Broă 3

Cau gơlte geh sơmbòi

1Dô ngai ne, Pier mơ Jang lòt tus hơ hìu duh khoai nàng hòi dan, tŭ hơ̆ la pe jơ mho.#3:1 Js: Hơ̆ la jơ dơ̆ sin. 2Gơs dô nă cau gơlte bơh kơndul mè, kòp ngai cau cèng khai ơn di mpồng hìu duh khoai sơnđan la Mpồng Hàng Mơnĕ nàng kanadàn mơ ală cau mut tòm hìu duh khoai. 3Khai gŏ Pier mơ Jang mòr mut tòm hìu duh khoai gen dan bol khai pà gòi phan. 4Pier mơ Jang sền song di khai, gen Pier đơs lah: “Rmê tĕ bol hi hơ do!” 5Behơ̆ khai rmê lol lol di bàr nă bol hơ̆, kơlôi lah rơp geh đau dô êt phan. 6Mơya Pier đơs mơ khai lah: “Añ ò gơs dô êt lơi màh priă, mơya bơta añ gơs añ ai mê in: Ai sơnđan Yàng Jesu Krist Cau Nasaret, ntào lòt tĕ!” 7Pier sơmbat di tê ma khai yò tơngguh. Gen tŭ hơ̆ mo mpàng jơng mơ mat be khai dê gơlik gơs pràn kơldang. 8Khai sơnđoh, ntào song mơ lòt, mut bal mơ bol hơ̆ tòm hìu duh khoai, lòt ndang sơnđoh ndang mơ jòng ro Yàng Tom Trồ ndang. 9Jơh làng bol gŏ khai lòt mơ jòng ro Yàng Tom Trồ, 10gen git đal lah să tòm khai neh nggui di Mpồng Hàng Mơnĕ hìu duh khoai dê nàng kanadàn, behơ̆ tàng bol khai ai lơh krơi mơ mơp dơl bơh broă neh gơlik gơs khai in.

Pier bơto tòm hìu duh khoai

11Tòm tŭ cau hơ̆ ơm at di Pier mơ Jang, behơ̆ jơh làng bol ai lơh krơi ngan, ntoat ràn tus di bol khai hơ mpồng rơng sơnđan la Salômôn.

12Pier gŏ behơ̆ gen đơs mơ làng bol lah: “Ơ ală cau Israel, ñchi bơh tài ală oh mi ai lơh krơi bơh broă do taih? Ñchi bơh tài ală oh mi sền trol di bol hi, gơlơh be bol hi neh kơnòm di gơnap gơnoar is hala bơta duh rngòt is hi dê nàng lơh cau do in tus lòt taih? 13#Lik 3:15.Yàng Tom Trồ Abraham, Isak mơ Jakôp dê, Yàng Tom Trồ ồng pàng bol he dê neh lơh gơklŏ Cau Duh Broă#3:13 Rct: Kòn. Kơnràñ dê la Yàng Jesu, la Bơtau mơ ală oh mi neh bơtào mơ pơndang sang di đap Pilat, tòm tŭ khai neh lơh nền kòñ hồ Kơnràñ. 14#Mat 27:15-23; Mak 15:6-14; Luk 23:13-23; Jang 19:12-15.Ală oh mi neh pơndang sang Bơtau sàng goh mơ song ring mơ dan Pilat hồ he in dô nă cau tơnchơt cau. 15Ală oh mi neh tơnchơt Bơtau Tòm ryas bơta kis dê mơ Yàng Tom Trồ neh lơh kis wơl bơh bơta chơt, mơ bol hi la cau lơh cơng bơta hơ̆. 16Bơh bơta dòn tòm sơnđan Kơnràñ neh lơh cau do in pràn kơldang la cau ală oh mi gŏ mơ git; bơh sơnđan Kơnràñ mơ bơta dòn di Yàng Jesu neh lơh cau do in geh bơta pràn kơldang wil tơl be jơh ală oh mi neh gŏ. 17Tŭ do, ơ làng bol Israel, añ git oh mi mơ ală cau kwang oh mi dê neh lơh bơta hơ̆ tài bơh ò git. 18Mơya Yàng Tom Trồ neh ngui bơta hơ̆ nàng lơh gơlik di ngan jơnau Kơnràñ neh yal lài bơh bơr ală cau gơnoar hwơr lah Bơtau Krist Kơnràñ dê pal kong jê sồt.

19Behơ̆, dilah ală oh mi gơjrañ sang glài mơ rê wơl hơ Yàng Tom Trồ, gen tồi glài bol mê geh toh jơh, 20tồ tŭ tơngai lơngap lơngai tus bơh di Yàng, nàng Kơnràñ sồr Bơtau Krist lòt tus, hơ̆ la Yàng Jesu, la Bơtau neh geh sac rwah ală oh mi in. 21Bơtau hơ̆ pal geh ơm wơl hơđang trồ jơl tus di tŭ tơngai bơtào tơngguh wơl jơh ală phan, hơ̆ la bơta bơh yau òr mơ Yàng Tom Trồ neh kơnòm di bơr ală cau gơnoar hwơr sàng goh mơ đơs. 22#Yalw 18:15.Ngan be Môise neh đơs lah: ‘Yàng la Yàng Tom Trồ rơp bơtào tơngguh bơh digùl bol mê dô nă Cau gơnoar hwơr be añ, mơ bol mê pal iat ală bơta Kơnràñ bơto sồr. 23#Yalw 18:19; Leb 23:29.Dilah cau lơi ò iat jơnau Cau gơnoar hwơr hơ̆ gen rơp kòl tă tơlik mơ kong tơnroh bơh di làng bol Yàng Tom Trồ dê.’

24Jơh ală cau gơnoar hwơr neh đơs, bơh Samuel tus di ală cau tơrbŏ jat khai, tòm tŭ đơs hwơr kung neh bơto yal bơh ală ngai do sơl. 25#Sơnròp 12:3; 22:18; 26:4; 28:14.Ală oh mi la kòn sau ală cau gơnoar hwơr dê, mơ bơta ho bal Yàng Tom Trồ dê neh bơtào gơs mơ ală ồng pàng oh mi dê tòm tŭ Kơnràñ đơs mơ Abraham lah: ‘Jơh ală làng bol tòm làm ù rơp geh lơngai kơnòm di jơi bơtiàn mê dê.’ 26Behơ̆ Yàng Tom Trồ neh sac rwah Cau Duh Broă#3:26 Rct: Kòn. Kơnràñ dê, mơ sồr Khai lòt tus ai lơngai ală oh mi in sơnròp ngan, mơ lơh kòp nă cau in tòm ală oh mi pơrlac sang bơta tồi glài iơh bơsak he dê.”

Obecnie wybrane:

Broă 3: KPM2018

Podkreślenie

Udostępnij

Kopiuj