MATIU 17
17
A tarabesi Jisas mo varavara
1Lo tagui rani gaiono i Jisas mo lai Bita, Jemis ko i Jon i tuana meie, ko mo tomueginire ram hage gahera lo ului vusi u eno namawe. 2Lune ram leo bibie, a tarabesine mo dori: a nagona mo varavara mwere na aho ko a luqana mo voragi mavutegi mwere na leleo. 3Ko ingere gaitolu hi ram lehi Mosis ko i Elaeja rom laqalaqa mei Jisas. 4I Bita mo veve lawe Jisas vena, Huqe, u garea ve da toga hano; tare ve gom tarani, nain vei na vale siusiu gaitolu tangaha, gatagale hurigo, gatagale huri Mosis ko gatagale huri Elaeja.” 5Lune nge mo laqa mosigei, ram leo, a dodo varavara mo vonai mo vivi gorora ko a dilogi mo vonai dena dodo, mo veve vena: “Naha i Netuku a Mweratabe. Nam leo mana ginie - nen ronghurie! 6Lune ira rorongtagi ram rongo na dilogi ram matagu liu, ram taqao lo tano. 7I Jisas mo vonai lobera mo sikelire, mo veve vena, “Nen maraga, nen mese matagu!” 8Lune ingere ram lalangau, rahe lehi ihine tea vage nge i Jisas hogosie.
9Lune ram hivo dena vusi, i Jisas mo gato gorora, mo veve vena, “Nen mese veve lawe hine tea huri na hueri neu lehe, vin dadari lune ineu i Netui Tangaloi nain maraga taligu dena mateana. 10Ko ira rorongtagi ram hui Jisas ram veve vena, “?Huri hava gineu ira huhui talo Leo hora noi Mosis ram veve vena a leo u labe ve i Elaeja vin vonai gitomue?” 11Nge mo duvi lawera, mo veve vena, “A hogo, Elaeja u vonai gitomue, ve vin vei vagatai na gineu doluegi. 12Nge ineu nam veve lawe gimiu vena, i Elaeja u vonai beno, ko a sinobu rahe iloe tea, ko rau vei lawea a hava gineu mwere rau tarani. Mwerehi vage ingere rain vei Netui Tangaloi vin rongogagarasi.” 13Siu ira rorongtagi ram iloe ve nge mo laqa lawera huri Jon Garuhigogona.
I Jisas mo vagamwasoi na mwalakelo mena vui esi
14Lune ingere ram dadari lobera sinobu, a tangaloi gatagale mo vonai lobei Jisas, mo sisiqeu goroe, 15ko inge mo veve vena, “Huqe, gon hagavi netuku! Ingeie mo matemategi vule u esi liu. A vevenagi gesegi nge mo soi sulolo avi sige lolo wai. 16Nau leie lawera nomu rorongtagi, ko ingere rahe vai vagamwasoie laie tea. 17I Jisas mo duvi vena, “E gimiu ira tangaloi ladosavi ne he rongo na leo tea! ?Nain toga mei gimiu vin dadari tagaha? ?Nain gagarasi huri gimiu vin dadari tagaha? Nen lai na mwalakelo hi vonai tangaha laweau! 18I Jisas mo hora na vui esi ko mo mwalue denie, ko a mwalakelo hi mo mwaso vurugegi lo rani ngehi. 19Siu ira rorongtagi ram vonai lobei Jisas ko ram hui rorongo ginie vena, “?Huri hava gineu igamai gahe vai lei tea vena gan vuro lue na vui esi?” 20Nge mo veve lawera vena, “A vevenagi nomiu ladohogo u biti. A hogo, nam veve lawe gimiu vena, tare ve a nomiu ladohogo u lawua mwere na toli baka, gimiu nein veve lai lawe na vusi ngaha vena, ‘Maraga den tangaha, gon vano tahi,’ ko nge vin vano. Hatie hava gineu huri ve igimiu nein he vai lei tea. 21[Nge a tataro koa gologolo hogosie vin vuro vohogi lai na gineu mwere ngaha; hatie gineu wagineu vage.]”
I Jisas mo veve taligu huri na nona mateana ko nona maragaana
22Lune ira rorongtagi ram vonai bubugi a Kalili, i Jisas mo veve lawera vena, “Rain lei i Netui Tangaloi talo limara tangaloi 23ve rain vei vagamatea; nge lo bongi gaitoligi nge vin maraga taligu.” Ira rorongtagi ram hahagavi u liu.
I Jisas ko i Bita rom voli takis huri na Sara Gogona
24Lune i Jisas meire nona rorongtagi ram dadari Kabeniam, a tangaloi vile takis huri na Sara Gogona ram vonai lobei Bita ram huie vena, “?A nomiu huhui mo voli na takis sige hatie?” 25I Bita mo duvi gorora vena, “Io.” Lune i Bita mo ahu lolo vale i Jisas mo veve lawea tomue vena, “?Saemon, gom lado wuraha? ?Ihine mo voli na takis lawera ratahigi talolo ure ngaha? ?Ira tagivanuara sige ira halavano?” 26I Bita mo veve vena, “Ira halavano.” Siu i Jisas mo veve lawea vena, “Tau ira tagivanuara ra he voli tea takis. 27Nge da he tarani tea ve dain vei tatureginire. Tau gon hivo lo wai ko gon tuli na gau, gon reve na muei ige hi mo wali na gau, ko goin waga na wuwana goin haqe na homu u tatarise huri na noku takis ko a nomu; goin leie ko goin voli na nodaru takis ginie.”
Obecnie wybrane:
MATIU 17: HNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific, 2013
