Genesis 7
7
Ran ni Tharey e Fayleng
1Me ga’ar SOMOL ngak Noah, “Mmarod girdi’en e tabinaw rom ngalan fare barkow; ya kug pir’eg ni kemus ni gur u fithik’ e girdi’ e ka gab fel’ u wun’ug. 2Ra bmit e gamanman ni kug duwgiliy ni ngu’un pi’ ni maligach ni aram e gamanman nrayag ni ngan longuy, ma medlip e pumo’on nge medlip e ppin e ngam fek ni nge un ngom, ma gamanman ni kug duwgiliy ndab un pi’ ni maligach e kemus ni ta’reb e pumo’on nge ta’reb e bpin e ngam fek nge un ngom. 3Ma ka ga fek medlip wu’ e arche’ u bmit e arche’ nge bmit. Mu rin’ ni ara’ rogon nge bmit e gamanman nge arche’ me par nib fos ngkur diyen gad bayay u daken e fayleng. 4Ya ka medlip e rran mu gu pi’ e n’uw nge yib nga daken e fayleng ni bayi par ni nge aw ni aningeg i ragag e rran nge nep’, ni fan e nge thang mit urngin e pin’en nib fos ni kug sunumeg.” 5Me rin’ Noah urngin e tin keyog SOMOL ngak ni nge rin’.
6Me Noah e 600 e duw yangren ko ngiyal’ ni ba’aram ni yib e ran nge tharey daken e fayleng. 7Ir nge le’engin, nge pifakrow ni pumo’on nge le’engirad e ranod ngalan fare barkow nge dabi li’rad e ran ni bayib nge tharey e fayleng.#Mat 24:38, 39; Luk 17:27 8Fapi gamanman nike duwgiliy Got ni ngu’un pi’ ni maligach nge gamanman nike duwgiliy Got ndab un pi’ ni maligach, nge arche’, nge gamanman ni ba’achig 9nra uned ngak Noah ngranod ni yu lal’agruw nreb e bpin nge reb e pumo’on ngalan fare barkow, ni bod rogon ni yog Got. 10Ma fa’ani chuw fa medlip i rran me yib e ran nge tharey e fayleng.
11Nap’an ni gaman 600 e duw yangren Noah, ko chirofen ni ragag nge medlip fen e pul ko bin l’agruw e pul, ma urngin e alublub ni yib ko ran nu tanebut’ u fithik’ e fayleng e mab nib tomgin, me aw e n’uw ni ba ga’, 12me aw e n’uw nga daken e fayleng ni aningeg i ragag e rran nge nep’. 13Ma ka chirofen nem, me yan Noah nge le’engin, nge fa dalip i pagel ni fakrow, ni aram Shem nge Ham nge Jafeth, nge pi le’engirad ngalan fare barkow. 14Me un urngin mit e gamanman ni malboch ngorad, nge gamanman nib mongmor, nge gamanman nib achig, nge urngin mit e arche’. 15Reb e pumo’on nge reb e bpin u bmit nge bmit urngin ban’en nib fos nra uned ngak Noah ngalan fare barkow, 16ni bod rogon ni yog Got ngak Noah. Ma aram me ning SOMOL fare mab nga ftikeru’ Noah.
17Ma fare ran nike tharey e fayleng e aningeg i ragag e rran ni i ga’ i yan, me dib’ag e ran nge chibiy fare barkow u daken e but’ ngalang. 18Me ga’ e ran i yan, me pes fare barkow. 19Me ga’ i yan nge tharey urngin e burey nib th’abi tolang, 20ma aram me ki mun rliw’ nge lal e fit nga tolngin u daken p’ebugul fapi burey. 21Ma urngin ban’en nib fos ni bay u daken e fayleng e ra m’ad, ni arche’, nge urngin mit e gamanman nge urngin e girdi’. 22Urngin ban’en nu fayleng ni bay e pogofan rorad e ra m’ad. 23Me thang SOMOL owchen urngin ban’en nib fos ni bay u daken e fayleng, ni girdi’, nge urngin mit e gamanman nge arche’. Kemus ni pi’in nda nthang owcherad e Noah nge pi’in yad bay u lan fare barkow. 24Mi i ga’ e ran u daken e fayleng i yan ni 150 e rran.
Obecnie wybrane:
Genesis 7: YAP
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2007 Bible Society of Micronesia. Released under the Creative Commons CC-BY-SA license 4.0.
