मत्तायोस 2
2
लूरगर आलर येसुसन ऎरा गे बरना
1हॆरॊदॆस बॆलासी उल्ला नू यूदेया जिला ता बॆतलहेम पद्दा नू येसुस कुन्द्रस। अबड़ा उल्ला नू पुरुब राजी गुट्ठी तरती जोक्को लूरगर#2:1 ईर बीनको गुट्ठी ही पत्त नू अख़'ऊ आलर हिकनर। आलर येरुसलॆम बरचर ती मेना हेलरर, 2“यहूदीर ही बॆलस कुन्द्रकादस आस एक्सन र'अस? एन्देरगेका ऎम पुरुब तरा आसी बीनकोन ईरकम अरा आसिन ऒड़ लग्गा गे बरचका र'अदम।”
3इदिन मेंजस ती हॆरॊदॆस बॆलस अरा गोट्टा येरुसलॆम अनचकरा केरा। 4ख़ने बॆलस उर्मी यहूदी मुध नैगारिन अरा नॆग सिखाब'उरिन ख़ॊंड़चस ती आरिन मेंजस, “मसीस एक्सन कुन्द्रकादस नेख़'ओन।” 5अबड़र तिंगियर, “यूदेया जिला ही बॆतलहेम पद्दा नू, एन्देरगेका धर्मेसी कत्था तिंगुर इदही पत्त नू एन्ने लिखचका र'अनर।
6‘अनय यूदेया जिला ता बॆतलहेम!
नीन एन्ने हूँ यूदेया ही कड़हाब'ऊ उर्मी नगरे गुट्ठी ती सन्नी मलकी,
निंग्है तिम ओर्त कड़हाब'उस बर'ओस,
आसिम एम्है आलर इस्राऎल आलर ही महरस मनोस।’”#मीका 5:2
7ख़ने हॆरॊदॆस अबड़ा लूरगर आलारिन कलेकसे मीख़ियस ती बीनको ऎथ्रका पत्त नू ठौका ठौका एका बेड़ा नू बीनको ईथ्रकी रहचा मेंजस। 8अरा आरिन बॆतलहेम तइय्यरकी बाचस, “नीम कला ती ख़द्दासी पत्त नू ठौका ठौका मेना ती ख़द्दासिन ख़क्खोर होले एंगन हूँ तेंके, होले ऎन हूँ क'ओन ती आसिन ऒड़ लग्गा ओंगोन।”
9अबड़ा लूरगर आलर बॆलासी कत्थन मेंजर ती केरर। अरा ऎरा! एका बीनकोन आर पुरुब नू ईरकाचर, आद आर ही मुन्द मुन्द ख़द्दासी र'अना अड्डा गूटी केरा अरा आद मइय्याँ इज्जा केरा। 10आर बीनकोन ईरयर ती नगदे रिझ्रर। 11अरा आ एड़पा नू कोरचर ती ख़द्दासिन तंग्यो मरियम गने ईरयर अरा मुलख़रर ती आसिन ऒड़ लग्गियर अरा तंम्है खुर्जी बकसन तिसगर ती सोना, लोबान अरा गन्धरस#2:11 दौ महकारना इसुंग आस गे दान नंजर। 12अरा आर गे तुंगुल नू चॆत ख़क्खरा का हॆरॊदॆस गुसन अमके किर्रा। औंगे आर नन्ना डहरे नू तम्है राजी किर्रिम बिच्चियर।
मिसर राजी गे बोंगना
13अबड़ा लूरगर आलर ही केरका ख़ॊख़ा, उर्बासी ओन्टा पैकस यॊसॆफस गे तुंगुल नू ऎथ्रस ती बाचस, “चो'आ, ख़द्दासिन दरा तंग्योन हो'आ ती मिसर राजी बोंगा कला अरा एका गूटी ऎन मल ब'ओन आ गूटी अइय्यम र'अके। इदगे का हॆरॊदॆस ख़द्दासिन पिटा गे बेद्दोस।” 14ख़ने यॊसॆफस चॊचस ती माख़म ख़द्दासिन दरा तंग्योन होच्चस ती मिसर राजी केरस। 15आस हॆरॊदॆसी अरगी खे'अना गूटी अइय्यम रहचस। ईद ती उर्बस धर्मेसी कत्था तिंगुर ती तिंका कत्था मंजा का “ऎन मिसर राजी ती एंग्दासिन मीख़कन।”#हो 11:1
ख़द्दर ही पिटना
16ख़ने हॆरॊदॆस बॆलस अबड़ा लूरगर आलर एंगन ठकचकानर बाचस ती नगदे कैरारस। ख़ने आस बॆतलहेम अरा अदही उर्मी सिवान ता उर्मी ख़द्दारिन फउद तइय्यस ती पिटताचस, अन्नेम अबड़ा लूरगर आलर ती मेंजका उल्ला ही लेक्खा अबड़ा पिटतारका ख़द्दर ऎंड़ बछर ख़द्दर महले अदिन ती जुक्की ही रहचर। 17हॆरॊदॆसी ई नलख ती धर्मेसी कत्था तिंगू येरेमियास ती तिंका कत्था मंजकी किरकी रहचा:
18“ओन्टा चींख़ना अरा बग्गे खोबरारना
रामा पद्दा नू मेन्द्र'ई।
राख़ॆल तंग्दाबगर गे चींख़ा लगी
अरा ठकर'आ मल बेद्दा लगी,
एन्देरगेका आर मलकर।”#यिर्म 31:15
मिसर राजी ती किर्रना
19हॆरॊदॆस बॆलासी केचका ख़ॊख़ा उर्बासी ओन्टा पैकस मिसर राजी नू यॊसॆफस गे तुंगुल नू ऎथ्रस। 20अरा बाचस, “चो'आ, ख़द्दासिन अरा तंग्योन हो'आ ती इस्राऎल राजी किर्रिम बि'आ, एकार ख़द्दासिन पिटा गे बेद्दालियर आर गा केच्चर केरर।”
21औंगे यॊसॆफस चॊचस ती ख़द्दासिन अरा तंग्योन होच्चस ती इस्राऎल राजी किर्रियस। 22लिकिन अरख़ेलोस तम्बा हॆरॊदॆसी अड्डा नू यूदेया नू राजी ननालदस, इदिन मेंजस ती यॊसॆफस असन काला गे इल्चियस। अन्ति तुंगुल नू चॆत ख़क्खियस ती गलिलेया जिला केरस। 23अरा नासरेत नामे पद्दा नू केरस ती ओक्रस। होले धर्मेसी कत्था तिंगुर ती बारकी रहचा, “आस नासरेत ता आलस बार'ओस” आ कत्था मनन नेकअन।#मर 1:24; लूक 2:39; यॊ 1:45
Obecnie wybrane:
मत्तायोस 2: KURUXBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
