Ohuchaaka 13
13
Abburamu neende Loti bakabuhana
1Bulaanu, Abburamu yatula Misiri alala neende omuhasi wae, neende emyaandu ki yali nakyo, neende Loti yi yali nae, baachia Negebbu.
2Abburamu yali omuyiinda muno, naali neende amakoondi, embusi, eng'oombe, efeesa neende esaabbu. 3Yakeenda yaatula Negebbu mani niyoola Bbeteli, yi yeema lyae liyataangira ohwoombaha lyali, akatikaati wa Bbeteli neende Ai; 4abuundu yi yataangira ohwoombaha alutaari, mani yeenamirao Omwaami. 5Loti, owachia neende Abburamu yesi yali neende amakoondi, embusi, eng'oombe neende amayeema, neende ab'edaala lyae beene, neende abahalaabani bae. 6Mani obwaayiro nibwaduuduya bwaahaya ohubamala boombi nibamenyere alala, olwohuba emyaandu kyaabwe kyali kingiiye nikitabakanya ohumenya alala. 7Bulaanu amayiingi keemao kaakwaao akatikaati w'abaayi ba Abburamu neende aba Loti. (Ebiha ebyo, Abakanani neende Abaperisi nibo abali nibamenya mu syaalo esyo.)
8Abburamu yeemao yaboolera Loti ati, “Haba sisilai amayiingi ohukwaao akatikaati wao naange, haandi akatikaati w'abaayi bao neende abaange, olwohuba huli abeebulanwa ab'amabaanga malala. 9Eloba lino lyoosi liri mu mahono kao. Leha hukabuhane. Nooyira eloba liri hu muhono mukooda, ese mba njia ohuyira eliri hu muhono muluungi; nae nooyira eloba liri hu muhono muluungi, ese mba njia ohuyira eliri hu muhono mukooda.” 10#Huc 2:10.Loti yatingaala yaabodoohania emoni, yaabona ehooho lya Yorodaani nilirimo omunyiti buli abuundu nilifwaana koti endalo y'Omwaami, niliri sa koti eloba lya Misiri olwaande lwa Soari. (Ebiha ebyo, Omwaami yali n'asisiiri ohusihirisa Sodomu neende Gomora.) 11Loti yedoolera ehooho lya Yorodaani, mani n'achaaka ohukeenda n'achoomere ebukwe. Mani nibakabuhana. 12Abburamu yamenya mu syaalo sya Kanani, nae Loti yaamenya mu biko byomu hooho mani yoombaha eyeema aambi neende Sodomu. 13Bulaanu abaandu b'e Sodomu bali abamayaanu muno, nibahola ebyonoono muno mu moni w'Omwaami.
Abburamu awuuyira Hebburoni
14Loti n'amalire ohuwaao, Omwaami yaboolera Abburamu ati, “Yema yooli ao mani otingaale noobodoohania emoni, ohutula emukulu ohwoola emwaalo, haandi ohutula ebukwe ohwoola emuumbo. 15#Biho 7:5.Eloba elyo lyoosi ly'obona njia ohulihuberesa, ewe alala neende abeechuhulu bao, emyaaka kyoosi. 16Njia ohuhola abeechuhulu bao babe abaangi koti olufu lwohu syaalo, abuleo omuundu yeesi onyala ohubabala koti batahanyala ohubala olufu lwohu syaalo. 17Siingira okeende webodoohanie n'olambuula eloba lino lyoosi li njia ohuhuberesa.” 18Abburamu mani yawuuyisa eyeema lyae, yaachia yaamenya aambi neende emisaala myoolerefu kya Mamure, ekiri Hebburoni. Ao niwo haandi yi Abburamu yoombahira Omwaami alutaari.
Obecnie wybrane:
Ohuchaaka 13: SAMDC
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Bible Society of Kenya, 2019
©Bible Society of Uganda, 2019
