UTOM MME APOSTLE 21

Paul Aka Obio Jerusalem

1EDIKEM ke ima ikɔkpɔŋ mmɔ isio, nnyin iwat nnen-nnen, idisim Cos; ke ndaŋ-nsiere nnyin isim Rhodes, inyuŋ ito do ikosim Patara: 2ndien sia ikutde ubom eke oyomde ndibe ŋka Phoenicia, idiere ke esit, isio. 3Ke ini ikutde Cyprus, ibe ikpɔŋ enye ke ubɔk ufien, iwat ika Syria, inyuŋ ibehe ke Tyre: koro do ke enyene ndisioŋo se idude ke ubom. 4Nnyin ikut mbet, inyuŋ idaŋ do ke usen itiaba: mmɔ emi enyuŋ edɔhɔ Paul ke odudu Spirit ete, enye okudigi ikpat ke Jerusalem. 5Edikem, ke ini mme usen oro ebede, nnyin idaha ika iso ke isaŋ nnyin; ndien kpukpru mmɔ, ye iban ye nditɔwɔŋ, eda nnyin ekeyak ke usuŋ, tutu nnyin iwɔrɔ ikpɔŋ obio: nnyin inyuŋ itɔŋɔ edɔŋ ke esuk ibɔŋ akam, inyuŋ ikɔm kiet eken saŋa suŋ; ntre nnyin idiere ke ubom, 6edi mmɔ efiak enyɔŋ ufɔk.

7Ekem ke ini nnyin itode ke Tyre isim Ptolemais, uwat nnyin okure do; ndien nnyin ikɔm nditɔ-ete, idaŋ ye mmɔ usen kiet. 8Ndien ke ndaŋ-nsiere nnyin idaha do idi ke Caesarea, inyuŋ iduk ke ufɔk Philip evangelist (emi edide kiet ke otu owo itiaba oro ekemekde), ikadaŋ ye enye. 9Owo emi enyene nditɔ-iban inaŋ, emi midɔhɔ ndɔ, emi etiŋde prophecy. 10Nte nnyin itiede do ibigi, prophet kiet, emi ekerede Agabus, oto ke Judaea ɔsuhɔre edi. 11Enye asaŋa edi ke ɔtɔ nnyin, onyuŋ emen mbɔbɔ Paul ɔbɔp idem esie ukot ye ubɔk, ete nnyin, Edisana Spirit ɔdɔhɔ ete, Ntem ke mme Jew emi edude ke Jerusalem edibɔp owo emi enyenede mbɔbɔ emi, enyuŋ eyak enye esin mme Gentile ke ubɔk. 12Edi ke ini nnyin ikopde ŋkpɔ emi, nnyin ye mme andiduŋ edem oro ibeŋe Paul, ite enye okudɔk aka ke Jerusalem. 13Edi Paul ɔbɔrɔ ete, Nsinam mbufo etuaŋade, enam esit ɔduɔ mi? Mmebeŋe idem ndiduk ŋkpɔkɔbi, ndiyuŋ ŋkpa ke Jerusalem kabaŋa enyiŋ Ɔbɔŋ Jesus. 14Ndien sia enye minyimeke ndikop nnɔ nnyin, nnyin idop uyo, idɔhɔ ite, Yak edi nte Ɔbɔŋ onyimede.

15Ekem ke mme usen emi ema ekebe, nnyin itaŋ mkpoduoho nnyin, idɔk ikaka ke Jerusalem. 16Ndusuk mbet emi etode ke Caesarea esaŋa ye nnyin ŋko eka; mmɔ enyuŋ eda nnyin eduk ke ufɔk Mnason owo Cyprus, akani mbet, emi nnyin ididaŋde ke ufɔk esie.

17Ke ini nnyin isimde Jerusalem, nditɔ-ete edara nnyin. 18Ndien ke ndaŋ-nsiere Paul asaŋa ye nnyin aka ndise James; kpukpru mbiowo enyuŋ edu do. 19Ndien ke enye ama ɔkɔkɔm mmɔ, enye emen kpukpru ŋkpɔ eke Abasi akadade enye anam ke otu mme Gentile obuk ɔnɔ mmɔ ke itie ke itie. 20Ke adaŋemi mmɔ ekopde, mmɔ enɔ Abasi itoro. Ndien mmɔ edɔhɔ enye ete, Eyen-ete nnyin, omokut adaŋa uwak thousand owo emi enimde ke akpanikɔ edu ke otu mme Jew; kpukpru mmɔ edi owo emi enyenede ɔkpɔsɔŋ ufup ebaŋa ibet: 21ndien ekabaŋa fi enɔ mmɔ, ete afo ekpep kpukpru mme Jew emi eduŋɔde ke otu mme Gentile ete, ekpɔŋ Moses, onyuŋ ɔdɔhɔ mmɔ ete ekunim nditɔ mmɔ mbobi, ekunyuŋ enim mme ido emi ekam esinimde. 22Edinam didie ndien? mmɔ iditreke ndikop ete afo emedi. 23Nam ndien nte itemede fi; nnyin imenyene owo inaŋ mi emi ekaŋade akaŋa; 24dian idem ye mmɔ, nyuŋ tiene mmɔ nam idem fo asana, nyuŋ nɔ okuk ke ibuot mmɔ, man mmɔ ekeme ndikporo idet mmɔ. Ntem ke kpukpru owo eyefiɔk ete, se etiŋde ebaŋa fi idige akpanikɔ, edi ete afo ke idem fo ototim asaŋa onyuŋ onim ibet. 25Edi ama edi mme Gentile emi enimde ke akpanikɔ, nnyin ima iwewet, inɔ uyo ite, mmɔ edianare ekpɔŋ se ewade enɔ ndem, ye iyip, ye se eyiride yiri, ye use. 26Ntem Paul adian idem ye mbon oro; ndien ke ndaŋ-nsiere enye etiene mmɔ anam idem esie asana, onyuŋ oduk ke temple, akasian ete imɔ iyenim mme usen erinam idem asana, tutu ewa uwa ke ibuot kpukpru mme imɔ kiet kiet.

27Ke usen itiaba oro ekperede ndikure, mme Jew emi etode ke Asia ekut enye ke temple, enyuŋ edemere ofuri otu owo oro, enyuŋ emum enye, esio mkpo, ete, Mbio Israel, edi ediŋwam nnyin. 28Emi edi owo oro ekpepde kpukpru owo ke kpukpru ebiet ete, eŋwana ye mbio-obio ye ibet ye ebiet emi: enye omonyuŋ ada mme Greek oduk ke temple ŋko-ŋko edisabare edisana ebiet emi. 29Koro mmɔ ema ekokut Trophimus, owo Ephesus, nte asaŋade ye enye ke obio; ntre ke mmɔ ese ete Paul akada enye oduk ke temple. 30Ofuri obio otimere, mbio-obio enyuŋ efeŋe ekebono ɔtɔ kiet: mmɔ enyuŋ emum Paul eduri enye ewɔrɔ ke temple: enyuŋ eberi usuŋ ini kiet. 31Edi nte mmɔ eŋwanade ndiwot enye, eda etop esɔk akamba etubom mbon-ekɔŋ, ete, Ofuri Jerusalem odu ke ndutime. 32Kpa idaha oro enye ada mbon-ekɔŋ ye mme centurion efehe ɔsuhɔre ebine mmɔ: ndien ke ini mbio-obio ekutde akamba etubom-ekɔŋ ye mbon-ekɔŋ, mmɔ etre nditim Paul. 33Ekem akamba etubom-ekɔŋ asaŋa ekpere omum enye onyuŋ ɔnɔ uyo ete, eda ŋkpɔkɔbi iba ekɔbi enye: onyuŋ obup ete, Enye edi anie? 34Enye anam nso? Ndusuk mmɔ efiori ete ntem, ndusuk eken efiori ete ntem: ndien sia ndutime miyakke enye ekeme ndifiɔk ntak ŋkpɔ, enye ɔnɔ uyo ete, eda Paul eduk ke ufɔk mbon-ekɔŋ. 35Edi ke ini Paul osimde udigi-ukot, mbon-ekɔŋ eyememen enye ke ntak eridama emi otu edamade: 36koro ediwak mbio-obio ebine enye efiori ete, Men enye fep.

37Ndien ke ini eyomde ndida Paul nduk ke ufɔk mbon-ekɔŋ, enye ɔdɔhɔ akamba etubom-ekɔŋ ete, Mme eyenyime ntiŋ ikɔ nnɔ fi? Enye oro ete enye, Nte afo ɔmɔfiɔk usem Greek? 38Nte afo udige eyen Egypt oro ekedemerede thousand mme edue-obom inaŋ, ada mmɔ ɔwɔrɔ ɔnyɔŋ ke desert? 39Edi Paul ɔdɔhɔ ete, Ndi Jew, nto ke Tarsus ke Cilicia, ndi owo eke ntode ke akwa obio: ndien mmebeŋe nte afo ayak ntiŋ ikɔ ye mbio-obio. 40Ndien ke ini enye onyimede, Paul ada ke udigi-ukot enyeŋe mbio-obio ubɔk; ndien ke ini uyom odobode eti-eti, enye etiŋ ikɔ ye mmɔ ke usen Hebrew, ete,

Obecnie wybrane:

UTOM MME APOSTLE 21: ENA

Podkreślenie

Udostępnij

Kopiuj