ram lolia.” Ram bohai dais gi dovon̄ana be ihei vi lai gaisagana, kunia ram hara gaisagana batvatahara. 35Sinombu ram du aia ram ḡita ira tomuai non ira Jius ram sovuinia ram manuhia; ram bevea be, “Kea mwa barahu atat dodolua; tan gitae vi varahua sibona, be kea mwasigi Kraes wani vurai gabe God nu gita luae!”
36Haḡe ira atatun bwaloana, mulei ram lol leileia; ram hamai huria ram hagai waen hantai lalainia, 37ram bevea be, “Varahugo sibomwa, be giḡo ratahigi lavoa nora Jius!”
38Avoana kera geki ran ravae la volovolo la ulun bwatuna be: “Geki Ratahigi Lavoa nora Jius.”
39Haḡe hantain lalaḡo vwate gabe mwa dule aia mwa avo son̄ vai aluna mwa bevea be: “Matu giḡo hav vora te Kraes wani Vurai? Varahugo sibomwa mai kamaru!”
40Take tuana mwa av surasurainia, mwa bevea be, “Matu gom hav matagui te God? Gom lai silo vevegi kun gabe kea nu laia. 41Nondaru silo vevegi nu vavtutu mai nondaru lalaḡov hantai be taru lolia; take kea nu hav lol te ginau vahala vwate.” 42Haḡe mwa bevea lalai Jisas be, “Gov binihi dumwiau Jisas mahavana be gov mai gi Ratahigi Lavoa!”
43Jisas mwa bevea lalainia be, “Nam datauleo lalainigo be, garigi gov togo maiau Abanoi.”
Mateanan Jisas
(Mat 27.45-56; Mak 15.33-41; Jon 19.28-30)
44Kun mahavan alo han̄vul domwan gairua, alo mwa hav mom ḡigita tehe, i ute mwa metmeto ḡoro vanua duluai vai votu alo gaitolu; 45haḡe gavun Imwa Tataro mwa mahera tavihen gairua. 46Jisas mwa haharigi amare gin silo gaivua mwa bevea be, “Tata! Nam lin̄ atmateku lol limwamwa!” Jisas mwa bev vuvuria kun geki, mwa mate.
47Haḡe lavoa ḡoro atatun bwaloana nu gita ginau be nu loli, mwa uloi roron God, mwa bevea be, “Mwasigi kea atatu tavuha!”
48Sinombu gabe ran mai aia ram dalvun̄ui hano be nu loli, kera duluai ram dabagilu ram dutui bwabwara gin ron̄ mwahantai. 49Kera gabe ram ilo Jisas mai ira vavine gabe ran huri Jisas nin Kalili, kera geki ran tu dagai hen hautu ram ḡita hano be nu loli.
Ram Dau Jisas Lol Bwaru Malan̄a
(Mat 27.57-61; Mak 15.42-47; Jon 19.38-42)
50-51Atatu vwate nin aia ihana Josep, nin Arimatia gabe bwatutun vanua vwate Judia. Ke atat binihimarahi i atat tavuha, mwa hohov huri maiana huri Rahuan gara gabe God mwa bora Ratahigi Lavoa ḡoro non sinombu alolona. Kea atatun Kansel vwate, take nu hav dame te la nora binihiva be rav lolia. 52Kea mwa bano mwa hudali Paelat huri rebehin Jisas. 53Haḡe mwa lai huri rebehina vai ata, mwa nubwae lol gav gara i mwa daua lol malan̄a gabe nu taia lol vatu, tavtavigi sigai radu alolona. 54Nu vora gubwen̄ gailimana, gubwen̄ mambuharai mwa abena be men tau bwatuna.
55Ira vavine gabe ran huri Jisas nin Kalili ran van mai Josep i ram ḡita malan̄a i rebehin Jisas be ran taua alolona. 56Haḡe kera ram dabagil mulei vai la vanua, i ram lol vatuvwai wai sasav bonboni huri rebehina.
Lol gubwen̄ mambuharai ram mambu, kun silo mwa bevea.
Obecnie wybrane:
Luk 23: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
