Karikani B'aai 3
3
Ana bure te aomata, ao tuaana iroun te Atua
1Ao e rangi ni wanawana riki te naeta mai buakoia maan aika kawakawa aika E kariki te Atua. Ao E titiraki te naeta nakon te aine ni kaangai, “E tuangngkami te Atua b'a kam na aki kang uaani kaai man te nne n aroka?” 2Ao e kaeka te aine ni kaangai, “Ti kona ni kang uaani kaai nako n te nne n aroka, 3ma ti uaan te kai are i nuuka ae ti na aki kanna. E tuangiira te Atua b'a ti na aki kana uaana, ke n taua; ti na boni mate ngkana ti kanna.”
4Ao e kaeka te naeta ni kaangai, “Bon te kaairua anne; kam na bon aki mate 5b'a E ataia te Atua b'a ngkana kam kanna, ao kam na riki n ai arona, ao kam na ataa iai te raoiroi ma te buakaka; ao bon anne bukina are E katabua iai kanakina i roumi.”
6Ao e noora te kai arei te aine b'a e tamaroa taraana, ao e rangi n raoiroi uaana n te kanaki, ao e a anaaki riki nanona ngke e na wanawana iai. Ma ngaia are, e anai uaana ao e kang. Ao i mwiina, e a manga angan teuare buuna, ao e kanna naba teuarei. 7Ni bon te tai naba are a kanna iai, ao e a reke i rouia te wanawana, ao a tib'a ataia ae a bebeekan. Ma ngaia are, a itutui baan kaai aika biiku, ao a karabaniia iai.
8Ao ngke e moan tairiki i m'aain te roo, ao a ongongo m'akaikain waen te Atua ngke E nakonako i nanon te nne n aroka, ao a karabaia mai Rouna i buakon taian aroka. 9Ma E weewete te Atua ni wetea te mm'aane, ao E taku, “Ko mena ia?”
10Ao e taku teuarei, “I ongo m'akaikaim i nanon te nnenaroka, ao I maaku, ao I karabaai mai Roum i bukina ngke I bebeekan.” 11Ao E titirakinna te Atua ni kaangai, “Antai ae e tuangko b'a ko bebeekan? Ko a tia ni kana uaan te kai are I tuangko b'a ko na aki kanna?”
12Ao e kaeka te mm'aane ni kaangai, “E anganai te uaanikai neiere Ko anganai b'a raou, ao I kanna.” 13Ao E a manga titirakina neierei te UEA ae te Atua ni kaangai, “E aera ngkai ko karaoa aei?” Ao e kaeka neierei ni kaangai, “E kam'aneai te naeta b'a N na kanna.” 14Ao E a manga taku te UEA ae te Atua nakon te naeta, “Ngkai ko a tia ni karaoa aei, ao n te tai aei, ao bon ti ngkoe ae ko na tekebuaka mai buakoia maan ni kabane. Ko na kawakawa i aon birotom, ao ko na kaakana bubun aontano i nanon am bong ni kabane. 15N na karika te i kairiribai i marenam ma neiei n aki toki, ao i marenaia naba kanoam ma kanoana. E na kamanatua atuum, ao ngkoe ko na tenai bukin waena.” 16Ao E a manga taku nakon neierei, “N na kabatiai am kaangaanga n am tai ni bikoukou, ao te maraki n am tai ni bungiia natim. Ao ane e na aki tootoki nanom iroun teuane buum, ao e na taua taekam.” 17Ao E a manga taku nakon teuarei, “Ao ngkoe ngkai ko ongo b'anaan buum ni kana naba te uaanikai are I a tia n tuangko b'a ko na aki kanna, ao ngkai, N na katekebuaka te tano. Ane ko na m'akuri korakora ni kabane bongin maium n riribanaa te tano i bukin karekean kanam. 18A na kaona am nne n aroka taian uteute ma kaai aika a kateketeke, ao ane ko na am'am'arake man arokan te tawaana, ae aroka aika te naa n rikinibeti.#3.18 rikinibeti: Aroka ke kaai aika a riki bon i rouia n aki akaaka. 19A na reke kanam mani maonon ram'am ni karokoa manga okiran te tano are ko boni karaoaki mai iai. Ko karaoaki man te tano, ao ane ko na manga bon okira te tano.” 20Ao e arana buuna Atam #3.20 Atam: N Ebera nanona te reeti n aomata ke aomata. b'a Ewa #3.20 Ewa: N Ebera nanona te maiu. i bukina ngke boni ngaia tinaia aomata ni kabane. 21Ao te UEA ae te Atua, E karaoa te kunnikai man kunin te man i bukin Atam ma buuna, ao E kunnikaiia iai.
22Ao E taku te UEA ae te Atua, “A riki aomata aikai b'a katotongara, ao e a reke i rouia te wanawana n ataa te raoiroi ma te buakaka; a riai n aki manga kariaiakaki ni kana uaan te kai are e anga te maiu, b'a a na aki maiu n taai nako.” 23Ma ngaia are, E kanakoia te UEA ae te Atua man te nne n aroka are Eten, ao E karaoia b'a taan ribanaa te tano are a boni karaoaki mai iai. 24Ao i mwiina, i mainikun te nne n aroka E katikui baike a maiu aika iai baiia ni kiba ma te kabaang ae e uram'aaka i rouia, ao a uaatimaniia te tabo arei ni kabutaa n totokoia aomata ake a na kaaniia te kai are e anga te maiu.
Obecnie wybrane:
Karikani B'aai 3: KNVB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
