Lukas 22
22
Cov Thawjcoj Nrhav Kev Nteg Yexus
(Mathais 26.1-5; Malakaus 14.1-2; Yauhaas 11.45-53)
1Thaus yuav txug lub sijhawm ua Kevcai Noj Ncuav tsi xyaw Keeb kws hu ua Kevcai Hlaa Dlhau.#Tsd 12.1-27 2Cov thawj ntawm cov povthawj hab cov xwbfwb kws qha Vaajtswv txuj Kevcai txawm nrhav kev yuav nteg Yexus tuabywv coj moog tua povtseg, rua qhov puab tsi xaav nteg Yexus taabmeeg cov pejxeem, nyob tsaam suavdlawg ntxhuv.
Yudas Ntxeev Sab rua Yexus
(Mathais 26.14-16; Malakaus 14.10-11)
3Dlaab Ntxwgnyoog tshoov Yudas Ixakali-us tug kws yog ib tug ntawm kaum ob tug thwjtim sab. 4Yudas has rua cov thawj ntawm cov povthawj, hab cov thawj tubrog kws zuv lub Tuamtsev has tas, nwg yuav coj puab moog nteg Yexus le caag. 5Puab zoo sab hab txaus sab yuav muab nyaj rua Yudas. 6Yudas pum zoo le puab has, nwg txawm nrhav sijhawm coj puab moog nteg Yexus thaus tsi muaj tuabneeg pum.
Npaaj Pluag Mov Ua Kevcai Hlaa Dlhau
(Mathais 26.17-25; Malakaus 14.12-21; Yauhaas 13.21-30)
7Thaus txug nub kws ua Kevcai Noj Ncuav Tsi Xyaw Keeb kws yog nub kws puab tua mivnyuas yaaj noj ua Kevcai Hlaa Dlhau. 8Yexus khaiv Petus hab Yauhaas, hab qha rua obtug has tas, “Meb ca le moog npaaj pluag mov ua Kevcai Hlaa Dlhau rua peb noj.”
9Obtug nug Yexus has tas, “Koj xaav kuas wb moog npaaj rua qhov twg?”
10Yexus teb has tas, “Thaus meb moog txug huv lub nroog, yuav muaj ib tug txivneej kwv ib lub hub dlej lug ntsib meb. Meb ca le lawv nwg qaab moog huv tsev 11hab has rua tug tswv tsev tas, ‘Tug Tswv has tas, koj yuav muab chaav twg rua kuv hab kuv cov thwjtim noj pluag mov ua Kevcai Hlaa Dlhau?’ 12Tug tswv tsev yuav coj meb moog qha ib chaav dlaav dlaav kws nyob txheej sau hab tub muaj rooj muaj tog txhij lawm rua meb, meb ca le npaaj txhua yaam rua qhov ntawd.”
13Obtug txawm moog hab pum muaj txhua yaam lawv le Yexus has, hab obtug npaaj pluag mov ua Kevcai Hlaa Dlhau rua qhov ntawd.
Tug Tswv Rooj Mov
(Mathais 26.26-30; Malakaus 14.22-26; 1 Kauleethaus 11.23-25)
14Thaus txug sijhawm noj mov lawm, Yexus hab Yexus cov timthawj lug nyob ntawm rooj mov. 15Yexus has rua puab tas, “Kuv xaav nrug mej noj pluag mov ua Kevcai Hlaa Dlhau nuav, ua ntej kws kuv raug kev tsimtxom! 16Kuv qha rua mej has tas, ‘Txij nuav moog kuv yuav tsi noj le nuav moog txug nub kws pluag mov ua Kevcai Hlaa Dlhau tav nyob huv Vaajtswv lub Tebchaws.’ ”
17Yexus muab khob cawv txiv maab lug ua Vaajtswv tsaug hab has tas, “Mej ca le txais lub khob nuav moog haus. 18Kuv qha rua mej has tas, txij nuav moog kuv yuav tsi haus cov cawv txiv maab nuav moog txug nub kws Vaajtswv lub Tebchaws lug.”
19Yexus muab ib lub ncuav lug ua Vaajtswv tsaug, nwg muab ndlais faib rua puab hab has tas, “Ntawm nuav yog kuv lub cev kws kuv muab pub rua mej. Mej ua le nuav, mej txhaj yuav ncu ntsoov kuv.” 20Thaus puab noj mov taag, Yexus muab ib khob cawv txiv maab lug ua ib yaam nkaus le ntawd, nwg has tas, “Lub khob nuav yog Vaajtswv txujlug cog tseg tshab kws muaj kuv cov ntshaav#22.20 Tej phoo qub tsi muaj Yexus cov lug kws has tas, nuav yog kuv lub cev, huv nqai 19 hab taagnrho nqai 20. ndlwg lug ua lub homthawj nas rua lawm.#Yel 31.31-34
21“Tabsis mej saib, tug kws ntxeev sab rua kuv, nwg nrug kuv nyob ntawm rooj nuav ntaag! #Pnk 41.9 22Tuabneeg Leej Tub yeej yuav tuag lawv le Vaajtswv npaaj tseg lawm, tabsis tug kws ntxeev sab rua Tuabneeg Leej Tub, nwg yuav raug kev puamtsuaj!”
23Ces cov timthawj txawm sis nug has tas, peb leejtwg yog tug yuav ua le ntawd?
Sis Caav Has Tas Leejtwg Yuav Tau Ua tug Luj dlua ndlais
24Cov thwjtim sis caav has tas, “Peb leejtwg yuav tau ua tug luj dlua ndlais?”#Mat 18.1; Mak 9.34; Luk 9.46 25Yexus has rua puab tas, “Lwm tsaav tuabneeg cov vaajntxwv kws muaj fwjchim kaav puab tej pejxeem, hab tej numtswv kws muaj fwjchim hu puab has tas, ‘Cov kws saib cov Pejxeem.’ #Mat 20.25-27; Mak 10.42-44 26Tabsis mej tsi xob ua le ntawd; mej cov yog leejtwg xaav ua tug hlub, tug ntawd yuavtsum ua ib yaam le yog tug yau, hab tug twg yog tug thawjcoj, tug ntawd yuavtsum ua ib yaam le tug tubkhai.#Mat 23.11; Mak 9.35 27Tug twg yog tug luj dlua? Tug kws nyob quastsawg noj mov lossis tug tubkhai? Tub yog tug kws nyob quastsawg noj mov ntaag. Tabsis kuv nrug mej nyob, kuv ua ib yaam le tug tubkhai.#Yhs 13.12-15
28“Txhua lub sijhawm kws kuv raug kev txomnyem, mej tsi tau tso kuv tseg; 29kuv Txiv tsaa kuv ua tug muaj fwjchim kaav lub nplajteb le caag, kuv yuav tsaa mej kuas muaj fwjchim ib yaam le ntawd. 30Mej yuav tau nrug kuv noj hab haus nyob ntawm kuv lub rooj huv kuv lub Tebchaws, hab mej yuav tau nyob sau lub zwmtxwv txav txim rua kaum ob xeem Yixalayees.”#Mat 19.28
Petus Yuav tsi Leeg Paub Yexus
(Mathais 26.31-35; Malakaus 14.27-31; Yauhaas 13.36-38)
31Yexus has tas, “Ximoos, Ximoos! Koj noog kuv has! Vaajtswv tub ca dlaab Ntxwgnyoog lug sim mej txhua tug sab lawm, muab tug zoo cais tawm ntawm tug phem, ib yaam le tug yaaj nplej muab vaab ntxuaj cov npluag tawm ntawm cov nplej. 32Tabsis Ximoos, kuv tub thov Vaajtswv paab koj lawm, kuas koj muab sab rau ntseeg. Hab thaus koj lug cuag kuv, koj yuavtsum txhawb koj cov kwvtij zug.”
33Petus teb has tas, “Tug Tswv, kuv txaus sab nrug koj raug kaw rua huv tsev lojcuj hab tuag nrug koj!”
34Yexus has tas, “Petus, kuv qha rua koj has tas, mo nuav thaus qab tsi tau qua, koj yuav has peb zag has tas, koj tsi paub kuv.”
Naab Nyaj, Naab Thoobpuab, hab Raab Ntaaj
35Ces Yexus nug puab has tas, “Zag taag lug kuv khaiv mej moog, mej tsi nqaa naab nyaj, naab thoobpuab hab khau, mej puas tu ncua ib yaam dlaabtsi?”#Mat 10.9-10; Mak 6.8-9; Luk 9.3; 10.4
Puab teb has tas, “Peb si tu ncua dlaabtsi le.” 36Yexus has tas, “Tabsis nwgnuav, tug kws muaj naab nyaj lossis naab thoobpuab, tug ntawd yuavtsum nqaa moog; tug kws tsi muaj ntaaj, nwg yuavtsum muab nwg lub tsho luj muag hab moog yuav ib raab ntaaj. 37Kuv qha rua mej has tas, Vaajtswv txujlug has tas, ‘Luas suav nwg nrug cov tuabneeg muaj txim.’ Lu lug kws has txug kuv ntawd yeej yuav tav, rua qhov tej kws sau has txug kuv ntawd taabtom yuav tav.” #Yay 53.12
38Cov thwjtim has tas, “Tug Tswv, koj saib ntawm nuav! Peb muaj ob raab ntaaj!”
Yexus teb has tas, “Tsi xob has ntxiv lawm!”#22.38 Tsi xob has ntxiv lawm; lossis yuav le ntawd xwb tau lawm.
Yexus Thov Vaajtswv sau Roob Txiv Ntoo Roj
(Mathais 26.36-46; Malakaus 14.32-42)
39Yexus tawm huv lub nroog moog rua peg Roob Txiv Ntoo Roj lawv le nwg ibtxwm moog; hab cov thwjtim nrug nwg moog. 40Thaus puab moog txug peg, Yexus has rua puab tas, “Mej yuavtsum thov Vaajtswv, kev sim sab txhaj yuav ntxag tsi tau mej.”
41Yexus txawm ncaim puab moog nrug dleb kwvlaam le laim ib ncuas pobzeb, nwg txhus caug ndlua rua ntawm ib saab pobzeb hab thov Vaajtswv has tas, 42“Txiv, yog koj pum zoo, thov koj muab lub khob nuav tshem ntawm kuv moog. Txawm yog le caag los koj tsi xob ua lawv le kuv lub sab nyam, tabsis ua lawv le koj lub sab nyam xwb.” 43Muaj ib tug timtswv ceebtsheej tshwm lug rua Yexus pum hab txhawb Yexus tug zug. 44Yexus nyuaj sab kawg nkaus, nwg hajyam siv zug thov Vaajtswv heev; nwg tawm fws zoo le ntshaav nrug rua huv aav.#22.44 Tej phoo qub tsi muaj nqai 43-44.
45Thaus Yexus thov le ntawd taag, nwg sawv moog rua ntawm cov thwjtim, hab nwg pum puab tsaug zug taag lawm, Rua qhov puab nyuaj sab heev. 46Yexus has rua puab tas, “Ua le caag mej yuav tsaug zug ua luaj? Mej ca le sawv hab thov Vaajtswv, kev sim sab txhaj yuav ntxag tsi tau mej.”
Nteg Yexus
(Mathais 26.47-56; Malakaus 14.43-50; Yauhaas 18.3-11)
47Thaus Yexus taabtom has le ntawd, muaj ib paab tuabneeg coob coob tuaj txug, Yudas kws yog ib tug ntawm kaum ob tug thwjtim coj cov tuabneeg ntawd tuaj. Nwg txaav zog lug yuav nwj Yexus. 48Tabsis Yexus has tas, “Yudas, koj yuav nwj Tuabneeg Leej Tub qha rua puab nteg nwg los?”
49Thaus cov thwjtim kws nrug Yexus pum has tas yuav muaj xwm, ces puab txawm has tas, “Tug Tswv, koj puas kheev peb muab ntaaj tua puab?” 50Cov thwjtim ib tug rhu hlo ntaaj lug tuab ntaag rua tug Povthawj Hlub ib tug qhev saab nploojntseg xis tu nrho.
51Tabsis Yexus has tas, “Tsum le!” Yexus cev teg moog tuav Tug ntawd lub nploojntseg hab khu rov zoo le qub lawm.
52Ces Yexus has rua cov thawj ntawm cov povthawj, cov thawj tubrog kws zuv lub Tuamtsev, hab cov txwjlaug kws tuaj nteg Yexus ntawd has tas, “Mej nqaa ntaaj nqaa qws tuaj nteg kuv, ib yaam le kuv yog tubsaab los? 53Kuv tub naj nub nrug mej nyob huv lub Tuamtsev, mej tsua tsi nteg kuv? Tabsis nwgnuav tub txug mej lub sijhawm hab txujkev tsaus ntuj lub fwjchim kaav lawm.”#Luk 19.47; 21.37
Petus tsi Leeg Paub Yexus
(Mathais 26.57-58; Malakaus 14.53-54,66-72; Yauhaas 18.12-18,25-27)
54Puab nteg Yexus hab coj nwg moog rua huv tug Povthawj Hlub tsev; Petus lawv qaab moog nrug dleb dleb. 55Muaj tuabneeg rauv ib cubtawg rua ntawm lub tshaav puam, Petus txawm moog nrug cov tuabneeg ntawd nte tawg. 56Muaj ib tug ntxhais qhev pum Petus nyob ntawm ib saab qhovcub, nwg saib ntsoov Petus hab has tas, “Tug txivneej ntuav yog ib tug kws nrug Yexus hab!”
57Tabsis Petus has tas, “Tug muam, kuv yeej tsi paub tug ntawd le!”
58Tom qaab ntawd mivntsiv, muaj ib tug txivneej pum Petus hab has tas, “Koj yog puab paab ntawd ib tug hab los sav!”
Tabsis Petus has tas, “Txiv ntxawm, kuv tsi yog!”
59Tom qaab ntawd kwvlaam le kws ib txoog teev, txawm muaj dlua ib tug txivneej has rua suavdlawg tas, “Tug nuav yeej yog ib tug kws nrug Yexus nyob tag tag le, rua qhov nwg yog ib tug tuabneeg Kalilais hab!”
60Tabsis Petus teb has tas, “Txiv ntxawm, tej kws koj has ko kuv yeej tsi paub le!”
Thaus Petus taabtom has le ntawd, taamsim ntawd qab txawm qua. 61Tug Tswv tig moog saib Petus, ces Petus txawm ncu dlheev txug lu lug kws tug Tswv has rua nwg tas, “Mo nuav thaus qab tsi tau qua, koj yuav has peb zag has tas, koj tsi paub kuv.” 62Petus tawm moog rua saab nrau hab quaj tu sab kawg le.
Puab Ua Saib tsi Taug Yexus
(Mathais 26.67-68; Malakaus 14.65)
63Cov tuabneeg kws zuv Yexus, ua saib tsi taug nwg hab ntaus nwg. 64Puab muab phuam lug paav Yexus qhovmuag hab nug Yexus has tas, “Koj sim twv saib yog leejtwg ntaus koj?” 65Hab puab thuam Yexus ntau yaam.
Cov Numtswv Taug Yexus Zaaj
(Mathais 26.59-66; Malakaus 14.55-64; Yauhaas 18.19-24)
66Thaus kaaj ntug lawm, cov txwjlaug, cov thawj ntawm cov povthawj, hab cov xwbfwb kws qha Vaajtswv txuj Kevcai tuaj saablaaj ua ke, hab puab kuas coj Yexus tuaj sawv taabmeeg puab. 67Puab has rua Yexus has tas, “Koj qha rua peb saib, koj puas yog tug Mexiyas?”
Yexus teb has tas, “Txawm yog kuv qha mej los mej yuav tsi ntseeg; 68hab yog kuv nug mej los mej yuav tsi teb kuv; 69Tabsis txij nuav moog Tuabneeg Leej Tub yuav nyob ntawm Vaajtswv tug kws muaj Fwjchim Luj kawg nkaus saab xis.”
70Puab txhua tug txawm nug has tas, “Koj yog Vaajtswv tug Tub los?”
Yexus teb puab has tas, “Mej has yog lawm.”
71Puab has tas, “Tsi taag peb yuav nrhav timkhawv ntxiv lawm! Rua qhov peb tub nov nwg has lawm!”
Obecnie wybrane:
Lukas 22: HNJ2000
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2000 United Bible Societies. All rights reserved.
