KEW 12
12
Mansa Herodi ka lemɛniya mɔɔilu tɔrɔ
1Wo tuma, mansa Herodi wulira ka lemɛniya jama doilu mira ka ii ɲakankatan. 2A ka Yuhana kɔrɔcɛ Yakuba faa fanmuru la. 3Mansa Herodi ra yen ko Yakuba faa diyara Yahudiyailu yɛ tuma mɛn na, a ka Piyɛri fanan mira. Wo kɛra Yahudiyailu la Buru Fununbali Sali waati le rɔ. 4Nba, a ka Piyɛri mira ka a bila kaso la, ka a don kɛlɛden mɔɔ tan ni wɔɔrɔ bolo ko ii ye ii janto a rɔ. A lɔɔ tɛrɛ ye Herodi la ko ni Taminkunna Sali taminda, ko a ri a la kititɛɛ mɔɔilu bɛɛ ɲana. 5Wo rɔ, Piyɛri lamarara kaso la ye. Kɔni lemɛniya jama mɔɔilu ka ii raja Alla matarala a yɛ kosɛbɛ.
Piyɛri bɔra kaso la ɲa mɛn ma
6A lɔɔ tɛrɛ ye Herodi la ka Piyɛri kiti sini ɲɔɔn. Wo su jɛrɛ rɔ, Piyɛri lani tora sunɔɔ rɔ kɛlɛden fila tɛma. Jɔlɔkɔ fila bilani a bolo fila la. Kanda doilu fanan lɔni da la ka ii janto a rɔ. 7Wo yɔrɔni rɔ i kɔrɔ, Maari la mɛlɛka do bɔra gbɛ rɔ kasobon kɔndɔ. Kɛnɛya mɛlɛnda bon kɔndɔ. Mɛlɛka ka Piyɛri magbasi a kanbankun ma, ka a lakunun ko: «I kaliya, i wuli.» Jɔlɔkɔilu bɔra a bolo fila la ka be duu ma. 8Mɛlɛka ka a fɔ ko: «I tɛsidi ka sanbara don i sen dɔ.» Piyɛri ka wo bɛɛ kɛ. Mɛlɛka ka a fɔ ko: «I la faanin bila i kan na ka i bila n kɔ.» 9Piyɛri bilara a kɔ ka bɔ kaso la. A tun ma a lɔn ko mɛn kɛni mɛlɛka bolo, ko wo ye tuɲa le ri. Mɛlɛka ye ko mɛn kɛla wo kɛra a ɲana sibo le ri. A ye a kɔndɔ ko wo tɛ foyi ri fo sibo. 10Ii taminda kasobon kɔnɔgbɛnna kuru fɔlɔ la, ka tamin kuru filana fanan na. Wo rɔ, ii sera so donda ba ma. Nɛɛkun de tɛrɛ wo ri. Ii seni ye, da wo lakara a jɛrɛ ma. Ii donda so kɔndɔ ka sila do mira. Ii ye wo taamala tuma mɛn na, mɛlɛka bɔra Piyɛri kɔfɛ kelen di ka tunun a ma.
11Mɛlɛka wani kɔ, Piyɛri hankili sɛra a ma. A ka a fɔ ko: «N da a lɔn sisen ko Maari le ka a la mɛlɛka lana n ma. A ra n bɔ Herodi bolo, ka n kisi kojuu bɛɛ ma, Yahudiyailu tɛrɛ ye a fɛ ka mɛn kɛ n na kɔnin.»
12Piyɛri ka wo ɲayen tuma mɛn na, a wara Yuhana na Mariyamu wara. Mɔɔilu ye a fɔla Yuhana mɛn ma ko Marika. Mɔɔ siyaman nadɛnni tɛrɛ Mariyamu wara ye ka Alla matara. 13Piyɛri sera ye ka lu da makɔnkɔn. Baaraden muso mɛn tɔɔ ko Roda, wo nara da la, ka lakɔrɔsili kɛ. 14A ka Piyɛri kan mɛn tuma mɛn na, a sɛwara kojuuya, a ɲinara da laka ko rɔ. A ka i bori ka wa a fɔ mɔɔ bɛɛ yɛ ko Piyɛri lɔni da la kɛnɛ ma. 15Roda ka Piyɛri na ko fɔ tuma mɛn na, ye mɔɔilu ka a jabi: «Fatɔ le i ri wa?» Kɔni Roda ka a fɔ ka a magbɛlɛya ko: «Ale le jɔ!» Ii ka a fɔ ko: «Ale tɛ. A la mɛlɛka le.» 16Kɔni Piyɛri tɛrɛ ye da makɔnkɔnna kosɛbɛ. Ii wara da laka tuma mɛn na, ii ka Piyɛri yen ka kabannakoya kojuuya.
17Piyɛri ka a bolo lawuli ko ii ye ii sabari. Maari ka a labɔ kaso la ɲa mɛn ma, a ka wo lase ii ma. Ko ii ye wo bɛɛ fɔ Yakuba ni ii badenmailu yɛ. Wo kɔ rɔ, a bɔra ye ka wa yɔrɔ gbɛrɛ rɔ.
18Nba, wo duusa gbɛ, Piyɛri tunun ko ka kɛlɛdenilu kɔndafili kosɛbɛ. 19Herodi ka a ɲinin fan bɛɛ rɔ, kɔni a ma a yen. Wo rɔ Herodi ka kasobon kɔnɔgbɛnnailu kili ka woilu fɛsɛfɛsɛ, ka ban ka ii mira ka ii faa.
Nba, Herodi bɔra Jude ka wa tele dando kɛ Sesare.
Herodi faara ɲa mɛn ma
20Herodi mɔnɛni tɛrɛ kojuuya Tirikailu ni Sidɔnkailu kanma. A lɔɔ tɛrɛ ye ii la ka kɛlɛ wo ban, ka a masɔrɔn ii la jamana balo ye bɔla mansa Herodi la jamana le rɔ. Wo rɔ, ii ka i ɲɔɔn yen ka mɔɔilu lɔ Herodi madiyala. Kɔni ii ka teriya don ii ni Bilasitusi tɛma fɔlɔ. Bilasitusi wo le Herodi la ɲɛmɔɔba ri. Wo bolo ma, ii wara Herodi tɛrɛn, ka a madiya ko a ye kɛlɛ ban.
21Lon mɛn fɔni Herodi bolo, ii bɛɛ ka ii ladɛn. Herodi ka a la mansaya duruki bila a kan na, ka i sii a la kititɛɛ siifen dɔ, ka kuma ii bɛɛ ɲana. 22Jama bɛɛ ka ii kan nabɔ kosɛbɛ ko: «Mɔɔ kan tɛ ɲin di. Maari do le kan ye ɲin di!» 23Maari la mɛlɛka ka jankarɔ bila Herodi la i kɔrɔ, ka a masɔrɔn a ma bonya di Alla ma fo a jɛrɛ. Tunbu donda a fari rɔ ka a dɔɔn. A faara wo rɔ.
24Nba, mɔɔ mɛnilu ka Alla la kuma mɛn ka lemɛniya a ma, woilu tɛrɛ ye siyayala kosɛbɛ kosɛbɛ.
25Barinabasi ni Sawuli banda ii la baara la tuma mɛn na, ii ka Yuhana ta ka ii kɔsɛ Jerusalɛmu. Mɔɔilu ye a fɔla Yuhana wo ma ko Marika.
Obecnie wybrane:
KEW 12: AKS
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
