GÉNESIS 2
2
1Hanaq pachapas kay pachapas tukusqataq karqan, lliw ima hayk'a kaqkunapas. 2Diosmi qanchiskaq p'unchaypi ruwasqanta tukurqan, hinaspan qanchiskaq p'unchaypi samakurqan lliw ruwasqanmanta. 3Chaymi Diosqa qanchiskaq p'unchayta samincharqan sapaqcharqantaq, chay p'unchaypin Diosqa lliw kamasqanmanta samakurqan.
Edenpi runaq tiyasqan
4Kay hina kamasqan karqan hanaq pachapas kay pachapas.
Señor Dios kay pachata hanaq pachata kamashaqtinqa, 5manan kay pachapi ima ch'aphrapas karqanraqchu, manallataq ima q'omer qorapas phutumurqanraqchu. Señor Diosqa manan kay pachaman parachimurqanraqchu, manan runapas hallp'ata llank'ananpaq karqanraqchu. 6Aswanpas pukyun pampamanta phullpumuspa kay pachantinta qarparqan. 7Hinamantataq ñut'u hallp'amanta Señor Diosqa runata#2.7 Hebreo qelqapiqa Adam simin rikhurin. Chayqa “Runa” ninantan nin. Adama simitaq “hallp'a” ninanta nin. ruwarqan, hinaspa kawsay samayta senqanman samaykurqan, chaymi runaqa kawsashaq kapurqan.
8Señor Diosmi Edenpi huertata plantarqan, inti lloqsimuy ladopi, hinaspan ruwasqan runata chayman churarqan. 9Señor Diosmi hallp'amanta phutuchimurqan lliw munayllaña sach'akunata, mikhunapaqpas sumaqta. Churallarqantaq huerta chawpipi kawsachiq sach'atapas, allinkaqta mana allinkaqta reqsichiq sach'atapas.
10Edenmantan huk mayu lloqsimurqan huertata qarpananpaq, chaymantataq tawaman p'alqarirqan. 11Ñawpaqkaqpa sutinmi Pisón karqan, chaymi Havila nisqa lliw hallp'anta purin, chaypin kan qori. 12Chay hallp'a qoriqa ch'uyan, chaypin kallantaq sumaq q'apaq gomapas, yanayoq yuraq umiñapas. 13Iskaykaq mayuq sutintaq Gihón karqan, Cus nisqa lliw hallp'antataq purin. 14Kinsakaq mayuq sutintaq Tigris karqan, chaymi Asiriaq inti lloqsimuy ladonta purin. Tawakaq mayutaq Eufrates karqan.
15Señor Diosmi runata Edén huertaman churarqan llank'ananpaq cuidananpaqwan. 16Hinaspan Señor Diosqa runata kamachirqan: –Atinkin huertapi llapa sach'a ruru mikhuyta, 17allinkaqta mana allinkaqta reqsichiq sach'a rurutan ichaqa ama mikhunkichu, chayta mikhunki chayqa, wañunkipunin, nispa. 18Señor Diosmi nirqan:
–Manan allinchu qhariq sapallan kanan, paypaq hinapuni yanapaqninta ruwapusaq, nispa. 19Hinan Señor Diosqa hallp'amanta ruwarqan lliw salqa uywakunata, llapa phalaq animalkunatapas, hinaspan runaman chaykunata asuykachirqan sutichananpaq. Hinaqtinmi Adanqa llapa kawsaq animalkunata suticharqan, chaytaqmi sutin kapurqan. 20Adanmi suticharqan llapa uywakunatapas, phalaq animalkunatapas, llapa salqa uywakunatapas. Runapaqmi ichaqa paypaq hinapuni yanapaqnin mana karqanchu. 21Chaymi Señor Diosqa runata misk'ita puñurqochirqan, puñushaqtintaq huknin waqtanninta horqorqan, hinaspataq aychanta wisq'aykapurqan. 22Señor Diosqa qharimanta horqosqan waqtanninmantan warmita ruwarqan, hinaspan qhariman pusamurqan.
23Chaymi qhariqa kusikurqan:
–¡Kaymá!
Tulluy tulluyoqqa,
aychay aychayoqqa,
kaymi “Warmi” sutiyoq kanqa
qharimanta horqosqa kasqanrayku, nispa.
24Chayrayku, runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku.
25Iskayninkutaq q'alalla kasharqanku, qharipas warmipas, manataq p'enqanakurqankuchu.
Obecnie wybrane:
GÉNESIS 2: QUECUZ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Revised Quechua Cuzco Bible © Peruvian Bible Society, 2004.
