Luk 21
21
Hogoi non Bwero Vavine
(Mak 12.41-44)
1Haḡe Jisas mwa ate vai bano mwa ḡita ira ratahin homu ram bohai nora hogoi lol tanon homu lol Imwa Tataro, 2i mulei mwa ḡita bwero vwate gabe hiru mwa bohai non hogoi, kun vatu han̄vulu. 3Haḡe Jisas mwa bevea be, “Nam bevea lalai kimiu be bwero hiruga uhu nu vohai liu ninira duluai. 4Bwatuna kera rituai ran lai nora hogoi nin rosora gabe mwa hovi nin bilara; take kea, mwa lai duluai bilana kea gabe mwa rahu ginia.”
Jisas mwa Bev Luae be Vi Salan̄aiana na Imwa Tataro
(Mat 24.1-2; Mak 13.1-2)
5Ira roron̄tai ram avo huri Imwa Tataro, be nu sarisari bwatuna nu loliana gin vat lalavoa mai rau matan vatu be mwa laiana huri vilakasi gabe hogoi nan vataha atatu huri be Imwa Tataro vi haḡoan ginia. Jisas mwa bwaliura mwa bevea be, 6“Ginau duluai gim ḡitae--mahavana vi mai be vatu tiri vwate sihav togo te dum mulei la tanona; take kera duluai rav hovi vai ata.”
Ginau Hantai be Rav Loli
(Mat 24.3-14; Mak 13.3-13)
7Haḡe kera ram hudali Jisas be, “Vagahi mahavana vi mai kunhanigi? I hano vi loli be men lol seserai mahavana be men loli?”
8Haḡe Jisas mwa bwaliura mwa bevea be, “Giv gitaḡoro; nin ruruhiana. Bwatuna atatu ivusi rav mai lol ihaku rav vevea be, ‘Inau haḡea! Mahavana mwa mai haḡea!’ Take gisav hurira tehe. 9Gisav matagu tehe be gim ron̄ bwaloana sa roron ginau gabe rav loli amua, ta nogonana sigai radu.”
10Haḡe mwa bev rahurahuinia be, “Vanua rav bwalo ginginira, ute Ratahigi rav bwalo mulei ginginira. 11Sogai gaivua vi loli, maro mai harova vi dum vataha ute; vi vora ginau hantai maragai mai dovon̄ana lol mahao. 12Ginau kera geki rav loli amua, rav lai kimiu i rav lol bwarebware maragai kimiu, rav lin̄ kimiu be ramen vevegi kimiu lol imwa tataro, i be rav tau kimiu lol imwa vauvauhi; rav lai lua kimiu be giv tu lolmatan ira Ratahigi Lavoa maira tomuai huri ihaku.” 13“Geki haḡea vi vora mahavana huri kimiu be gimen vev lua Roroi Tavuha. 14Giv lol vatuvwai binihimiu amua nin mahavana vi mai huri be gisav binbinihi te huri hava avoana gabe giv vwaliura ginia; 15bwatuna Inau nav lai avoana i mataisao gabe giv avo aluna, gabe nomiu ivwalu rasav ivwalui te dum kimiu ginia, rasav tagara te dagai dum nomiu avoana. 16Ira tamamiu mai tuamiu mai ira ata la varamiu sage nomiu buluana; rav lin̄ kimiu i rav vevev bamate rituai. 17Haḡe kera duluai rav vev seburai kimiu bwatuna inau. 18Take nam bevea lalai kimiu be, ilu vwate ata lol bwatumiu sihav sala tehe nin tanona. 19Giv tu wasigi i giv varahu kimiu sibomiu.”
Jisas mwa Avo Huri Hano Gabe Vi Dum Ute Jerusalem
(Mat 24.15-21; Mak 13.14-19)
20“Batena giv gitae be atatun bwaloana rav dalis ute Jerusalem, giv iloe be uhugaha bwatutun vanua gea sihav n̄ava tehe vi masalan̄ai. 21Kunia kera gabe ram dogo Judia rav romaragai vai la vusi, kera gabe ram dogo la bwatutun vanua rav tomare, i kera gabe ram dogo la vanua rasav van te vai la bwatutun vanua. 22Bwatuna geki haḡea ‘Gubwen̄ vevev men visirai,’ ginau duluai gabe ravrava sabuga nu ravae huria. 23Hagavi lalainira ira vavine gabe ram dogo mai sibwen̄i i hahagavi lalainira ratahi mai naturigi gara! Ginau hantai vi dum vanua geki, i silo vevev non God vi mai alura sinombu. 24Tavalun atatu rai wehi bamatera gin buan bwaloana, i rituai rav laira vai lol imwa vauvauhi lol vanua duluai; i ira len̄len̄aga rav lai lua vanua Jerusalem vaivotu gubwen̄ira vi nogo.”
Maiana nin Nitun Atatu
(Mat 24.29-31; Mak 13.24-27)
25“Haḡe dovon̄ana vi visirai alun alo, vula, mai visiu. Lol ureure binihiva non sinombu rav hovi duluai, rav matagui dumdumwianan tahi mai rebu. 26Atatu rav mate mulei gin mataguana hohov hano gabe men visirai la lolmatan ureure, huri ginau muramura duluai ata la mahava rav tagara nin tanora. 27Kunia Nitun Atatu vi visirai lol ten lan̄i lol roron̄o gaivua mai sarisari. 28Haḡe mahavana be ginau kera uhu ram dau bwatuna be ramen loli, giv tu amare ba dada bwatuna nomiu varahuva mwa sosori.”
Silo Vagahi huri Bwatun Vig
(Mat 24.32-35; Mak 13.28-31)
29Haḡe Jisas mwa avo lalainira gin avoan dalogai huri gai vik mwa bevea be. 30“Mahavana be gim ḡita rauna be ram bavora ram sogainira gim iloe be mwa sosori gin mwagota. 31Kunia mulei, batena gim ḡita ginau kera geki ram loli, gim iloe be Rahuan Gara gabe God mwa Ratahigi ḡoro non sinombu alolona mwa abena be men visirai.”
32“Mwasigi nam bevea lalai kimiu be, tatan̄an varana uhu rav rahu radu vai votu ginau uhu rav loli duluai. 33Amare mai ureure vi nogo dagai; take noḡu avoana sihav nogo te dum.”
Mwa Du be Giv Mamata
34“Giv mamata ḡoro kimiu sibomiu! Gisav mahin̄a tehe be giv van lol ginaganian lalavoa tagaro i gisav mwin te maragai wai i gisav binbinihi tehe huri rahuana geki, bereva Gubwen̄imwa gim mai vilvilehi, 35kun vidi. Huri be vi lol sinombu lol ureure duluai. 36Giv mamata i giv tataro tagaro be rahumiu vi wasi be gimen van sivigi dum dagai nin ginau kera uhu gabe rav loli, i be giv tu dum la lolmatan Nitun Atatu.”
37Haḡe Jisas mwa bagahi duluai lol gubwen̄ kera gea lol Imwa Tataro, haḡe mwa sosori gin ute ravrav, kea mwa ban dagai be vi togo bon̄i duluai la vusin gai Oliv. 38Vataha mabon̄i sinombu ram ban be ramen roron̄tainia lol Imwa Tataro.
Obecnie wybrane:
Luk 21: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
