Mateyo 4

Kwelekeshewa kwa Yesu

(Maliko 1:12-13; Luka 4:1-13)

1Calakonkapo, Mushimu Uswepa walamutwala Yesu ku cinyika kuya kwelekeshewa ne Muyungaushi. 2Kwa masuba makumi ana, munshi ne mashiku,Yesu walikulikanisha kulya, neco walanyumfwa nsala. 3Muyungaushi walesa kulyendiye walambeti, “Na njamwe Mwanendi Lesa, ambilani mabwe awa asanduke abe shinkwa.” 4Nomba Yesu walambeti, “Kwalembweti muntu nkelela kuba ne buyumi ne shinkwa enka sobwe, nsombi ne Maswi onse ngalambanga Lesa.”

5Panyuma pakendi, Muyungaushi walamutwala Yesu ku Yelusalemu, mushi waswepa, ne kumutantika pelu pa Ng'anda ya Lesa, 6ne kumwambileti, “Na cakubinga njobe Mwanendi Lesa, kolilasha panshi, pakwinga kwalembweti,

“Lesa nambile bangelo bese bakubake

kwambeti, myendo yakobe

kaitapunta pamabwe.”

7Nendi Yesu walambeti, “Kwalembweti, ‘Kotamwelekeshanga Nkambo Lesa wakobe.’ ”

8Pakupwililisha, Muyungaushi walamumanta Yesu ne kuya kumutantika pa mulundu utali, ne kumulesha bwendeleshi bonse bwa pacishi capanshi ne bulemu bwabo. 9Satana walambeti, “Byonse ibi nindikupe na usuntaminekowa, ne kunkambilila.” 10Apa lino Yesu walambeti, “Fumapa, Satana! Mabala alambangeti, ‘Welela kukambilila Nkambo Lesa wakobe, ne kumusebensela enka.’”

11Popelapo Muyungaushi walamushiya Yesu. Neco bangelo balesa kumunyamfwilisha Yesu.

Yesu latatikinga incito yakendi mu Galileya

(Maliko 1:14-15; Luka 4:14-15)

12Lino Yesu mpwalanyumfweti, Yohane lasungwa mu jele, walaya ku Galileya, 13walaleka kwikala ku Nasaleti, walaya kwikala ku Kapelenawo, munshi walikuba mumbali mwa lwenje lwa Galileya, mucibela ca Sebuloni ne Nafitali. 14Ici calenshika, kukwanilisha calambwa kupitila mushinshimi Yesaya, uyo walambeti,

15“Obe cimpansha ca Sebuloni, nenjobe cishi ca Nafitali,

kunshila yaku lwenje, patala pa Yolodani,

obe Galileya, cimpansha ca bantu babula kuba Bayuda!

16Bantu bekala mu mushinshe

ni bakabone mumuni unene.

Bantu bekala mucishi ca mufunsha wa lufu,

mumuni ulababonekele.”

17Kufuma cindi copeleco, Yesu walatatika kukambauka kambeti, “Shiyani bwipishi bwenu, pakwinga Lesa ulipepi kwikalika Bwami bwakendi.”

Yesu lakunga basulishi banswi bana

(Maliko 1:16-20; Luka 5:1-11)

18Yesu mpwalikwenda mu mbali mwa lwenje lwa Galileya, walabona bantu babili pabukwabo, Shimoni walikukwiweti Petulo, ne Ndileya mukwabo, kabekata inswi mulwenje ne tombe twabo, pakwinga balikuba basulishi banswi. 19Yesu walabambileti, “Nkonkeleni, ndimwiyishe kuba basulishi ba bantu.” 20Popelapo balashiya tombe twabo ne kuya nendi.

21Mpwalendako pang'ana walabona nabambi babili pabukwabo Jemusi ne Yohane, banabendi Sebedayo balikuba mu bwato pamo ne mushali wabo kababamba tombe twabo. Yesu walabakuwa. 22Popelapo balashiya bwato ne baishi nekuya neYesu.

Yesu leyishinga bantu, kukambauka ne kusengula

(Luka 6:17-19)

23Yesu walendana mucimpansha conse ca Galileya, kaya kwiyisha mu manda akupaililamo ne kukambauka Mulumbe Waina ulambanga sha Bwami, nekusengula bantu balikukute malwashi apusana pusana ne bulema bwapusanapusana. 24Mpuwo yakendi yalamwaikila mucishi conse ca Siliya, cakwinseti bantu balikabaleta balwashi bonse balikupenga ne malwashi ne bishikubaba byapusana pusana, ne bekatwa ne mishimu yaipa ne balwashi atushita kayi ne balema. bonse walikubasengula. 25Bantu bangi balikumukonkela kufuma ku Galileya, kucibela calikukwiweti Minshi Likumi, ne kuYelusalemu, neku Yudeya, kayi ne mucibela cakutala kwa mulonga wa Yolodani.

Obecnie wybrane:

Mateyo 4: SBT

Podkreślenie

Udostępnij

Kopiuj