Jon 9
9
Jisas mwa Lol Bugeri matan Atatu gabe nu Vora Ta kea Matagara
1Mahavana be Jisas mwa lago mwa ḡita atatu vwate gabe nu vora ta kea matagara. 2Haḡe non roron̄tai ram hudalinia be, “Vagahi, vuron hei gea gabe mwa lolia mwa bora ta kea matagara? Vurona sibona sage vuron tamana i ratahina?”
3Jisas mwa bwaliura mwa bevea be, “Matagarana mwa hav bulus te vurona sage vuron tamana i ratahina. Kea mwa matagaraga be muramura non God vi gitana la rovoga aluna. 4Mwa du be tav lol rahurahui rovoga non wani gabe nu horau, tav lolia vataha rani; bwatuna be ute bon̄i mwa sosori, mahavana be atatu vwate sihav mom lol te dum rovoga. 5Mahavana be inau teti lol ureure inau haḡea gigita huri ureure.”
6Ataguna be Jisas mwa bev ginau geki, kea mwa lodo lol tano i mwa lol tano mwa biliga gin lodona; haḡe mwa rahai bili la matan wani gea, 7i mwa bevea lalainia be, “Van ba bwaga matamwa lol waitogo Sailom.” (Iha geki binihiva be “Horae”.) Haḡe kea mwa bano, mwa bwaga lolmatana, i mwa dabagilu mwa ḡita ute.
8Haḡe ata la vanuana rituai mai atatu rituai gabe ran gitae be nu to mwa uraura gana amua, ram hudaligi be, “Barabe wani uhu be nu to mwa uraura gana?”
9Atatu rituai ram bevea be, “Kea haḡea,” take rituai ram bevea be, “Sigai, mwa hav vora te kea, ta nuḡun kea n̄an.”
Take wani gea mwa bevea sibona be, “Inau haḡea.”
10Ram hudalinia be, “Matuke gom ḡita dum ute kunhanigi?”
11Haḡe mwa bwaliura be, “Atatu be ihana Jisas mwa lol bili, mwa rahainia la mataku saraḡo i mwa bevea lalaiau be nav vano vai Saelom ba bwaga lolmataku. Haḡe kunia nam bano, i mahavana be nam bwaga lolmataku, nam ḡita darihou ute.”
12Ram hudaligi be, “Kea halabehe?”
Take mwa bwaliura be, “Nam len̄a.”
Ira Varise ram Bihiḡehiḡe huri Lol Barahu
13Kunia ram lai wani gabe amua kea nu matagaraga vai aben ira Varise. 14Gubwen̄i be Jisas nu rahai bili la matan matagara i ramuru mavugeri, kea gubwen̄ Mambuharai. 15Haḡe ira Varise, ram hudali muleinia be kunhanigi mwa ḡita mulei ute. I kea mwa bevea lalainira be, “Kea nu raharahai bili la mataku saraḡo, vuvuri nam bwaga lol mataku, i kadogaha nam ḡita mulei ute.”
16Haḡe ira Varise rituai ram bevea be, “Wani gabe nu lol ginau geki mwa hav vora te atatu non God bwatuna be nu hav tabe te silon gubwen̄ mambuharai.”
Take rituai ninira ram bevea be, “Kunhanigi be atat vuroga vi lol dum ginau dan̄an̄a kun ira geki?” Haḡe kunia harabora mwa dogo lol davolana.
17Haḡe ira Varise ram mom hudali mulei wani gea, ram bevea be, “Gom bevea be nu lol bugeri matamwa be kunia, giḡo gom bev haninia huri wani gea?”
Haḡe kea mwa bwaliura mwa bevea be “Kea atatun vevsera vwate.”
18Take ira lavoa non ira Jius ram hav doron te didi binihimwasigi be kea matagara i kadogaha kea mwa ḡita ute, vaivotu be rav uloi tamana mai ratahina, 19i rav hudalinira be, “Geki mwasigi nitumiru? Giru vi vevea be kea nu vora gi matagara? Be kunia mwasigi, kunhanigi be kea mwa ḡita dum ute kadogaha?”
20Haḡe ramuru bwaliura be, “Gamuru iloe mwasigi be kea nitumaru, i gamuru iloe mwasigi be kea nu vora gi matagara vatuvwai. 21Take gamuru hav iloe tehe be kunhanigi, be kea mwa ḡita dum ute kadogaha. Sage gamuru hav iloe tehe be ihei nu lol bugeri matana. Gin hudalinia; kea atat gaivua haḡea huba, vi vwaliu dum avoana mahaḡea sibona!” 22Tamana mai ratahina ramuru bevea kungeki bwatuna be ramuru matagun ira lavoa non ira Jius huri be ran vev tuhia huba be, ihei tehe vi vevea be Jisas kea Kraes, wani gea rav tau dagainia avare nin imwa tataro. 23Haḡe bwatuna gea tamana mai ratahina ramuru bevea be, “Kea atat gaivua haḡea huba; gin hudalinia!”
24Haḡe ram mom mai mulei varuana aben wani gabe nu vora ta kea matagara, i ram bevea lalainia be, “Gov tatauleo lolmatan God huribe goi vev mwasigi! Gam iloe be wani geki be nu varahugo kea atat vuroga.”
25Haḡe mwa bwaliura mwa bevea be, “Nam hav iloe tehe be kea atat vuroga sa sigai, ta nam iloe be nan matagaraga ta kadogaha nam ḡita ute.”
26Haḡe ram hudalinia be, “Nu lol hano lalainigo? I nu lol tavuhai hanini matamwa?”
27Haḡe wani gea mwa bwaliura mwa bevea be, “Nan vevea huba lalai kimiu, take gim hav ron̄oe tehe. Matu gim doron be giv ron̄ muleinia huri hano? Bisata kimiu mulei, gim doron be giv vora non roron̄tai?”
28Haḡe ram lolhoroinia ram bevea be, “Giḡo ha vwate roron̄tai non wani gea; kamai ira roron̄tai non Moses. 29Gam iloe be God nu avo mai Moses; i huri wani gea, gam hav iloe te n̄an haḡea be kea mwa mai nin behe!”
30Take wani gea mwa bwaliura be, “Ginau dan̄an̄a uhu! Huri be gim len̄a be mwa mai behe take kea nu lol bugeri mataku. 31Tam iloe be God mwa hav roron̄tai te ira atat vuroga; kea mwa roron̄tainira gabe ram binihi marahinia i ram lol hano gabe mwa doronira be rav lolia. 32La bwativun ureure vaivotu garigi mwa hav ron̄oana te hohoigi be atatu vwate mwa lol bugeri matan matagara. 33Vaivotu be wani gea mwa mai nin God, sa be sigai sihav lol te dum ginau vwate.”
34Haḡe ram bwaliu muleinia be, “Giḡo gon vora i gom mauri hae lol vuro i kadogaha gom lol ron̄oe be gomen vagahi kamai?” Haḡe ram dau dagainia nin imwa tataro.
Binihira Kun Atatu Matagara
35Jisas nu ron̄oe be ran vohai dagainia. Haḡe batena be mwa habwea mwa bevea lalainia be, “Matuke gom binihimwasigi alun Nitun Atatu?”
36Haḡe atatu gea mwa bwaliua, mwa bevea be, “Ratahigi, gomen vevea lalaiau be kea ihei, huri be nai vinihi mwasiginia!”
37Take Jisas mwa bwaliua be, “Gom ḡitae huba, i wani gea kea haḡea be mwa avo maigo kadogaha.”
38Haḡe wani gea mwa bevea be, “Nam binihimwasigi, Ratahigi!” I mwa sisiabwau ḡoro lolmatan Jisas.
39Haḡe Jisas mwa bwaliua be, “Nan mai lol ureure geki huri vevegi, huribe ira matagara rav gita ute i kera be ram ḡita ute rav matagaraga.”
40Haḡe ira Varise rituai gabe ran tu aia bul maia ran ron̄oe be mwa bevea kun geki ram hudalinia ram bevea be, “Matu kamai mulei gai matagaraga, mwasigi?”
41Jisas mwa bwaliura mwa bevea be, “Be kimiu gim matagaraga, kunia gin hav hantai tehe; take huribe gim bevea be gim ḡita ute, kunia gin binihiva be kimiu gim bahala radu.”
Obecnie wybrane:
Jon 9: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
