Luuk 24

1Laasidi dai saluik ate nipooma yaa yiti ale ba kpa masisaŋa a cheŋ boosuku jigini. 2Ba yaa nya ale tintain dii ate ba pai lik boosuku nɔnni la a bilim ale ge boosuku nɔnni a basi. 3Ate ba yaa jo bu po alege ba an nya Nyɔnɔwa Yeezu Kirisita nyiŋka. 4Ba yaa za dula jigini ate ku cha ba. Nuruba baye a yaa jo garuk peeta ate ti a nyaksi nna kpelim kpelim a deri za ba tɛŋ. 5Yɔgsum yaa yik nipooma ate ba pai ba zuima a su tɛŋ ate nuruma yaa bek ba ayen, <<Ka boa ate ni a gisi nuru waai ale vua la kpilima suŋsuŋŋa? 6Wa ka dela, wa yiti kum po kama. Ni teeri wa ale jam weeni ni dii diipo ate ni jam bo ale wa Galili tɛŋka po la. 7Wa jam weeni ayen, <Mi Saalɔbiika ku a fɛ kama ate nuruba a yik mu a pai nyo tuimbaata nyam nisima po, ate ba kpi mu jabarim nyiŋ alege daa ŋata dai m le yiti kum po.> >> 8Nipooma yaa teeri wa wieŋa de 9ate ba yaa pilim ŋmani a jam weeni nya kude a sak wa ŋaaŋviirɔma pi ale wanyiwa ale nuru mbala meena. 10Nipooma jam ale Mɛɛri Magdalene ale Joana ale Jeemsi mawa Mɛɛri, nyaba de ale nipooba ba chaab baai ale jam bo ale ba la yaa weeni wieŋa de a sak tuimtomdɔma. 11Alege tuimtomdɔma jigi, wieŋa de a jam chim ka sunsuelima, dila nyiŋ, ba an jam siak ayen ku ka wensie. 12Piita yaa yiti chali cheŋ boosuku jigini a ga chuiri nya alege wa an nya jaaboa, ka gatta nyiini. Ku yaa cha wa nna yegayega ate wa kuli. Wa jam a poli ka dii dek chekki ale nye la.

13Da dila danni dekdega ate Yeezu ŋaaŋviirɔma baye a yaa jam a cheŋ tɛŋ fiik ate ba a wi ka ayen Imayus, ka jam ka mɛɛla ŋayopɔi ale Jerusalem tɛŋka. 14Ba ale bo suiku po a cheŋ la, ba yaa a biisi ŋaai meena ale nye la. 15Ba ale jam a biisi ŋa wie ale a magsi ŋa la, Yeezu dek a yaa forisi paari ba ate ba va chaab a cheŋ 16alege ba an jam baga miŋ wa. 17Yeezu yaa bek ba ayen, <<Ka boan jaab wari ate nama biisi a cheŋ la?>> Ba yaa za nna zimm ale sui kaasuŋ. 18Ba wanyi ate ba a wi ayen Kiliyopas, wala yaa tulisi wa ayen, <<Ka fi nyiini ale nichaanɔ Jerusalem tɛŋka po a zɛ wie ŋaai ale bo ka po daaŋa de la?>> 19Wa yaa bek ba ayen, <<Ka boan wie?>> Ba yaa tulisi wa ayen, <<A magsi chaab ale Yeezu Nazaret denɔ waai ale jam ka Wen biisiteerɔ ate wa wie ale wa biik a pagra Wen jigi ale nuru meena jigi la, 20ale ti kaabteerɔ kpaŋŋa ale niŋdeerɔma ale nye dii a pai wa a te ayen ba bo wa buusa a ko wa jabarimu zuk la. 21Alege tama jam a yiili kama ayen ka wala le wa da tuesi Izirali tɛŋka a basi, daa dila nyiini, ku daa ŋata ale jinla ate nya kude meena a nye la.

22<<Daa dila nyiini mɛ, tama buuni po, nipooba ale weeni wari ate di cha ti nna yegayega. Ba cheŋ ka wa boosuku jigini saluik yokyokku de 23alege ba an nya wa nyiŋka. Ba yaa pilim jam a weeni ayen ba nya Wen maarɔba ate ba weeni ayen wa vua kama. 24Baai ale jam maa bo ale tama la ba gela a cheŋ boosuku jigini kama a ga nya nipooma ale poom liŋ weeni ba diila dekdega. Ba an nya wa.>> 25Yeezu yaa weeni ba ayen, <<Ni ka betta! Ka boa ale soa ate ni an baga a ta siaka ale Wen biisiteerɔma ale biisi diila. 26Ku kan jam a fɛ kama ayen Kirisitawa a nam ale wieŋa de abe wa ge nya wa zulaŋa?>> 27Yeezu a yaa piilim deri a weeni wie ŋaai meena ate ba ŋmarisi Wen Gbaŋka po a magsi chaab ale wadek la kiri. Wa jam piilim ta nyini ka Moosis ale Wen biisiteerɔma meena a weeni ŋa kie a sak ba.

28Ba yaa jam boro a moata tɛŋ fiik kaai ate ba a jam a cheŋ la. Yeezu yaa nye ase wa a taam ka niŋ la. 29Alege ba yaa yik wa a weeni ayen, <<Ti kuli ga goa dii nyiŋla, wenni boro a siŋ kama ate tɛŋka a sobri.>> Wa yaa siak va kuli. 30Ba ale boro a dɛ la, wa yaa pai boroborok a nye Wen jiam a wɛ ku a te ba 31ate ba nina a yaa deri lagri ate ba miŋ wa ate wa yaa deri muriŋ bɛ ba nina po. 32Ba yaa weeni chaab ayen, <<Ti ale poom bo suiku po ate wa a biisi dii a magsi chaab ale ba ale ŋmarisi Wen Gbaŋka po diila, an poom a te ti masim ti suiniima po?>> 33Ba yaa yiti dila po wa a cheŋ Jerusalem tɛŋka. Dula jigini, ba yaa ga nya wa ŋaaŋviirɔma pi ale wanyiwa ale ba tigsi chaab a kali jigi yeŋ ale baai meena ale jam a maa kali ale ba la 34ale ba kala a biisi ayen, <<Ti Nyɔnɔwa Yeezu Kirisita a sum yiti kum po kama a pai wadek a sak Simon.>> 35Kiliyopas ale nwala yaa weeni a sak ba dii meena ale nye suiku po la ale wa ale wɛ boroboroku ate ba miŋ wa diila.

36Ba ale jam boro a biisi nna la, Yeezu dek a deri jam za ba suŋsuŋ a weeni ba ayen, <<Ni boro ale suiyɔgni.>> 37Ate yɔgsum a yik ba ate ba nyiŋsa a gok ate ba a poli ayen ba nya ka kɔk. 38Alege wa yaa bek ba ayen, <<Ka boa ale a daani ni? Ka boa ale soa ate ni ta chichama ni zuimaŋa po? 39Ni nya m nisimaŋa ale m naŋsaŋa ate ni miŋ ayen ka mi dek ale la. Ni tiri mu a nya ate ni seba ayen daa kɔwa dii nyiŋla, kɔk ka nyiŋ ale koba ase ni ale nya mi ale ta diila.>> 40Wa ale weeni dila la, wa yaa pai wa nisaŋa ale wa naŋsaŋa a sak ba. 41Ase ba le diem jam kan ta siaka ba suipeentika ale ku le cha ba la nyiŋ la, wa yaa weeni ba ayen, <<Ni ta ŋandiinta dela a dɛ?>> 42Ba yaa pai jum digima te wa 43ate wa ŋɔbi ate ba nya.

44Wa yaa weeni ba ayen, <<Wieŋa de dekdega ate mi jam weeni ni diipo ate mi jam diem bo ale ni la, ayen wie ŋaai meena ale bo Wen Gbaŋka po ate Moosis ŋmarisi Sinsaŋŋa po ale Wen biisiteerɔma gbaŋsaŋa po ale Yiila Gbaŋka po a magsi chaab ale mi la, ku a fɛ kama ayen ŋa chim wensie.>> 45Wa yaa lagri ba popolaŋa ayen ba miŋ chak ba ale ŋmarisi dii Wen Gbaŋka po la. 46Wa yaa weeni ba ayen, <<Ba ŋmarisi ka po ayen, ku a fɛ kama ate Mi Kirisitawa a nam abe daa ŋata dai m yaa yiti kum po. 47Wensie, ate mi a weeni fu ayen wa nyɔnɔwa ale pai wa ŋantaŋa meena a nyo ka wa nisa po ayen wa a nya. 48Nama dek be nya wieŋa de meena kama ale nidek nina. 49Mi dek le basi ate m Kowa ale puulim la a jam ni jigi. Alege, ku a fɛ kama ayen ni bo tɛŋka de po a limisi ate pagrim nyini wenŋmazuk a jam ni jigi.>>

50Wa yaa dɛ ba niŋ a ta ba cheŋ ga paari Betani tɛŋka, ate wa yaa zak wa nisaŋa a te ba niaka. 51Wa ale jam boro a te ba niaka la, Wen yaa deri pai wa a ta jueli wenŋmazuk. 52Ba yaa le puusi wa a nueri la ba yaa pilim cheŋ Jerusalem ale suipeentik nna yegayega 53a kasim jam bo Wen yenni po a pak Wen.

Obecnie wybrane:

Luuk 24: BWU

Podkreślenie

Udostępnij

Kopiuj