IOANE 6
6
Ko te Fagaiga ne Iesu te Limaafe
(Mata 14.13-21; Male 6.30-44; Luka 9.10-17)
1Mai tua ifo o mea konei, fano ei a Iesu ki te isi feitu o te namo o Kalilaia, io me ko te namo o Tipelia. 2Ka ko tau'tali atu i a ia a tino e tokouke, i te mea ne kilo'kilo latou ki galuega fakaofoofogina ne fai ne ia ki tino ma'saki. 3Ne fano a Iesu ki luga i te mauga, ne nofo ki lalo fakatasi mo ona soko. 4Ko pili te Paseka ko te 'kaiga faka-Iutaia. 5Ne fakapela ake mata o Iesu, lavea ei ne ia a tino e tokouke e o'mai ki a ia, ana muna ki a Filipo, “Tefea te koga ka mafai ei ne tatou o 'togi mai ne falaoa, ke 'kai ei tino konei?” 6A te muna tena a Iesu, se muna tofotofo fua, i te mea ko oti ne iloa ne ia tena mea ka fai. 7Ne tali atu a Filipo, “Kafai e togi mai ne falaoa ki se lua selau tupe siliva,#6.7: Te tupe siliva: A te tupe siliva ko te togi i te aso o te tino galue (onoono ki te Mata 20.2) ko te mea ke tofu te tino mo ne mo mea, e se lava.” 8Ko tena soko e tokotasi, ko Anitelea, ko te taina o Simona Petelu ana muna, 9“E isi se tamaliki tenei e isi ne ana puta falaoa e lima, mo ika fo'liki e luagamata; kae se a te aoga o mea kona ki tino tokouke konei?” 10Muna a Iesu, “Fai atu koutou ki tino ke 'nofo ki lalo.” A te koga tena, se koga moukua. Tela, nofo ei ki lalo a tino; kati ko te limaafe te aofaki o tino. 11Ne puke ne Iesu a falaoa, kae ne fai te fakafetai, tela tufa atu ei ki tino kola e 'nofo i lalo. Ne fai foki pena ki ika; ne tufa atu ki te mea e ma'nako ki ei latou. 12Ko ma'kona katoa latou, tela, fai atu ei a Iesu ki ona soko, “Fakamaopoopo katoa a mea ne 'toe, ke seai eiloa se mea e fakamaumau.” 13Tela, fakamaopoopo ei ne latou e tusa mo te sefulu lua tapola ne 'fonu i mea ne 'toe mai puta falaoa e lima; ko mea kona ne toe mai i te ma'konaga o tino kola ne 'kai.
14Ko iloa ne tino kona te fakailoga ne fai ne Iesu, fai ake ei olotou pati, “E tonu eiloa, ko te Pelofeta tenei ko vau ki te lalolagi.” 15Ko iloa foki ne Iesu, me ka o'mai latou o puke fakamalosi a ia mo fai te lotou tupu; tela, toe foki ei a ia tokotasi ki te mauga.
Ko Sasale Iesu i Luga i te Vai
(Mata 14.22-33; Male 6.45-52)
16Ko oko ki te afiafi, olo ifo ei ona soko ki te namo. 17Ne sopo ki luga i te poti, kae ne folau ki Kapanaumi i te isi feitu o te namo. Ko pouli, kae ka seki oko atu eiloa a Iesu ki a latou. 18Ko sou te namo, i te matagi ko agi malosi. 19Ne pūlu te lotou poti, kati ko te tolu io me ko te fa maila, ka ko lavea atu ne latou a Iesu e sasale i luga i te namo, kae gasolo o fakapilipili mai ki te lotou poti; kae ne ma'taku latou. 20Ne faipati atu a ia ki a latou, “Sa ma'taku, me ko au eiloa tenei.” 21Tela, fakasopo eiloa ne latou a ia mo te fiafia ki luga i te poti; kae ne oko fakavave te poti ki te koga ne olo latou ki ei.
Ko Salasala Tino ki a Iesu
22I te taeaoakega, ne lavea ne tino e tokouke kola ne 'tu i te isi feitu o te namo, me ko seai ake foki se poti i te koga tena, kae na ko te poti tela ne olo ei soko o Iesu; ka ko Iesu ne seki olo fakatasi mo ona soko i te poti, me ko ona soko fua ne olo i ei, 23kae isi ne poti ne o'mai mai Tipelia, e pili ki te koga ne 'kai ei latou, i te palelega o te fakafetai ne fai ne te Aliki. 24I te iloaga ne tino i a Iesu e galo, pela foki mo ona soko, ne 'sopo ei latou ki poti o olo ki Kapanaumi o 'sala Iesu.
A Iesu ko te Falaoa o te Ola
25Kae i te mauaga ne latou a ia i te isi feitu o te namo, olotou muna ki a ia, “Te Faiakoga, ne vau koe anafea ki konei?” 26Ne tali atu a Iesu ki a latou penei: “Au e muna tonu atu ki a koutou, i a koutou ne seki o'mai o 'sala au i te mea ne lavea ne koutou fakailoga, ka ko te mea ne 'kai koutou i falaoa, kae ma'kona i ei. 27Sa ga'lue koutou ke maua a meakai kola e se tumau, kae ga'lue ke maua meakai kola e tumau i te ola se gata mai, kola ka tuku atu ki a koutou ne au ko te Tama a te Tagata; i te mea ko oti eiloa ne fakaasi tonu mai a ia ne te Atua te Tamana. 28Olotou muna ki a ia, “Se a te mea ka fai ne matou, ko te mea ke ga'lue matou i te galuega a te Atua?” 29Ne tali atu a Iesu, “Tenei te galuega e manako ki ei te Atua ke fai ne koutou: ke talitonu koutou ki te tino ne uga mai ne ia au.” 30Olotou muna ki a ia, “Se a te fakailoga ka fai ne koe ke lavea ne matou, kae talitonu ei foki matou ki a koe? Se a tau galuega e fai? 31#Eso 16.4,15; Sala 78.24A omotou tamana ne 'kai ki te manai i te vao, e pela mo muna ne tusi, ‘Ne tuku atu ne ia falaoa mai te lagi ke 'kai ei latou.”’ 32Muna a Iesu ki a latou, “Au e muna tonu atu ki a koutou, e se ko Mose ne avatu ne ia te falaoa tena mai te lagi, ka ko toku Tamana ne avatu ne ia te falaoa tonu mai te lagi. 33Me ko te falaoa mai te Atua, ko ia tela ne fanaifo mai te lagi o aumai te ola ki te lalolagi.” 34Olotou muna ki a ia, “Te Aliki, aumai sale eiloa ki a matou te falaoa tena.” 35Muna a Iesu ki a latou, “Ko au ko te falaoa o te ola; ko te tino e vau ki a au e se toe fia kai, ko te tino foki e talitonu ki a au, e se toe fia inu eiloa.
36“Kae muna atu au ki a koutou, me ko oti foki ne lavea ne koutou au kae ka seki talitonu mai eiloa koutou. 37Ko mea katoa e tuku mai ne te Tamana ki a au, ka aumai ki a au; mo te tino tela e vau ki a au, ka se tuli eiloa ne au keatea. 38Me i a au ne seki fanaifo mai te lagi o fai te mea e loto eiloa au ki ei, kae ne fanaifo au o fai te mea e loto ki ei te tino tela ne uga mai ne ia au. 39Kae tenei te loto o te Tamana tela ne uga mai ne ia au: ke se galo eiloa se tino e tokotasi i tino kola ne tuku mai ne ia ki a au, kae ke toe fakatu ake katoa ne au i te aso fakaoti. 40Tenei foki te loto o toku Tamana, tela ne uga mai ne ia au: ko tino katoa kola e 'kilo ki te Tama kae talitonu ki a ia, ka maua ne latou te ola se gata mai, kae ka fakatu ne au i te aso fakaoti.”
41Ko fatufatu tino Iutaia ki a ia, i te mea i a ia ne fai atu pela, “Au nei ko te falaoa o te ola ne fanaifo mai te lagi.” 42Olotou muna, “E se ko Iesu tenei te Tama a Iosefa? E iloa ne tatou tona tamana mo tona matua! Kae ne pefea eiloa o fai mai a ia penei i a ia ne vau mai te lagi?” 43Ne tali atu a Iesu ki a latou, “Sa fatufatu koutou. 44E se mafai ne se tino o vau ki a au, seiloga ne mafua tona vau mai te Tamana tela ne uga mai ne ia au; kae ka toe fakatu ne au a ia ki te ola i te aso fakaoti. 45#Isa 54.13Ko oti ne tusi ne Pelofeta penei: ‘Ka akoako latou katoa ne te Atua.’ Tela la, ko tino katoa e faka'logo ki te Tamana kae tauloto mai i a ia, ka o'mai latou ki a au. 46Ka seki lavea eiloa ne se tino te Tamana, ka ko ia fua tela ne vau mai te Atua, ne lavea ne ia te Tamana.
47“Au e muna tonu atu ki a koutou, ko te tino tela e fakatuanaki mai ki a au, e maua ne ia te ola se gata mai. 48Ko au ko te falaoa o te ola. 49Ne kai ne otou tamana te manai i te vao, kae ne 'mate latou. 50Tenei te falaoa ko fanaifo mai te lagi; so se tino e kai ki ei, ka se toe mate. 51Ko au ko te falaoa o te ola ne fanaifo mai te lagi; kafai so se tino e kai ki te falaoa tenei, ka ola eiloa a ia ki te se gata mai. Ka ko te falaoa ka avatu ne au, ko toku foitino; ka avatu ne au ke maua ne tino te ola se gata mai.”
52Tela, finau ei tino Iutaia i a latou eiloa, olotou muna, “E mafai pefea ne te tagata tenei o aumai tena foitino ki a tatou, ke 'kai tatou i ei?” 53Kae tali atu a Iesu ki a latou, “Au e muna tonu atu ki a koutou, kafai e se 'kai koutou ki te foitino o te Tama a te Tagata tela ko au, kae se inu foki koutou ki toku toto, e se maua ne koutou te ola se gata mai. 54Ko te tino e kai ki toku foitino, kae inu ki toku toto, ka maua ne ia te ola se gata mai; kae ka fakatu ne au a ia i te aso fakaoti. 55Me i toku foitino se meakai tonu eiloa, ko toku toto foki se mea inu tonu eiloa. 56Ko te tino e kai ki toku foitino kae inu ki toku toto, e tumau te tino tena i a au, e pela foki au i a ia. 57Au ne uga mai ne te Tamana ola, kae ola foki au i te Tamana; tela la, ko tino e 'kai ki toku foitino, ka ola ona ko au. 58Tenei te falaoa ne fanaifo mai te lagi; e se pela mo te falaoa ne 'kai ki ei otou tamana kae 'mate. Ko te tino tela e kai ki te falaoa tenei; ka ola eiloa ki te se gata mai.” 59A mea kona, ne faipati atu ne Iesu i te taimi ne akoako ei a ia i te fale tapuaki i Kapanaumi.
Ko Muna o te Ola se Gata Mai
60E tokouke ona soko ne lagona ne latou a te mea tenei, kae fai atu, “Se muna faigata tena; ko oi te tino e mafai o fakalogo ki ei?” 61I te lagonaga ne Iesu i tena loto eiloa i ona soko e mui'mui ki te mea tena, fai atu ei ki a latou: “E masei te mea tenei ki a koutou? 62E pefea la manafai e lavea ne koutou au te Tama a te Tagata e fanake ki luga, ki te koga tela ne nofo i ei a ia taumua? 63Ko te Agaga e aumai ne ia te ola; ka ko te foitino e seai eiloa sona aoga ki se mea. A muna ne faipati atu ne au ki a koutou, ko te Agaga mo te ola a mea kona. 64Ka ko nisi o koutou e se talitonu eiloa.” Me ne iloa eiloa ne Iesu mai te kamataga a tino kola e se talitonu, mo te tino tela ka fakalata ne ia a ia. 65Ne toe fai atu foki a ia ki a latou, “Tena te mea ne fai atu ei au ki a koutou, me e seai se tino e mafai o vau ki a au, seiloga ko tuku atu ki a ia ne te Tamana.”
66Ona ko te feitu tenei, e tokouke ona soko ko solomuli ki tua, ko se tau'tali foki i a ia, 67tela, muna atu ei a Iesu ki te tinoagafulu mo te tokolua, “Kae pefea koutou, e fia olo foki koutou keatea?” 68#Mata 16.16; Male 8.29; Luka 9.20Ne tali mai Simona Petelu ki a ia, “Te Aliki, ko oi te tino ka olo matou ki ei? A muna o te ola se gata mai, e nofo mo koe. 69Ko talitonu matou, ka ko iloa foki ne matou i a koe ko te Tamatapu a te Atua.” 70Ne tali atu a Iesu ki a latou, “Ne seki filifili ne au koutou te tinoagafulu mo te tokolua? Ka ko te tokotasi o koutou se tiapolo!” 71Ne faipati a ia e uiga mo Iuta te tama a Simona te Isikaliota; me tiga eiloa a ia se tokotasi o te tinoagafulu mo te tokolua, kae ka fakalata eiloa ne ia a Iesu.
Obecnie wybrane:
IOANE 6: Tusi Tapu
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tuvalu Revised Bible © Bible Society in the South Pacific
