MATTHAI 10
10
1Cun a zultu hleihnih kha a sinah a kawh hna i thlarau thur ṭhawlkhawhnâk ṭhawnnâk le zawtnâk le fahnâk phun kip damter khawhnâk nawl kha a pêk hna. 2Lamkaltu hleihnih an min cu, a hmaisa bikah, Peter tiah kawhmi Simon le a unau Andria, Zebedi fapa Jeim le a nau Johan, 3Filip le Bartholomi, Thomas le ngunkhuai khawltu Matthai, Alfai Fapa Jeim, Thadias ti zongah kawhmi, Lebbai, 4Kanan mi Simon le Amah rawitu Judas Iskariot kha an si. 5Hleihnih hna kha Jesuh nih a thlah hna i an sinah hitihin nawl a pêk hna. “Gental mi hna lamah va kal hlah u law, Samaria mi hna khua zongah lut hlah u. 6Sihmanhsehlaw Israel miphun a tlaumi tuu hna sinah va kal u. 7Nan kalnâk kipah, ‘Vanbawi pennâk cu a nai cang’ tiah nan chim lai. 8Mizaw damter u law, thinghmuimi thianter hna u, mithi kha thawhter ulaw, khuachia ṭhawl hna u. Man loin nan hmuh i man loin pe hna u. 9Nan taisawm ah sui, ngun, phaisa le ngun phaisa kha i sanh hlah u, 10nan khualtlawn nâkah, zal siseh, angki pahnih siseh, kedan siseh, ṭhiangṭhunh siseh i ken hlah u, rianṭuantu cu ei awk hmuh awkah â tlâkmi a si. 11Khuapi ah siseh, khuate ah siseh nan luhnâk pauh ah, tlun awk tlâk kawl hna ulaw, nan chuah ṭhân hlan lo cuka ah cun um u. 12Cun inn i nan luh lai ah an kut nan tlaih hna lai. 13Â tlâkmi an si ahcun, nan i kenmi daihnâk an cungah hmun seh. An i tlâk lo ahcun nan daihnâk kha nan sinah kir ṭhân seh. 14An cohlang lotu le nan bia a ngai lotu pauh cu cu inn siseh, cu khua siseh nan chuah lai ah nan ke i leidip kha thing ta u. 15Biataktein kan chimh hna, biaceih ni ah Sodom le Gomora khua temtuarmi nâkin cu hna khua temtuar hngami cu ṭih a nung deuh lai. 16Zohhmanh u, Cenghngia lak i tuu bangin kan thlah hna. Rul bangin fim u law, fahnâk ape bal lomi ṭhuro bangin um u. 17Asinain minung lakah i ralring u, biaceihnâk sangah an in phâkpi hna lai i sinagog chungah an in velh hna lai. 18Keimah ruangah uktu le hruaitu hna sinah an in phâkpi hna lai, anmah le Gental mi nih ka bia an theih khawh nâkhnga. 19Asinain cubantuk i tlaihkhih nan si tikah, zei bia le zeitindah ka chim lai, tiah buai hlah u. Nan chim ding cu a cân te ah pêk nan si ko lai, 20zeitintiah a chimtu cu nanmah si loin nan Pa Thlarau nih nanmah ah a chim te ko lai. 21Thah awkah unau an i leirawl lai, pa le fa zong an i rawi lai i fa le zong nih annu le anpa thih tiangin an doh hna lai. 22Ka min ruangah mi vialte huat nan tong lai. Asinain a donghtiang a hmunmi cu khamh an si lai. 23Hi khua i an in serhsat hna ahcun, khau dangah zâm u. Biataktein kan chimh hna, Mi Fapa a rat hlanah, Israel khua hna hi nan ṭol dih manh lai lo. 24Zultu a zulhmi cungah a um lo; sinum zong a bawi cungah a um lo. 25Zultu nih zulhmi a lawh cu ai za ko, sinum nih a bawi a lawh zong ai za ve ko. Inn ngeitu pa hmanh Beelzebul an ti ahcun, a chung le hna cu an ti chinchin hna lai. 26Cucaah annih cu ṭih hna hlah u; lang lo dingin chinhmi zeihmanh a um lo, hngalh lo dingin thuhmi zeihmanh a um lo. 27Mui lak i kan chimhmi hna hi, chun ceu ah thanh u law, hna in nan theihmi kha inn cungah kai piin thanh u. 28Taksa a that kho nain thlarau a that kho lotu cu ṭih hlah u. Hremhmun i thlarau le taksa he a thla khotu khi ṭih deuh u. 29Pithlung pahnih kha phaisa sen pakhat ah an zuar tawn. Cu hna lak i pakhat te hmanh khi nan Pa theihpi loin an tlonglêng lo. 30Nan samfa tiangin rel dih a si. 31Cucaah ṭih hlah u, pithlung tampi nâkin nan sunglawi deuh. 32Cucaah mi hmaiah aka ṭanhtu cu, van i ka Pa hmaiah ka ṭanh ve lai. 33Asinain mi hmai i aka hlawtu cu, van i ka Pa hmaiah ka hlawt ve hna lai. 34Lei ah daihnâk phâkter awkah ara tiah ka ruat hlah u, daihnâk si loin vainam chuahtertu ah ka ra. 35Zeitintiah fapa apa doh ding le, fanu anu doh ding le, mo nih ava nu dohter dingin ka ra. 36Minung a ral ngan bik cu amah innchungkharmi lila a si lai. 37Apa siseh, anu siseh, Keimah nâk i a dawt deuh ahcun kami si awkah â tlâk lo. A fapa siseh, a fanu siseh Keimah nâk i a dawtdeuh ahcun kami si awkah â tlâk lo. 38Ahohmanh a vailam putin aka zul lomi cu kami si awkah â tlâk lo. 39Ahohmanh a nun humhâk a duhmi nih a hloh lai i Keimah ruangah a nun a hlohtu nih a hmuh lai. 40Nanmah an cohlângtu cu Keimah cohlângtu an si. aka cohlângtu cu aka thlahtu cohlângtu an si. 41Profet cohlângtu cu Profet cohlân man a hmuh lai i miding cohlângtu cu miding cohlân man a hmuh lai. 42Cun ahohmanh hi mi hna lak i a hme bik hmanh hi, aka zultu a si ruang i ti hraikhat a petu cu, biataktein kan chimh hna zeitileihmanh in a ṭuanman a sung hrimhrim lai lo.
Obecnie wybrane:
MATTHAI 10: HAKABSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
