KENESE 7
7
Ko te Lofiaga
1Muna a te Aliki ki a Noa, “Olo ki loto i te vaka mo tou kaiga katoa; ko iloa ne au me ko koe fua tokotasi i te lalolagi katoa e amiotonu. 2Puke ne koe e fitu vasoa o vaega manu kola e 'ma i faiga o tapuakiga, kae tasi te vasoa mai manu kola e lai'lai. 3Ke ave foki ne koe e fitu a vasoa o vaega manu eva kesekese. Fai te mea tena ko te mea ke tausi a manu vae fa kesekese mo manu eva ke ola, ko te mea ke toe fanafanau i te lalolagi. 4Ko te fitu o aso, mai te aso tenei, ka faka'to ifo ne au te vaiua tela ka 'to e tusa mo te fasefulu ao fasefulu po, ko te mea ke fulu faka'ma ei a mea ola katoa kola ko oti ne faite ne au.” 5Ne fai eiloa ne Noa a mea katoa kola ne fakatonu atu ne te Aliki ke fai.
6I te taimi ne oko mai ei te lofiaga ki te lalolagi, ka ko Noa ko 600 ona tausaga. 7#Mata 24.38,39; Luka 17.27 A ia mo tena avaga, mo ana tamaliki mo olotou avaga, ne ulu ki loto i te vaka ke 'sao latou mai te lofiaga. 8E taki lua manu, te manu tagata mo te manu fafine, mai vaega manu vae fa katoa mo manu eva, faitalia me ne manu 'ma me ikai, 9ne ulu tasi katoa mo Noa ki loto i te vaka, e pela eiloa mo te fakatonuga a te Atua. 10E fitu aso mai tua ifo, kae oko mai te lofiaga.
11 #
2Pete 3.6
I te katoaga o te 600 tausaga o Noa, i te sefulu fitu o aso o te lua o masina ne 'puna ake a vai mai te vai tela i lalo ifo o te lalolagi, e pela foki mo matavai i te lagi ko ma'tala foki, 12tela ne 'to ei te vaiua ki te laukele e tusa mo te fasefulu ao fasefulu po. 13I te aso eiloa tena, ne olo ei a Noa mo tena avaga ki loto i te vaka mo la tamaliki ko Semu, Hamo mo lafeta, mo olotou avaga. 14Ne olo tasi latou mo vaega manu vae fa valevale, manu fagai mo manu vao, manu 'lasi mo manu fo'niki, pela foki mo vaega manu eva valevale. 15Ne puke ne Noa se manu tagata mo se manu fafine mai vaega mea ola katoa, ke olo mo ia i te vaka, 16e pela eiloa mo te fakatonuga a te Atua. Fakamuli ifo, pono atu ei ne te Aliki te mataloa i te uluga o Noa ki loto i te vaka.
17Ne tumau te lofiaga i aso e fasefulu, tela ko mafai ei o laga a te vaka i te 'sua o te vai. 18Ne gasolo eiloa o sua te vai, tela ko tapea atu ei te vaka. 19Ne fanake eiloa o sua malosi te vai, tela ko 'galo ei a ulu o mauga maluga eiloa; 20ne gasolo eiloa o sua, tela ko tusa mo te fitu o mita te maluga mai ulu o mauga. 21Ne 'mate katoa a mea ola i te laukele — ko manu eva katoa, ko manu vaefa katoa, mo tino katoa. 22A mea katoa i te lalolagi kola e manava, ne 'mate katoa. 23Ne solo faka'ma ne te Aliki a mea ola katoa i te lalolagi — ko tino, manu vaefa mo manu eva. Ko Noa fua mo latou kola ne olo tasi mo ia ki loto i te vaka e seki 'mate. 24E tusa mo te 150 aso mai tua ifo kae fatoa kamata o fanaifo te vai.
Obecnie wybrane:
KENESE 7: Tusi Tapu
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tuvalu Revised Bible © Bible Society in the South Pacific
