KEW 6
6
Mɔɔ wɔrɔnwula suwandira ka talibidenbailu dɛmɛn
1Nba, Isa la karandenilu tɛrɛ ye siyayala tuma mɛn na, lon do rɔ, Yahudiyailu mɛnilu fa wara kan tɛrɛ ye Kirɛkikan di, woilu ka ii makasi Yahudiyailu kan mɛnilu fa wara kan tɛrɛ ye Heburukan di. Ii ka a fɔ ko ii la cɛsamusoilu tɛ suman sɔrɔnna suman datalannailu bolo ikomin Heburuilu la cɛsamusoilu ye a sɔrɔnna ɲa mɛn ma. 2Keladen tan ni fila ka wo mɛn tuma mɛn na, ii ka karandenilu bɛɛ kili ka a fɔ ii yɛ ko: «Andeilu kana Alla la kuma lase boloka, ka an na baara kɛ suman datalan dɔrɔn di. Wo tɛ bɛn. 3An badenmailu, ai ye cɛɛ mɔɔ wɔrɔnwula suwandi ai rɔ, mɛnilu ye mɔɔ hankilimailu ri. Woilu ye kɛ mɔɔ famunninilu ri, mɛnilu jusu fani Alla la Nii Sɛniman na. An di suman datalan baara karifa woilu la. 4Kɔni andeilu ri to Alla tarala ka Alla la kuma lase mɔɔilu ma. An na baara le wo ri.»
5Wo kuma diyara jama bɛɛ yɛ. Wo rɔ, ii ka Etiyɛn suwandi, wo mɛn lemɛniyani kosɛbɛ. A jusu fani Alla la Nii Sɛniman na fanan. Ii ka Filipe fanan suwandi, a ni Porokori ni Nikanɔri ni Timon ni Parimɛnasi ni Nikolasi, mɛn tɛrɛ ye Antiyɔkika ri. Yahudiya tun tɛ a ri, kɔni a tun da don Yahudiyailu la dina rɔ. 6Ii ka mɔɔ wɔrɔnwula woilu lana talibidenbailu ma. Talibidenilu ka Alla tara ii yɛ, ka ii bolo la ii kan.
7Alla la kuma tɛrɛ ye jɛnsɛnna fan bɛɛ rɔ. Karanden tɛrɛ ye siyayala bɛrɛbɛrɛ kɛ Jerusalɛmu. Alla la sarakalasela siyaman fanan donda ka lemɛniya sila ta.
Yahudiyailu ka Etiyɛn mira
8Alla la ɲumaya tɛrɛ ye Etiyɛn ka a fɔ kosɛbɛ. Alla la sebaya fanan tɛrɛ ye a fɛ. A ka kabannako ba ni tɔɔmasereilu kɛ mɔɔilu tɛma. 9Kɔni doilu wulira Etiyɛn sɔsɔla. Ii bɛɛ bɔni salibon kelen de la, mɔɔilu ye a fɔla mɛn ma ko Mɔɔ Kanhɔrɔyaninilu la salibon. Wo salibon mɔɔilu bɔni Sirɛni ni Alɛsandiri, a ni Silisi ni Asi jamanailu rɔ. 10Kɔni ii tɛrɛ ti se jɔ sɔrɔnna a ma. Alla la Nii Sɛniman de tɛrɛ ye hankilimaya dila a ma kuma wo rɔ. 11Wo le ka a kɛ, ii ka mɔɔ doilu kɔnɔrasu Etiyɛn kanma. Woilu ka wuya la a la ko: «A ra Nabi Musa ni Alla tanama kuma fɔ. An jɛrɛ ka wo mɛn fewu.»
12Wo rɔ, salibon mɔɔ woilu ka so kɔndɔ mɔɔilu ni mɔɔbakɔrɔilu ni sariya karanmɔɔilu lawuli Etiyɛn kanma. Ii ka Etiyɛn mira fanka la ka wa a ri Yahudiya la kititɛɛ dɛkuru rɔ. 13Ii nara mɔɔ doilu ri, mɛnilu ka wuya la Etiyɛn na. Ii ka a fɔ ko: «Cɛɛ ɲin ye yɔrɔ sɛniman ɲin nafɛyala tuma bɛɛ, ka Nabi Musa la sariya fanan nafɛya. 14A ra a fɔ ko Nasarɛtika Isa wo ri Allabatobonba ɲin te. Ko a ri an na sila yɛlɛman, Nabi Musa ka sila mɛn di an benbailu ma. An jɛrɛ ra kuma wo mɛn a da rɔ.»
15Kititɛɛ mɔɔilu ka Etiyɛn mafɛnɛ. A ɲakɔrɔla ra kɛ ikomin mɛlɛka ɲakɔrɔla.
Obecnie wybrane:
KEW 6: AKS
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
