UTOM MME APOSTLE 19

Paul Aka ke Obio Ephesus

1EDIKEM, ke adaŋemi Apollos odude ke Corinth, Paul asaŋa ke edere-edere ebe, ɔsuhɔre edi ke Ephesus, onyuŋ okut ndusuk mbet do; onyuŋ obup mmɔ ete, 2Nte mbufo ekebɔ Edisana Spirit ke ini enimde ke akpanikɔ? Edi mmɔ ete enye, Baba! akananam nnyin ikopke ite Edisana Spirit odu. 3Enye ete mmɔ, Ekenim mbufo nso oruk baptism? 4Mmɔ ete, ke esit baptism John. Paul ɔdɔhɔ ete, John okonim owo baptism erikabare esit, onyuŋ ɔdɔhɔ mbio-obio ete, ebuɔt idem ye Enye emi etienede imɔ ke edem, oro edi, Jesus. 5Edi ke adaŋemi mmɔ ekopde emi, mmɔ ena baptism ke esit enyiŋ Ɔbɔŋ Jesus. 6Ndien ke Paul ama okodori mmɔ ubɔk, Edisana Spirit edi edidoro mmɔ ke idem; mmɔ enyuŋ esem nsio-nsio usem, enyuŋ etiŋ prophecy. 7Ndien ibat mmɔ kpukpru ekpere ndisim owo duopeba.

8Edi Paul oduk ke synagogue, onyuŋ ɔkwɔrɔ ikɔ ye uko ke ɔfiɔŋ ita, ebuen ikɔ ye mme owo, onyuŋ ɔnɔ mmɔ item abaŋa Ubɔŋ Abasi. 9Edi ke ini ndusuk mmɔ esɔŋde esit enyuŋ etutde utɔŋ, enyuŋ etiŋde idiɔk ebaŋa Usuŋ Ɔbɔŋ ke iso mbio-obio, Paul ɔkpɔŋ mmɔ, adianare mbet ye mmɔ, adaha ebuen ikɔ kpukpru usen ke ufɔk-ŋwed Tyrannus. 10Enye anam ntem isua iba: ntre ke kpukpru mme andiduŋ Asia, emi edide Jew ye emi edide Greek, ekop ikɔ Ɔbɔŋ. 11Ndien Abasi ada ubɔk Paul anam mme utibe-ŋkpɔ akwa odudu: 12tutu mme owo eda ukwɔhɔre-inua ye mbɔbɔ emi etode enye ke idem esɔk mbon udɔŋɔ, ndien mme udɔŋɔ ekpɔŋ mmɔ, mme idiɔk spirit enyuŋ ewɔŋɔ mmɔ ke idem.

13Edi ndusuk nyoŋ Jew, emi edide mbia-idiɔŋ, eŋwana nditaŋa enyiŋ Ɔbɔŋ Jesus nnɔ mme mmɔ eke enyenede mme idiɔk spirit; ete, Mmada Jesus emi Paul ɔkwɔrɔde ŋwuk fi. 14Mkparawa itiaba (mmɔ edi nditɔ Jew kiet emi ekerede Sceva akwa oku) ke enanam ntem. 15Edi idiɔk spirit ɔbɔrɔ mmɔ ete, mmɔfiɔk Jesus, mmonyuŋ mbure Paul; edi mbufo edi mme anie? 16Ndien owo emi idiɔk spirit odude enye ke idem ɔfrɔ ɔkɔtɔ mmɔ, akan mmɔ mbitiaba, akara mmɔ, tutu mmɔ eda unan efeŋe iferi ewɔŋɔ ke ufɔk. 17Kpukpru mme Jew ye mme Greek emi eduŋde ke Ephesus enyuŋ ekabare efiɔk ŋkpɔ emi; ndik onyuŋ odoro kpukpru mmɔ, mme owo enyuŋ ekpono enyiŋ Ɔbɔŋ Jesus. 18Ediwak mmɔ emi enimde ke akpanikɔ enyuŋ edi editiŋ enyuŋ eyarare se mmɔ ekenamde, 19Ndien ediwak mmɔ emi ekam ebrede idiɔŋ etaŋ ŋwed mmɔ edi edifɔp ke iso kpukpru owo; enyuŋ ebat ekɔm-urua mmɔ ekut ete ɔwɔrɔ thousand pounds kiet ye ikie itiaita. 20Ntem ke ikɔ Ɔbɔŋ ɔkɔri ɔkpɔsɔŋ, onyuŋ akara.

21Ekem ke ŋkpɔ emi ema ekebe, Paul aduak ke spirit esie, ete iye-saŋa ke Macedonia ye Achaia ibe ika ke Jerusalem. Enye ete, Mma nsim do, nnyene ndika ŋkokut Rome ŋko. 22Ntre ke enye osio Timothy ye Erastus, owo iba ke otu mmɔ emi enamde ŋkpɔ enɔ enye, ɔdɔŋ ke Macedonia; edi enye ke idem esie osuk etie kaŋa ke Asia.

23Edi ke adaŋa ini oro, akwa ndutime otibe abaŋa Usuŋ. 24Koro owo kiet emi ekerede Demetrius, ɔsɔi silver, ɔkɔ utom uwak-uwak ɔnɔ mme anam-usɔ ke erinam mbiet temple Diana ke silver. 25Enye okot mmɔ oro, ye kpukpru mmɔ eŋwen eke enamde oruk ubɔk-utom oro, obon ɔtɔ kiet, onyuŋ ɔdɔhɔ mmɔ ete, Mbɔŋ owo, mbufo emefiɔk ete inyene nnyin oto ke ubɔk-utom nnyin emi ɔwɔrɔ. 26Mbufo emenyuŋ ekut enyuŋ ekop ete, idige ke Ephesus ikpɔŋ-ikpɔŋ, edi ayak esisit ke ofuri Asia nde, Paul emi ama ada ndutiŋ esie oduri ediwak owo ada, ekpep ete mme abasi, eke owo anamde ke ubɔk, idige Abasi. 27Ndien ayak esisit ubɔk-utom nnyin emi eyewɔrɔ ikpikpu; inyuŋ ikureke do, edi enyuŋ esin temple Diana akwa abasi-aŋwan ke ndek, enyuŋ edorore enye, emi ofuri Asia ye ererimbot okponode, ke akwa itie ubɔŋ esie esuhɔre enim. 28Ke ini mmɔ ekopde ikɔ emi, mmɔ eyɔhɔ ye ifuresit, esio mfiori ete, Diana mbon Ephesus omokpon! 29Ndien ndutime ɔyɔhɔ ke obio: mmɔ enyuŋ emum Gaius ye Aristarchus, mbio Macedonia emi esaŋade ye Paul, ebumere ye esit kiet ekeduk ke akwa efe ndise. 30Edi ke ini Paul oyomde ndidaha nduk ntiene mbio-obio, mbet inyimeke inɔ enye. 31Edi ndusuk ikpɔ mme andikara Asia, emi edide mme ufan esie, enyuŋ edɔŋ ekekpe ye enye, ete enye okuduk ke efe oro. 32Ndien ndusuk mbio-obio efiori ete ntem, ndusuk efiori ete ntem: koro esop otimerede; akamba ubak mmɔ inyuŋ ifiɔkke ntak eke mmɔ edide edisobo ntre. 33Ndusuk mbio-obio ese ete edi ke ntak Alexander, sia mme Jew enukde enye ɔwɔrɔ ke iso. Edi Alenxander enyeŋe ubɔk, oyom ndikaŋ idem nnɔ mbio-obio. 34Edi ke ini mmɔ efiɔkde ete enye edi Jew, kpukpru mmɔ esio mkpo ke hour iba efiori ke uyo kiet ete, Diana mbon Ephesus omokpon! 35Edi ke ini ewet-ŋwed obio ama okosuk otu owo oro esit, enye ɔdɔhɔ mmɔ ete, Mbufo mbon Ephesus, anie odu mi eke mifiɔkke ete obio Ephesus edi andise mbaŋa temple akwa Diana, ye mbiet emi otode Jupiter ɔduɔ ke isɔŋ? 36Sia owo mikemeke ndineni se ntiŋde, mbufo ekposuk esit, ikponyuŋ ibumekere inam ŋkpɔ. 37Mbufo emada owo emi edi mi, kpa ke ini mmɔ miwoho ŋwo ke mme temple, minyuŋ isueneke abasi nnyin aŋwan. 38Edieke Demetrius ye mme anam-usɔ emi edude ye enye enyenede ikɔ ye owo ekededi, ufɔk-ikpe ana iŋwaŋ, mme andikara mmɔdo ŋko: yak mmɔ ekot kiet eken ikpe. 39Edi edieke edide ŋkpɔ eŋwen ke mbufo eyom, edibiere oro ke esop emi odude ke ini ke ini. 40Ke akapnikɔ mmefehe ndik nte eyebiom nnyin ikɔ kabaŋa ndutime mfin emi, sia minyeneke ntak; koro nnyin mikemeke ndinɔ ntak erisobo nnyin mi. 41Ke enye ama eketiŋ ntem, enye asuan esop.

Obecnie wybrane:

UTOM MME APOSTLE 19: ENA

Podkreślenie

Udostępnij

Kopiuj