Marku 10
10
Yang-mi yang-lang a waw gang
1Hau mai Yang htaw law lwi, Yuda mung kyaw e Yawdan lang he-hpaw shut e je e ngut mu, byn ra-jum-ra-wi Yang jang shut dum le mung kaw e yan-mai, Yang e li e ra jung za, yang maw le dum nyaw maw bi e.
2Hau hkan Hparishe pe je le lwi, Yang le jam-wu u-jang, “Byu gë, yum-sing e yang-mi le du pyam le ge le lu?” ga lwi, Yang le mi kaw e.
3Yang gë, “Mawshe nung maw le hka su ga tai taw e lu?” ga lwi, tu e.
4Yang maw gë, “Law kang mau-sau ka taw lwi, yang le law kang pyam ra, ga, Mawshe ahkang bi taw be,” ga kaw e.
5Yesu gë, “Nung maw i-mit htan e yan-mai, shi dang nung maw e ma-tu yang ka taw bi be.”
6“Ngut-kaw-lang, a-nam mau-hë-mi-hë hkun mai, yu-ge-zaw e mi-we-zaw nik le Karai Kasang hpan taw be.
7Hau yan-mai yu-ge-zaw gë, i-nu-i-wa le pyam taw lwi, yang nik gë, ra gung-ra-shaw dut bakaw ra.
8Hau mu yang nik gë, i yu ngut taw akaw a ngut. Ra-gung-ra-shaw za ngut taw be.
9Hau mu lwi, Karai Kasang htsaw taw e le, byu gë, a ge law kang,” ga e, yang maw le tu e.
10Yum hkau shut ni taw kaw le, lagyaw pe gë, shi hkyaw le Yang le dum mi kaw e.
11Hau hkun Yang gë, “Yum-sing e yang-mi le law kang pyam lwi, mi-we gaw-yu le hang yu su, aw ngat-kaw-lang, yang-mi le law shut su ngut taw le.
12Mi-we-zaw le yum-sing yang-lang le law kang pyam lwi, yn-ge gaw-yu jang dum law le gë, yu-ge lu e a-mu kut taw le,” ga tai e.
Yesu ge, zaw-shang wi le shi-man bi e
13Yang maw zaw-shang wi le sawp bi shang ga, ga lwi, Yesu jang shwi le kaw e. Lagyaw pe yu gë, yang maw le tan pyam kaw e.
14Yesu hau le myang jang, wu nik-yaw lwi, “Zaw-shang wi le Nga jang le-nang ke. Yang maw le hka lang-zing kaw. Hka-su-mu-ga-le, Karai Kasang mung-dan gë, han su e bang e mung-dan ngut taw le.
15Nung maw le Ngaw teng teng tai kyaw le, aw ngut-kaw-lang, Karai Kasang e mung-dan le zaw-shang su a lawm-yu su gë, hau ma ge ge wa a waw wang ra ngut le,” ga lwi, yang maw le tai e.
16Hau hkun Yang yang maw le bun yu lwi, yang maw e htaw ma law ke taw u-jang, shi-man bi e.
I-sut waw e yu-ge-zaw ra yu Yesu jang le e
17Hkyaw ma dum e-law le, byu ra yu Yang jang din je le lwi, Yang hë ma hki-hput-htu u-jang, “Ge tik e sara e, a-htum-a-byu e asak waw yu shaw, ngaw hai jung kut ra lu?” ga lwi, Yang le mi e.
18Yesu gë, “Ngaw le hai mu ge tik e ga le la? Karfiti Kasang mai gaw-tu ge tik e aw le a ni.
19Jep e tara ma, Byu hka sat, Su-mi hka lu, Hka hkau, A-teng e sak-se hka hkam, Maw-zaw-map-zaw hka kut, Nang nu e nang wa le hkung-ga a, ga e dang le nang se taw le lu?” ga lwi, yang le tai e.
20Hau yu gë, “Sara e, hau lung-lang le i-ram pyat mai ngaw chang be,” ga lwi, Yesu le tai e.
21Yesu gë, yang le byu wu u-jang, yang le jit lwi, “Nang ra hkyaw ra a-shi. Nang law a, waw-ma-waw le ung pyam lwi, myung bang le gam bi a. Hau jang she mau-hkung htaw ma nang i-sut waw ra, Nga htang ma le chang a,” ga lwi, yang le tai e.
22Yang yu, hau su ga e yan-mai, myaw-dawng sum byu lwi, mit-yawn le e-law byu be. Hka-su-mu-ga-le, yang sut-gan myaw myaw waw su ngut taw le.
I-sut waw bang gë, Karai Kasang mung-dan ma wang ra wi taw ra
23Hau su mu, Yesu gë, byu-wu lwi, Yang e lagyaw pe le, “I-sut waw bang gë, Karai Kasang mung-dan ma gyai wang wi taw ra nung,” ga e.
24Lagyaw pe yu gë, Yang e dang yan-mai mau-ba ni kaw e. Hau mu lwi, Yesu gë, “Nga zaw pe e, i-sut le lum bang gë, Karai Kasang mung-dan ma wang ra gyai wi taw ra nung.
25I-sut waw su gë, Karai Kasang mung-dan wang ra htaw ma gawla-u gë, ap-naw dawng lut ra je lwi taw ra,” ga lwi, yang maw le tai e.
26Yang maw yu, radu lai lwi mau byu u-jang, “Hau su le gë, aw yu hki-yu e jang waw je ra lu?” ga lwi, Yang le tai kaw e.
27Yesu gë, yang maw le byu-wu lwi, “Hau a-mu le byu a waw kut kaw-lang, Karai Kasang a waw kut e a jaw. Hka-su-mu-ga-le, Karai Kasang gë, ban-shaw le waw kut le,” ga e.
28Hau hkun Petru gë, “Nga maw ze ban-shaw le pyam taw lwi, Nang jang le chang be,” ga lwi, Yang le tau tai e.
29Yesu gë, “Ngaw nung maw le teng teng tai kyaw kaw le, Nga e ma-tu e kabu dang-lu ma-tu yum-sing e yum, yaw, yang-gu, yang-mang, i-nu-i-wa, yang-shu-yang-zaw pe le pyam taw su, aw ngut-kaw-lang,
30Zing-ri hwi ra, shi pyat ma, yum, yaw, yang-gu, yang-mang, i-nu, yang shu-yang-zaw pe le bung shaw a waw yu ra a ni; htang-nung pyat ma, a-byu-a-htum e asak waw yu ra ngut le.
31Ngut kaw-lang, hë bang myaw myaw htang gyaw ra; htang gyaw bang yu gë, hë bakaw ra,” ga lwi, tu e.
Yesu le roi-rip kut lwi sat pyam kaw-lang, dum taw law ra
32Hau hkun Yerusalem shut daw law ra, yang maw hkyaw ma e-law ni le, Yesu gë, yang maw e hë ma e-law ni le. Yang maw yu gë, mau byu kaw e, htang chang ni e bang le gyu nan ni akaw. Hau hkun lagyaw ra htse i yu le Yang dum wut yu lwi, Yang jang dut law ra a-mu hkyaw yang maw le tai e gë.
33“Wu ke! i-nung Yerusalem shut duw law ni le, hau byu-yang-zaw gë, hkin-jawng a-gi pe e mau-sau ka sara pe law ma ap pyam ra. Yang maw Yang le sat pyam ra hkyaw daw-dan lwi, gaw-tu-a-myu e law shut ap pyam bakaw ra.
34Yang maw gë, Yang le roi-rip kut lwi, saw-kan pye gyun le e, Yang le nu lwi, sat pyam bakaw ra. Sum ni htang le Yang dum dwi taw law bura,” ga e.
Yaku e Yawhan gë a-rawng-a-ya dung kaw e
35Hau hkun Zebedi yang-zaw Yaku e Yawhan gë, Yang jang shut hwi e lwi, “Sara e, nga nik dung-ma-dung Nang nga nik le bi ra, nga nik aw le,” ga lwi, Yang le tai kaw e.
36Yang gë “Ngaw nung nik ma-tu hai kut ra aw akaw lu?” ga lwi, yang nik le mi e.
37Yang nik gë, “Nang e hpung-wup ma Nang e law-yaw shut ra yu, Nang e law-pai shut ra yu, waw zung taw ra ahkang, nga nik le bi la,” ga lwi, Yang le tai kaw e.
38Yesu gë, “Nung nik hai dung e le nung nik a se kaw. Ngaw shu e gawm le, nung nik waw shu kaw ra lu? Ngaw hkam yu e baptisma le, nung nik waw hkam kaw ra lu?” ga lwi, yang nik le tai e.
39Yang nik gë, “Nga nik waw kut ra,” ga kaw e. Yesu gë, “Ngaw shu e gawm le nung nik le shu ra ngut taw akaw. Ngaw hkam yu e baptisma le nung nik hkam yu ra ngut taw le.
40Ngut-kaw-lang, Nga e law-yaw law-pai shut waw zung taw ra ahkang Ngaw a waw bi. Hau gë, lajang taw bi e bang e ma-tu za ngut le,” ga lwi, yang nik le tai e.
41Ahkwi gaw-tu lagyaw ra htse yu hau dang le waw gyaw jang, yang maw Yaku e Yawhan le nik-yaw kaw e.
42Hau mu Yesu yang maw le wut yu lwi, “gaw-tu-a-myu le up ra ahkang waw yu bang gë, yang mawe a-htaw ma reng ni le e, hpung-wup e dut bang gë, yang maw a-htaw ma up ni e le, nung maw se ni akaw.
43Nang maw jang kum gë, hau dawng a ngut. Nung maw htaw je kaw nau su, aw ngut-kaw-lang, nung maw e dwi-nang-zaw-shang dut shang ga.
44Nung maw jang ma u-lum dut nau su aw ngut-kaw-lang, lung-lang bang e jun dut shang ga.
45Hka-su-mu-ga-lo, hau byu-yang-zaw lang, ge, dwi-nang-zaw-shang le jun zaw ra je le e a ngut, dwi-nang-zaw-shung e a-mu le zwi bi ra e, byu myaw myaw e ma-tu Yang asak le gung malai ahpau kut bi ra, ga lwi, je le e,” ga lwi, tai e.
Bara-teme fe law ge bi e
46Hau hkun yang maw gë, Yerihko wa shut je kaw e. Yesu gë, Yang e lagyaw pe e byu ra-jum-ra-wi maw e ra-ha Yerihko mai htaw law kaw le. Teme yang zaw Bara-teme ming e myaw jit lwi, dung zaw e su ra yu hau hkyaw yam ma zung taw e.
47Nazaret wa Yesu ngut le yang waw gyaw jang, “Dawi yang zaw Yesu e, ngaw le shaw-gyaw la aw!” ga lwi, puk dung e.
48Byu myaw myaw wa yang sim za ni byu shang ga, yang le jet kaw e. Yang yu, “Dawi yang zaw e, ngaw le shaw-gyaw la aw!” ga lwi, je puk htan e.
49Yesu gë, yap-taw u-jang, “Yang le wut law ke!” ga e. Hau mu lwi, yang maw hau myaw-jit su le wut le e, “Ngwi-ngawn shang ga! taw a! Yang nang le wut taw ra, ga kaw e.”
50Yang gë, yang e me-bu hkyut pyam taw le e, taw lwi, Yesu jang shut hwi e-law e.
51Hau hkun Yesu yang le, “Ngaw nang le hai kut bi ra, nang aw le lu?” ga tai e. “Myaw-jit su gë, Rabunai e, nga myaw myang shang ga aw,” ga lwi. Yang le tai e.
52Yesu gë, “Saw e-law a! Nang e lum-jing e gë, nang le law ge bi be,” ga lwi, yang le tai e. Hau yu gë, hau hkun-jang myaw myang lwi, hkyaw ma Yang htang chang ni be.
Obecnie wybrane:
Marku 10: ATB1951
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© British and Foreign Bible Society 1951
