KENESE 14
14
Ko Fakasao ne Apelamo A Lota
1E tokofa a tupu konei, ko Amalafilo o Papelonia, ko Alioka o Elasa, ko Kitalaoma o Elama mo Titalu o Koima, 2ne olo atu o faitaua ki nisi tupu konei e tokolima: ko Pela o Sotoma, Pesa o Komolo, Senapo o Atama, Semepo o Sepoima mo te tupu ei o Soala io me ko Pela. 3A tupu konei e tokolima ne kau fakatasi o fakamaopoopo olotou kautau i te Vanu o Setima, nei ko fakaigoa ko te Tai Mate. 4A latou ne nofo i lalo o te pulega a Kitalaoma e tusa mo te sefulu lua tausaga, kae i te sefulu tolu o tausaga ne teke atu ei latou ki a ia. 5I te sefulu fa o tausaga, ne vau te kautau a Kitalaoma fakatasi mo kautau a tupu kola e kau tasi mo ia o fakatakavale a tino Lefaima i Aselota Kanaima, tino Susema i Hamo, tino Emima i te kogā laukele laugatasi i Kiliataima, 6mo tino Holi i te atumauga o Etoma; afuli atu eiloa latou ke oko ki Elepalana i tafa o te koga lavaki. 7I te 'foki maiga a latou, ne toe oko atu latou ki Katesa, i te taimi tena e fakaigoa ko Enemisipata. Ne fakatakavale ne latou te fenua katoa o tino Amaleka, e pela foki mo tino Amoli kola e nofo i Hasasona Tamala.
8Tena, ne fakamaopoopo aka a kautau a tupu o fenua konei: ko Sotoma, Komolo, Atama, Sepoima mo Pela i te Vanu o Setima, 9o taua atu ki kautau a tupu o fenua konei: ko Elama, Koima, Papelonia mo Elasa; e tokolima kae tokofa. 10A te vanu e fonu i lua, kae i te taimi ne taumafai ei a te tupu o Sotoma mo te tupu o Komolo o tele keatea mo te taua, ne to atu laua ki loto i lua kona, ka ko tupu kola e tokotolu ne 'sola ki mauga. 11Ne puke ne tupu kola e tokofa a mea katoa i Sotoma mo Komolo, e aofia ei a meakai, ko te mea eiloa ko olo. 12A Lota, te tama a te taina o Apelamo, ne nofo i Sotoma i te taimi tena, tela la, ne ave foki ne latou a ia fakatasi mo ana mea katoa.
13Kae e isi se tino i te kau a Lota ne sao, tela ne tele o fakaasi te mea ne tupu ki a Apelamo, te Epelu, tela e nofo pili ki lakau tapu a Mamele, te tino Amoli. A Mamele, mo ana taina ko Esekolo mo Anele ko taugasoa o Apelamo. 14I te logoga a Apelamo i a Lota ko oti ne ave fakapagota, ne fakamaopoopo ne ia a tino tau katoa i tena fa'kai, e tusa mo te toluselau sefuluvalu te aofaki, fano eiloa a ia o 'sala a tupu kola e tokofa. Ne maua atu ne ia i Tanu, 15tena ne vaevae ei tena kau ki potukau i kona, kae i te po, ne taua atu ei latou ki kautau a tupu kola e tokofa, ne fakatakavale eiloa ne latou. Ne afuli ne latou ke oko eiloa ki Hopa, i te feitu ki matu o Tamaseko. 16I kona ne puke ei ne latou a mea kola ne fao malo ne latou. Ne puke mai foki ne latou a Lota, te tama a te taina o Apelamo, fakatasi mo ana mea katoa, mo fafine mo nisi pagota.
Ko Fakamanuia a Apelamo ne Mekisateko
17I te fokimaiga a Apelamo i te otiga ne fakatakavale ne ia a Kitalaoma mo tupu kola e kau tasi mo ia, ne fanatu te tupu o Sotoma o fakafetaui atu ki a ia i te Vanu o Save, tela e fakaigoa foki ko te Vanu o Tupu. 18#Epe 7.1-10A Mekisateko, te tupu o Salema kae se faitaulaga foki a te Atua Tafasili i te Maluga, ne vau mo falaoa mo uaina ki a Apelamo, 19fakamanuia ne ia Apelamo kae fai mai penei, “Ke fakamanuia Apelamo ne te Atua Tafasili i te Maluga tela ne faite ne ia te lagi mo te lalolagi! 20Ke vikia te Atua Tafasili i te Maluga, tela ne avatu ne ia ki a koe te manumalo i luga i ou fili!” Tela ne tuku atu ei ne Apelamo ki a Mekisateko te tasi vae sefulu o mea kola ne puke ne ia mai i tupu kola e tokofa.
21Muna a te tupu o Sotoma ki a Apelamo, “Tausi ma koe a koloa kona ne fakafoki mai ne koe, kae aumai fua ko oku tino.”
22Ne tali atu Apelamo penei, “Au e tauto atu i mua o te Aliki te Atua Tafasili i te Malosi, tela ne faite ne ia te lagi mo te lalolagi, 23me e seai eiloa se mea a koe e tausi ne au, ke oko eiloa ki se filo io me se mea fakamau taka. Ka se mafai ei ne koe o fai pela, ‘Ko au ne fai ne au Apelamo ke maumea.’ 24E seai se mea e puke ne au. E talia fua ne au a mea kola ko oti ne fakaaoga ne oku tino. Kae talia mai ke puke se vaega mo oku taugasoa, ko Aneli, Esekolo mo Mamele.”
Obecnie wybrane:
KENESE 14: Tusi Tapu
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tuvalu Revised Bible © Bible Society in the South Pacific
