Jon Avoan Vevsera
Avoan Vevsera
Leo Tavuha gabe Jon nu Ravae mwa seserai lua Jisas be kea avoana non God vai tuai, “nu mai gi atatu i mwa dogo mai gida.” Kun mwa bevea lol buka be, Leo Tavuha geki nu ravana huri be ira hei rav vasogoe rav binihimwasigi be Jisas kea Varahu gabe nu tatauleo huria, kea Nitun God i huri be gin nora binihimwasigi garagusi alun Jisas mwa du be rav lai rahuana (20.31).
Atagun ravrav seserai gabe mwa dovon̄ai Jisas be kea Avoana non God vai tuai, Leo tavuha mwa dau bwatuna mwa bevuri huri ginau dan̄an̄a duluai gabe ram dovon̄ai Jisas be kea Varahu, Nitun God be nu tatauleo huria. Ataguna geki, avoana be ram dugu binihiva huri ginau dan̄an̄a gabe ran loli. Udun vevuri lol buka geki mwa bevea huri halana kun hanigi tavalun sinombu ram binihimwasigi alun Jisas i ram bora non roron̄tai, mahavana be rituai ram ivwaluinia i ram hav doron te be rav binihimwasiginia. Tavaluna 13-17 nu ravana huri bulbuluana non Jisas maira non roron̄tai lol bon̄i gabe ran haḡo batugehia alolona i non avoan dura lalainira lol ravrav amua non mateana.
Nogonan tavaluna dodolua mwa bevea liuhage be kun hanigi ran haḡo batugehi Jisas, i ram bevegia, huri non mateana alun volovolo i non tomarean mulei i non visiraiana abera non roron̄tai atagun non tomarean mulei.
Huri vavine be mwa bevegiana huri be mwa ḡalau tatauleon lagiana (8.1-11) ravrav seserai huria mwa dogo lol ara bwatuna be buka ata tuai ivusi i rituai be nu rav leahiana tuai nu hav ravana tehe na vevuri gea alolora, ta kera rituai n̄an ran ravae lol ute dodolua.
Jon mwa bagahi maragai alun hogoi huri rahuana vai tuai sivi Kraes, hogoi gabe mwa dau bwatuna kadogaha, i lalai irahei gabe ram lai Jisas be kea matanhala, mwasigi i rahuana. Ginau dan̄an̄a huri Roroi Tavuha gabe Jon nu ravae mwa dari non silo vagahi alun ginau ata lol rahuana ata garigi kun wai, bereti, gigita, radaiḡoro sipsip i vwain taligaon waen i ram huhui huri ginau ata lol vui.
Ududun buka geki
Bwatun Avoana (1.1-18)
Jon Garuhisabuga mai ira muan roron̄tai non Jisas (1.19-51)
Lalaḡova non Jisas (2.1–12.50)
Ira nogonan gubwen̄in Jisas mwa abena lol vanua Jerusalem (13.1–19.42)
Tomarean mulei i visiraiana non Ratahigi (20.1-31)
Nogonan Leo Tavuha: visiraiana mulei Kalili (21.1-25)
Obecnie wybrane:
Jon Avoan Vevsera: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific