Ohuchaaka 8
8
Ohuhama hw'amaachi k'ofwomboole
1Nasaae yechulisa Nowa neende ebisolo byoosi neende ebyaayo byoosi, ebyali nae mu lyaato. Nasaae yaleeta omuyaka kw'amaani ohuwuucha hu syaalo amaachi kaachaaka ohuhama. 2Esulo ch'amaachi ech'aasi neende amaachi katula aakulu muukulu kosi kachaaka ohwaakama, mani efula niyaakama ohukwa. 3Amaachi kemeeda ohuhama nikawa hu syaalo. Endaalo emia ndala neende amahumi kataanu (150) nichawa, amaachi kali kachaakire ohuhama hu syaalo. 4Nae mu mwoosi kwohutaanu-na-kibiri, hu ludaalo lw'ehumi neende chitaanu-na-chibiri, elyaato lyachia lyegeeng'a hu lugulu lwa Araraati. 5Amaachi kemeeda ohuhama ohwoola mu mwoosi kw'ehumi; hu ludaalo lutaangira mu mwoosi kw'ehumi, engulu chachaaka ohubonehana.
6Endaalo amahumi kane nichawa, Nowa yeekulao edirisa lyohu lyaato, 7mani yaalehuula eyoni lilaangwa “ehoofwa”, lyaabburuha nilichia haandi nilikobola, ohwoola lu maachi kahamira hu syaalo. 8Nowa yalehuula eyoni lilaangwa “eguugu” ohuchia ohubona amaachi nikahamire. 9Nae haba silyanyoola abuundu woosi owohukwa mani nilikobola eyiri elyaato olwohuba amaachi kali nikasisiiri hu syaalo. Nowa yatusa omuhono erwaanyi w'elyaato mani yaadiira eguugu elyo yaaliingisa mu lyaato. 10Nowa haandi yaliinda endaalo chiindi chitaanu-na-chibiri ohubitao, haandi yaatuma eguugu ohutula mu lyaato. 11Mani eguugu nilikobola engoloobe, nae bone, lyali nilikiingire hu munwa esaga ly'omuseituuni ebisi. Ao Bulaanu Nowa yamanya ati, amaachi kali kamalire ohuhama hu syaalo. 12Nowa yaliinda endaalo chiindi chitaanu-na-chibiri ohubitao; haandi yaatuma eguugu ohutula mu lyaato. Ehabi lino, eguugu lyaakamirayo elalira lyaahaya ohukobola mu lyaato.
13Nowa niyoosa emyaaka emia chisaasaba neende mulala (601) hu ludaalo lutaangira lw'omwoosi kwaamberi, amaachi kahamira elalira hu syaalo. Nowa bulaanu yabwiihula esirama sy'elyaato, yaleengeesera erwaanyi. Nae bone, eloba lyoomu lyali libonehana hu syaalo. 14Hu ludaalo lw'amahumi kabiri neende chitaanu-na-chibiri olw'omwoosi kwohubiri, esyaalo syoosi syali simalire ohubalakala. 15Nasaae bulaanu yaboolera Nowa ati, 16“Tula mu lyaato, ewe neende omuhasi wao neende abaana bao neende abahasi b'abaana bao abali naawe. 17Tusa buli siindu silamu syoosi sy'oli nasyo: Amayoni neende ebisolo neende buli siindu syoosi esyambaaka hu syaalo, binyale ohwiibulanira hu syaalo, biibulane mani biiyihe hu syaalo.” 18Nowa yatula mu lyaato, alala neende abaana bae, neende omuhasi wae neende abahasi b'abaana bae abali nae. 19Ebisolo byoosi neende amayoni koosi byatula mu lyaato mu buli mikaanda kyaabyo kyeene.
Nowa ayaana esiyaanwa
20Nowa yoombahira Omwaami alutaari, yaabukula hu buli sisolo syalabiswa neende hu buli yoni lyalabiswa, yaabiyaana koti ebiyaanwa bisaambwa hu alutaari eyo. 21Nae Omwaami niyawulira esaami yiwunya bilai eyo, yasangaala mani yaboola mu mwooyo kwae ati, “Haandi haba sindahabwaabe esyaalo ehabi liindi daawe ohweema hu biholwa by'omuundu; olwohuba ebibaaso biri mu mwooyo kw'omuundu haba si bilai ohutulira elalira mu huloongwa hwae; haandi siinjia ohusihirisa buli siloonge silamu koti luu holere endi. 22Esyaalo nisisisiiriwo etaaka neende eekesa, esiruumbi neende etoocho, esiminyu neende omunyiti, esideete neende esiro, haba sibichia huwaao.”
Obecnie wybrane:
Ohuchaaka 8: SAMDC
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Bible Society of Kenya, 2019
©Bible Society of Uganda, 2019
