Yauhaas 1

Txujlug Kws Cawm Tuabneeg Txujsa

1Thaus tsi tau tsim lub nplajteb, Txujlug yeej muaj nyob lawm; Txujlug ntawd ibtxwm nrug Vaajtswv nyob, hab Txujlug ntawd yog Vaajtswv. 2Thaus chivkeeb Txujlug ntawd yeej ibtxwm nrug Vaajtswv nyob. 3Vaajtswv kuas nwg tsim ib puas tsaav yaam huv tuabsi; ib puas tsaav yaam ntawd tsi muaj ib yaam kws tsi yog nwg tsim le. 4Txujlug ntawd yog lub hauvpaug txujsa,#1.4 Txujlug ntawd yog lub hauvpaug txujsa; lossis ua kuas txujsa cog ruaj rua ntawm Txujlug. hab txujsa ntawd yog qhov kaaj rua tuabneeg pum kev. 5Qhov kaaj ntawd ci tuaj rua huv qhov tsaus, hab qhov tsaus laum tsi tau qhov kaaj kuas tsaus.

6Vaajtswv khaiv ib tug txivneej kws yog nwg tug tubkhai hu ua Yauhaas#Mat 3.1; Mak 1.4; Luk 3.1-2 7lug qha rua tuabneeg suavdlawg txug qhov kaaj, kuas txhua tug tau nov Txujlug ntawd txhaj lug ntseeg. 8Yauhaas tsi yog qhov kaaj; nwg tsuas lug qha qhov kaaj xwb. 9Qhov kaaj ntawd yog qhov tseeb kws lug rua huv lub nplajteb nuav hab ci rua txhua tsaav tuabneeg pum kev.

10Txujlug ntawd tub lug nyob huv nplajteb nuav lawm, hab Vaajtswv kuas nwg tsim lub nplajteb, tabsis tuabneeg nplajteb tsi paub nwg. 11Nwg lug rua huv nwg lub tebchaws, tabsis nwg tsaav tuabneeg tsi leeg yuav nwg. 12Txawm yog le ntawd los cov tuabneeg kws leeg yuav nwg hab ntseeg nwg; nwg pub puab muaj cai lug ua Vaajtswv cov mivnyuas. 13Qhov kws puab tau lug ua Vaajtswv cov mivnyuas, tsi yog lawv le tuabneeg ibtxwm muaj mivnyuas kws yog muaj nam muaj txiv yug; Vaajtswv yog puab txiv.

14Txujlug ntawd tau lug yug ua tuabneeg, nwg muaj koob moov nplua mag, nwg yog qhov tseeb, hab nwg nrug peb nyob. Peb pum nwg tug tshwjchim ci ntsaa ab, Leej Txiv pub tug tshwjchim ntawd rua nwg, rua qhov nwg yog leej Txiv tuab leeg Tub.

15Yauhaas qha tug ntawd zaaj rua suavdlawg. Yauhaas has nrov nrov has tas, “Tug txivneej nuav yog tug kws kuv tub qha rua mej lawm has tas, ‘Nwg yuav lawv kuv qaab lug, tabsis nwg muaj fwjchim luj dlua kuv, rua qhov nwg yeej ibtxwm muaj nyob ua ntej yug kuv lawm.’ ”

16Nwg hlub peb kawg nkaus, nwg txhaj foom koob moov nplua mag rua peb suavdlawg tsi paub kawg le. 17Vaajtswv muab txuj Kevcai rua Mauxes qha rua peb, tabsis Yexus Khetos qha txujkev hlub hab qhov tseeb rua peb. 18Yeej tsi tau muaj leejtwg pum Vaajtswv ib zag le. Tsuas yog leej Tub kws yog Vaajtswv hab nyob ntawm leej Txiv ib saab, nwg qha Vaajtswv rua suavdlawg paub xwb.

Yauhaas tug Kws Muab Tuabneeg Ua Kevcai Raus Dlej tej Lug Qha

(Mathais 3.1-12; Malakaus 1.1-18; Lukas 3.1-18)

19Cov Yudais cov numtswv kws nyob huv lub nroog Yeluxalees tso cov povthawj hab cov Levis qee leej moog nug Yauhaas has tas, “Koj yog leejtwg?”

20Yauhaas qha tseeb rua puab has tas, “Kuv tsi yog tug Mexiyas.”

21Puab nug has tas, “Koj yog leejtwg? Koj puas yog Eliyas?”

Yauhaas teb has tas, “Kuv tsi yog.”

Puab nug has tas, “Koj puas yog tug kws cev Vaajtswv lug?”#1.21 tug kws cev Vaajtswv lug: Yog tug kws tog kuas tshwm lug hab tshaajtawm has tas tug Mexiyas yuav lug.

Yauhaas teb has tas, “Kuv tsi yog.”#Mal 4.5; 2 Kev 18.15,18

22Puab has tas, “Koj qha rua peb saib koj yog leejtwg tag, peb txhaj paub rov moog qha rua cov tuabneeg kws khaiv peb tuaj. Koj has tas koj yog leejtwg?”

23Yauhaas teb puab lawv le Yaxayas kws yog tug cev Vaajtswv lug sau tseg le nuav:

“Kuv yog tug kws has nrov nrov

tom roob mojsaab qhua tuaj has tas:

‘Khu kev kuas ncaaj tog tug Tswv!’#Yay 40.3 (LXX) ”

24Cov tuabneeg kws cov Falixais khaiv moog ntawd, 25puab#1.25 cov tuabneeg kws cov Falixais khaiv moog ntawd, puab; lossis Cov tuabneeg kws khaiv moog ntawd puavleej yog cov Falixais. nug Yauhaas has tas, “Yog koj has tas koj tsi yog tug Mexiyas, tsi yog Eliyas, hab tsi yog tug kws cev Vaajtswv lug, vim le caag koj tsua muab tuabneeg ua kevcai raus dlej?”

26Yauhaas teb has tas, “Kuv muab tuabneeg ua kevcai raus dlej tag, tabsis muaj ib tug nrug mej nyob ntawm nuav, mej tub tsi paub nwg. 27Nwg yog tug kws taabtom lawv kuv qaab lug, tabsis kuv tub tsi tsimnyog dlaws nwg txuj nyuas hlua khau.”

28Tej xwm nuav muaj huv lub zog Npethanis kws nyob ntawm ntug dlej Yauladees saab nubtuaj, qhov chaw kws Yauhaas muab tuabneeg ua kevcai raus dlej.

Vaajtswv tug Mivnyuas Yaaj

29Nub tom qaab, Yauhaas pum Yexus taug kev tuaj rua ntawm nwg, Yauhaas has tas, “Tug nuav yog Vaajtswv tug Mivnyuas yaaj kws yuav ris tuabneeg nplajteb lub txim! 30Tug nuav yog tug kws kuv qha has tas, ‘Muaj ib tug taabtom lawv kuv qaab lug, nwg muaj fwjchim luj dlua kuv, rua qhov nwg yeej ibtxwm muaj nyob ua ntej yug kuv lawm.’ 31Kuv tsi tau paub has tas nwg yog leejtwg, tabsis kuv lug muab tuabneeg ua kevcai raus dlej kuas cov Yixalayees paub nwg.”

32Yauhaas ua timkhawv has tas, “Kuv pum Vaaj Ntsujplig zoo ib yaam le tug nquab lug sau ntuj lug nyob sau nwg. 33Kuv tseem tsi tau paub has tas nwg yog leejtwg, tabsis Vaajtswv tug kws khaiv kuv lug muab tuabneeg ua kevcai raus dlej has rua kuv tas, ‘Koj yuav pum Vaaj Ntsujplig lug rua sau ib tug txivneej; nwg yog tug kws yuav muab tuabneeg ua kevcai raus lug ntawm Vaaj Ntsujplig tug Dlawbhuv.’ ” 34Yauhaas has tas, “Kuv tub pum nwg lawm, ‘Hab kuv qha rua mej has tas, nwg yog Vaajtswv tug Tub.’ ”

Yexus Thawj Cov Thwjtim

35Nub tom qaab, thaus kws Yauhaas taabtom nrug nwg ob tug thwjtim sawv ua ke dlua, 36thaus ntawd Yauhaas pum Yexus taug kev tuaj. Yauhaas has tas, “Tug ntawd yog Vaajtswv tug Mivnyuas yaaj!”

37Yauhaas ob tug thwjtim nov Yauhaas has le ntawd, ces obtug txawm nrug Yexus moog lawm. 38Yexus tig lug pum obtug lawv nwg qaab, Yexus nug obtug has tas, “Meb nrhav dlaabtsi?”

Obtug teb has tas, “Lanpis (Lu lug nuav txhais has tas ‘Xwbfwb’), koj su qhov twg?”

39Yexus teb has tas, “Meb ca le lug saib.” (Thaus ntawd yog plaub teev nub qaij.) Yog le ntawd obtug txawm nrug Yexus moog hab pum qhov chaw kws Yexus nyob, hab nub ntawd obtug nrug Yexus nyob.

40Ob tug kws nov Yauhaas has hab lawv Yexus qaab moog ntawd, muaj ib tug yog Ximoos Petus tug kwv Aadales. 41Aadales txawm moog has rua nwg tug tijlaug Ximoos has tas, “Wb tub ntsib tug Mexiyas lawm.” (Lu lug Mexiyas txhais has tas “Khetos.”) 42Ces Aadales txhaj coj Ximoos moog cuag Yexus.

Yexus saib ntsoov Ximoos hab has tas, “Koj lub npe hu ua Ximoos kws yog Yauhaas tug tub, tabsis yuav muab koj hu ua Kefas.” (Lu lug Kefas hab Petus txhais has tas “lub pobzeb.”)

Yexus Hu Filis hab Nathana-ees

43Nub tom qaab Yexus yuav moog peg Kalilais. Nwg moog pum Filis hab nwg hu Filis has tas, “Koj ca le nrug kuv moog!” 44(Filis nyob huv lub nroog Npexaidas kws Aadales hab Petus obtug nyob.) 45Filis moog has rua Nathana-ees has tas, “Peb tub ntsib Yexus kws yog tuabneeg Naxales kws yog Yauxej tug tub kws Mauxes sau has txug nwg huv phoo ntawv Kevcai hab cov kws cev Vaajtswv lug sau has txug nwg lawm.”

46Nathana-ees nug Filis has tas, “Puas muaj ib yaam dlaabtsi zoo kws tuaj huv lub nroog Naxales tuaj?”

Filis teb has tas, “Koj ca le tuaj saib maj.”

47Thaus Yexus pum Nathana-ees taabtom tuaj cuag Yexus, Yexus txawm has txug Nathana-ees has tas, “Tug nuav yog ib tug tuabneeg Yixalayees tag; nwg yeej tsi tau ua ib qhov txhum le!”

48Nathana-ees nug Yexus has tas, “Ua caag koj txawm siv paub kuv lawm?”

Yexus teb has tas, “Kuv tub pum koj thaus koj nyob huv qaab tsob txiv ncuav pas ua ntej kws Filis hu koj lawm.”

49Nathana-ees teb has tas, “Xwbfwb, koj yog Vaajtswv tug tub! Koj yog cov Yixalayees tug Vaajntxwv tag!”

50Yexus has rua Nathana-ees has tas, “Vim kuv has rua koj tas, kuv tub pum koj nyob huv qaab tsob txiv ncuav pas, koj txhaj le ntseeg los? Koj tseem yuav pum tej yaam tseemceeb dlua qhov nuav hab!” 51Hab Yexus has rua obtug tas, “Kuv qha tseeb rua meb has tas, meb yuav pum rooj ntug qheb hab pum Vaajtswv cov timtswv nce moog hab nqeg lug ntawm Tuabneeg Leej Tub xubndlag.”#Chk 28.12

Obecnie wybrane:

Yauhaas 1: HNJ2000

Podkreślenie

Udostępnij

Kopiuj