MAT 21
21
Isa donda Jerusalɛmu faliden kan
1Awa, Isa ni a la karandenilu sudunyani Jerusalɛmu so la, ii sera Bɛtifase so kɔndɔ, ni a ye Olibiye Koyinkɛ la. Ka ii to ye, Isa ka a la karanden mɔɔ fila kelaya. 2A ka a fɔ ii yɛ ko: «So mɛsɛn mɛn ye an ɲɛfɛ wo ri, ai ye wa ye. Ai wa don so kɔndɔ, ai ri falimuso do sidini yen i kɔrɔ. A den ye a dafɛ. Ai ye a fulɛn ka na ii ri yan. 3Ni mɔɔ do ka ai maɲininka, ai ye wo tii jabi: ‹Maari le mako ye ii la.› Wo tii ri ii lana i kɔrɔ.» 4Awa, ko woilu bɛɛ kɛni sa Maari la kuma ri kanbali, a ka mɛn don a la nabi da rɔ. Wo ka a fɔ ko:
5«Ai ye a fɔ Siyonkailu yɛ ko:
‹Ai ɲa lɔ! Ai la mansa natɔ le ten.
A fanmajiini, a siini falimuso le kan.
Ɔɔn, a siini fali den kan, falimuso denni kɔnin.›»
6Nba, karandenilu wara a kɛ ikomin Isa ka a fɔ ii yɛ ɲa mɛn ma. 7Ii nara falimuso ni a den di. Ii ka ii la durukibailu la faliilu kɔ rɔ. Isa yɛlɛra ka a sii ii kan. 8Jama siyaman ba ka ii la durukibailu fɛnsɛn sila kan Isa ɲɛfɛ. Doilu ka jiri bolon mɛsɛnilu tɛɛ ka woilu fɛnsɛn sila kan a ɲɛfɛ.#21.8 Jama ka ii la durukibailu a ni jiribolon mɛsɛnilu fɛnsɛn sila kan Isa bonya kanma. Ii ma wo kɛ ka Isa bali. 9Mɔɔ mɛnilu tɛrɛ ye Isa ɲɛfɛ, a ni mɛnilu tɛrɛ ye a kɔfɛ, woilu tɛrɛ ye ii kan ba labɔla ko:
«Tandoli ye kɛ mansa Dawuda dencɛ yɛ!
Mɛn ye nala Maari tɔɔ rɔ ten,
Alla ra ɲumaya kɛ wo yɛ.
Tandoli ye kɛ sankolo rɔ!»
10Isa donda Jerusalɛmu tuma mɛn na, so bɛɛ lamaara. Mɔɔilu bɛɛ ka a fɔ ko: «Ee, yon de ɲin di ten?» 11Jama ka ii jabi: «Nabi Isa le ɲin, mɛn ye bɔla Nasarɛti, Kalile mara rɔ.»
Isa ka julailu gbɛn ka bɔ Allabatobonba kɔndɔ
12Awa, Isa donda Allabatobonba jin kɔndɔ. A ka jula ni sanninkɛla mɛnilu tɛrɛn Allabatobonba jin kɔndɔ ye, a ka woilu bɛɛ gbɛn ka ii labɔ ye. A ka wodifalennailu la tabaliilu labebe, ka kanba julailu la siifenilu fanan nabebe. 13A ka a fɔ ye mɔɔilu yɛ ko: «A sɛbɛni Alla la Kitabu kɔndɔ ko: ‹N na bon di kɛ Alla tara diya ri.› Kɔni ai ra a kɛ bɛnkanninnailu dokon diya ri.»
Sarakalasela kuntiilu mɔnɛra Isa kanma
14Ɲafuyenilu ni senkelenninilu ka ii madon Isa la Allabatobonba jin kɔndɔ ye. A ka woilu lakɛndɛya. 15Sarakalasela kuntiiilu ni sariya karanmɔɔilu ka Isa la kabannako kɛniilu yen ye. Ii ka denni doilu fanan yen, mɛnilu tɛrɛ ye ii kan ba labɔla Allabatobonba jin kɔndɔ ye ko: «Tandoli ye kɛ mansa Dawuda dencɛ yɛ!» Wo rɔ, sarakalasela kuntiiilu ni sariya karanmɔɔilu mɔnɛra. 16Ii ka a fɔ Isa yɛ ko: «I tolo ye denilu kan na wa?» Isa ka ii jabi: «Ɔɔn, n tolo ye a la. A ye di? Mɛn sɛbɛni Alla la kitabu kɔndɔ, ai ma wo karan fɔlɔ wa? A sɛbɛni ko:
‹Denninilu ni sinmindenilu ye i tandola,
baa i jɛrɛ ka tandoli kan wo don ii da rɔ.›»
17Isa ka ii to ye ka wa. A bɔra so kɔndɔ ka wa su kɛ Betani.
Isa ka toroju danka
18Wo duusa gbɛ, Isa wulira ka a kɔsɛ Jerusalɛmu. A watɔla, kɔnkɔ ka a mira. 19A ka toroju do yen sila dala. A ka a madon a la ka a ragbɛ. Kɔni a ma toroden yen, fɔɔ fira gbansan. A ka a fɔ a yɛ ko: «I tɛna i den butun fewu!» Toroju jara i kɔrɔ ye. 20Karandenilu ka wo yen tuma mɛn na, ii kabannakoyara. Ii ka a fɔ ko: «Ee, toroju jara i kɔrɔ wo rɔ di?» 21Isa ka a fɔ ko: «N di tuɲa fɔ ai yɛ: ni lemɛniya ye ai rɔ, ni ai fanan ma sikasika, n ka mɛn kɛ toroju la ɲin, ai ri se wo ɲɔɔn kɛla. Ka a la wo kan, ni ai ka a fɔ koyinkɛ ɲin yɛ ko: ‹I ye bɔ i nɔ rɔ ka wa be kɔɔji rɔ,› a ri kɛ ten. 22Ni ai ka lemɛniya la Alla rɔ, ai wa fen fen ɲinin a fɛ, ai ri wo sɔrɔn.»
Isa la fanka bɔni mi?
23Isa wara don Allabatobonba jin kɔndɔ. Ka a to mɔɔilu karanna ye, sarakalasela kuntiiilu ni mɔɔbakɔrɔilu nara a tɛrɛn ye, ka a maɲininka ko: «I ye baara mɛn kɛla ɲin, yon ka i lɔ wo la? I ye yon se kɔrɔ?» 24Isa ka ii jabi: «N fanan di ai maɲininka ko kelen ma. Ni ai ka n jabi, n di a fɔ ai yɛ mɛn ka n lɔ baara ɲin kɛla. 25A ye di? Yon de ka Yaya lɔ mɔɔilu sunna ji rɔ? Alla le ka a lɔ wa, wala mɔɔilu?» Ii ka a fɔ i ɲɔɔn yɛ ko: «Ni an ka a fɔ ko Alla le ka Yaya lɔ, a ri a fɔ an yɛ ko: ‹Wo rɔ, nfenna ai ma la Yaya la kuma la?› 26Kɔni an kana a fɔ ko: ‹Mɔɔilu le ka Yaya lɔ de!› An silanni ii mɔnɛ la, baa jama bɛɛ ye Yaya jatela nabi le ri.» 27Wo rɔ, ii ka Isa jabi: «An ma a lɔn.» Isa fanan ka ii jabi: «Nba, ni wo le, n tɛna a fɔla ai yɛ mɛn ka n lɔ baara ɲin kɛla.
Dencɛ fila kuma kɔrɔlama
28«Ai ye ai mirila di? Dencɛ fila tɛrɛ ye mɔɔbakɔrɔ do bolo. A ka a fɔ a dencɛ fɔlɔ yɛ ko: ‹N dencɛ, i ye wa baara kɛ rɛsɛnfɛ rɔ bi.› 29Den ka a fɔ ko: ‹N tɛ wala.› Kɔni kɔfɛ, a nimisara. A wara rɛsɛnfɛ rɔ wo rɔ. 30Mɔɔbakɔrɔ ka kuma kelen wo fɔ dencɛ filana yɛ. A ka a fɔ ko: ‹N fa, n di wa.› Kɔni a ma wa. 31Wo dencɛ fila rɔ, ɲuman de ka a fa sawo kɛ?» Ii ka a fɔ ko: «Dencɛ fɔlɔ wo.» Isa ka a fɔ ko: «N di tuɲa fɔ ai yɛ: niisankɔmiralailu ni sunkurunbailu ye donna ai ɲɛfɛ Alla la Mansaya rɔ. 32Baa Yaya nara ka telenbaya sila yiraka ai la, a ni ai ma la ale la; kɔni niisankɔmiralailu ni sunkurunbailu lara a la. Ai ka a yen ko ii lara Yaya la. Hali wo, ai ma nimisa kɔfɛ ka la ale la.
Rɛsɛnfɛ sɛnɛla juuilu kuma kɔrɔlama
33«Ai ye ai tolo malɔ kuma kɔrɔlama gbɛrɛ la. Lutii do ka rɛsɛnfɛ labɔ ka a laminin sansan na. A ka denka sen, mɛn di kɛ rɛsɛnji bɔ diya ri. A ka gbalan mayɛlɛni do fanan lɔ, mɛn di kɛ sɛnɛ kɔnɔgbɛn diya ri. A banni wo bɛɛ la, a ka rɛsɛnfɛ karifa#21.33 «karifa» wo kɔrɔ le Kirɛki kan dɔ ko sɛnɛkɛla woilu ka rɛsɛnfɛ ta sara le la. Tariku ye a yirakala an na ko rɛsɛnden mɔni mɛnilu tun wa kadi rɛsɛnfɛ rɔ sɛnɛkɛla woilu bolo, wo fan kelen de tun ka kan ka di rɛsɛnfɛtii ma ka wo kɛ a sara ri. sɛnɛkɛla doilu la. Wo kɔ rɔ, a wara taama rɔ. 34Rɛsɛnden kadi waati sudunyara tuma mɛn na, a ka a la jɔnilu lawa sɛnɛkɛlailu tɛrɛn ye, ko ii ye a niiyɔrɔ di a ma rɛsɛnden kadiniilu rɔ. 35Kɔni jɔnilu sera ye tuma mɛn na, sɛnɛkɛlailu ka ii mira. Ii ka do gbasi, ka dogbɛrɛ faa, ka dogbɛrɛ bon kabakurun la. 36Nba, rɛsɛnfɛ tii ka jɔn gbɛrɛilu kelaya ikɔ tuun. Woilu ka siya tɛrɛ fɔlɔmantailu ri. Kɔni sɛnɛkɛlailu ka woilu fanan mira ikomin ii ka fɔlɔmantailu mira ɲa mɛn ma. 37A laban, a ka a jɛrɛ dencɛ kelaya ii ma. A ka a fɔ ko: ‹Sɛnɛkɛla woilu ri n dencɛ bonya.› 38Kɔni sɛnɛkɛlailu ka dencɛ wo yen tuma mɛn na, ii ka a fɔ i ɲɔɔn yɛ ko: ‹Cɛtala le ɲin di. Ai ye na, an ye wa a faa ka a fa cɛ ta.› 39Ii ka dencɛ wo mira, ka a lafili rɛsɛnfɛ kɔkan, ka a faa.
40«A ye di? Lutii wa se rɛsɛnfɛ rɔ, a ri nfen de kɛ sɛnɛkɛlailu la?» 41Ii ka a jabi: «A ri be mɔɔ juu woilu kan hinabaliya la ka ii faa. Wo kɔ rɔ, a ri a la rɛsɛnfɛ karifa mɔɔ gbɛrɛilu la, mɛnilu ri a ta niiyɔrɔ di a ma rɛsɛndenilu kadi waati.» 42Isa ka a fɔ ii yɛ ko: «Mɛn sɛbɛni Alla la kitabu kɔndɔ, ai ma wo karan fɔlɔ wa? A sɛbɛni ko:
‹Bon lɔlailu ka ii ban kabakurun mɛn dɔ,
wo le kɛra bon jusii kabakurun di.
Maari nɔ le wo ri.
A kɛra an ɲana kabannako ri.›»
43«Wo le kosɔn, n di a fɔ ai yɛ ko Alla la Mansaya ri ta ai bolo, ka di siya gbɛrɛ ma, mɛn di Alla la Mansaya jiriden nawara. 44Nba, kabakurun wo mɛn fanan ko fɔra, ni mɔɔ mɔɔ kɔnin bera kabakurun wo kan, wo tii koloilu bɛɛ ri kadikadi. Ni kabakurun wo fanan bera mɔɔ mɔɔ kan, a ri wo tii ramɔɲɔnkɔ fewu.» 45Sarakalasela kuntiiilu ni Farisilu ka kuma kɔrɔlama woilu mɛn tuma mɛn na, ii ka a ɲayen ko Isa kan ii le ma. 46Ii ka a ɲa ɲinin ka Isa mira. Kɔni ii silanda jama yɛ, baa mɔɔilu tɛrɛ ye Isa jatela nabi ri.
Obecnie wybrane:
MAT 21: AKS
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
