Tutui Makasososak 5
5
Adam tititi-nonosin losa Noh
1-2Neu Manetualain adu hatahori dae-bafok, Ana adu mata-aon nara sama leo Ndia mata-ao heli-helin. Ana adu sara, touk ma inak. Basa boe ma Ana noke naden nara nae, “hatahori dae-bafok”, boe ma Ana fee babaꞌe-babatik neu sara.
Hatahori dae-bafok makasososak naden, Adam. Adam tititi-nonosin nara naden:
3Neu Adam teun nara 130, boe ma ana hambu ana touk esa, mata-aon sama leo aman. Boe ma ana foi kanak naa, nade Set. 4Basa boe ma Adam bei nasoda teuk 800 bali, ma ana hambu tamba seluk ana touk ma inak. 5Teun nara 930, boe ma maten.
6Neu Set teun nara 105, boe ma ana hambu ana tou anak esa, nade Enos. 7Basa boe ma Set bei nasoda teuk 807 bali, ma ana hambu tamba seluk ana touk ma inak. 8Teun nara 912, boe ma maten.
9Neu Enos teun nara 90, boe ma ana hambu ana touk esa, nade Kenan. 10Basa boe ma Enos bei nasoda teuk 815 bali, ma hambu tamba seluk ana touk ma inak. 11Teun nara 905, boe ma maten.
12Neu Kenan teun nara 70, boe ma ana hambu ana touk esa, nade Mahalalel. 13Basa boe ma Kenan bei nasoda teuk 840 bali, ma ana hambu tamba seluk ana touk ma inak. 14Teun nara 910, boe ma maten.
15Neu Mahalalel teun nara 65, boe ma ana hambu ana touk esa, nade Yared. 16Basa boe ma Mahalalel bei nasoda teuk 830 bali, ma ana hambu tamba seluk ana touk ma inak. 17Teun nara 895, boe ma maten.
18Neu Yared teun nara 162, boe ma ana hambu ana touk esa, nade Henok. 19Basa boe ma Yared bei nasoda teuk 800 bali, ma ana hambu tamba seluk ana touk ma inak. 20Teun nara 962, boe ma maten.
21Neu Henok teun nara 65, boe ma ana hambu ana touk esa, nade Metusalak. 22Basa boe ma Henok leo-laꞌo dalek esa no Manetualain, losa teuk 300 bali. Boe ma ana hambu tamba seluk ana touk ma inak. 23-24Ana leo-laꞌo dalek esa no Manetualain seku neu. Neu teun nara 365, boe ma mopok kana, nahuu Manetualain soꞌuk kana neni lalai neu.
25Neu Metusalak teun nara 187, boe ma ana hambu ana touk esa, nade Lamek. 26Basa boe ma Metusalak bei nasoda teuk 782 bali, ma ana hambu tamba seluk ana touk ma inak. 27Teun nara 969, boe ma maten.
28Neu Lamek teun nara 182, boe ma ana hambu ana touk esa. 29Lamek foi anan naa nade, Noh (sangga sama no dedeꞌa deꞌek esa fo sosoa-ndandaan ‘fee kokoe-nanasi’), nahuu ana nae, “Kanak ia neu ko ana kokoe-nanasi tao namahoko ita dalen nara numa ita ue-osa beran mai nai dae ia fo Manetualain nakatoo nalan ena.” 30Basa boe ma Lamek bei nasoda teuk 595 bali, ma ana hambu tamba seluk ana touk ma inak. 31Teun nara 777, boe ma maten.
32Neu Noh teun nara 500 ena, boe ma ana hambu ana touk telu, ndia: Sem, Yafet, ma Ham.#5:32:Ham naa, ana muri anak. Mete Tutui Makasososak 9:24-25.
Obecnie wybrane:
Tutui Makasososak 5: txqNTPO
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2016, Wycliffe Bible Translators, Inc. in cooperation with (UBB) Unit Bahasa dan Budaya
