JOHAN 19
19
1Kiijiishe, Pilat raq Jesuq ka tiishea wan nong raüta, chunpo-nyam chongwai maq ninta she tiitsatto. 2Raütiishe phenlabi raq shukraü maq khuphok ashi haito. Raüta, Jesuq khupo na tiiphok kuqto. Raüta, apaiq ma kheashii thum samtong jong ashi kriiri tiisam kuqto. 3Kra raütiishe, tsangshiq ka apaiq tho na chapwa hihi raüta, “Jehudinok Hokham we lei, rilung alu maq siliilii!” nguta slailii noqsiq wanto. Kiimaq tsangshiq raq atheaphi na tiijangkiki she tsatsiqto.
4Pilat ka khok mong maq dongki nong raüta, jangshi ri hali Jehudinok mungmaiqse ma bom ka akha hali chongki nongto, “Liirong laq! Ngi raq apaiq dü na jamlai khü akha min chhi mang. Apaiq ka ümchaü arjaq namshiq man na tiichap nong tiikang ara. Apaiq tiishut chang kha ka, ngi raq apaiq dü na jam min ahü chhi mang.” 5Kiimaq, Jesuq ka shuk khuphok kra phok raü, kiimaq kheashii thum samtong jong kaü kra sam raü she kinphai khok kiina sheahoto. Raüta, Pilat raq tsangshiq ma hali bom ka akha wainongto, “Lii manta! Ahata Maiqse!”
6Kiijiishe, ramwe jongbi nai Shomjam kheti petanok raq, Jesuq ka chhi raüta, “Pumsongkham na tübaiq ronglaq! Pumsongkham na tübaiq ronglaq!” ngutiishe gitrang wanto.
Kiijiishe, “Namshiq jaq maq sheaho ronglaq, lanta pumsongkham na tübaiq ki rongkiq. Ngi riiha, apaiq tiishut chang kha apaiq dü na ahü, jam min chhi mang,” nguta Pilat raq tsangshiq bom ka tre nongto.
7Kiijiishe, “Apaiq miisaq kra shiithum miitu naishiq nok thungtri asi. Ara jamkhano chongtiikai ngukla, apaiq raq apaiq ka Shiikeawe Se nguta tiichong tlo,” nguta mungmaiqse riitsaprai tlaq kriiraq, Pilat bom ka tre nongto.
8Pilat raq tsangshiq bom ka tai nong raüta, Jesuq kha raü kra tanke wan miika apaiq hai ka jasisi she riito. 9Kriikha maq, apaiq ka hokham we jamkhok kiijaq hali wanong raüta, “Riita, ümniika ümriibati wa?” nguta Jesuq ma hali bom ka waiwa nongto.
Shatmaq, Jesuq raq abom ka tre mak dea riito. 10Kiijiishe, Pilat raq apaiq ma nguto, “I bom ka tre maü nya? Tailaq, ümniika pumsongkham na tübaiq miitu nai atiichhiike miitu arang ka i jaq na asi.”
11Kiijiishe, Jesuq raq Pilat bom ka treto, “Ümjaq na i tsitsü ara tiipit miitu arang ka Shiikeawe raq akuq tiina. Kriikha na, jurwa ngi ka ümjaq mong na shaphaq baiqtaq, kriiti riika, ümngarai thaq niimin ngarai jonghea she tang wanto.”
12Pilat raq ara bomtsi ara tai raütiishe sanha apaiq raq, Jesuq ka tiichhiike wan miitu lamlu ka ritto. Shatmaq, mungmaiqse phong riitsap rai tlaq kriiraq, ja sru wanwan she, “Ümniiraq apaiq kla khalot kuq haü jiila, ümniika Roman Hokham we kongti riimak! Jurwa ngi ka hokham we nguta tiichong tlaq, kriiti ka Roman Hokham ngachang kra jiibaiq tanti we ngushat!” nguta siitrang nongto.
13Pilat raq kra bom ka tai raütiishe, Jesuq ka kinphai na tiisheaho nongto. Raüta, apaiq ka phowe ngachang, “Longkaü damsii” ngutlaq kiijiishe ngato. (Hibru bom maq kra mang ka “Gabbatha” ngutlo.) 14Kra akhing ka Tiichhii Wan Poi ma naiqkhu ranaiq shethung shekham ba she riito. Pilat raq mungmaiqse nangnga, “Liimanta, ahata nam hokham we!” nguta nguto.
15Kiijiishe, tsangshiq raq, tüsaiqsaiq she hali, “Apaiq ka tsatbaiq ronglaq! Apaiq ka tsatbaiq ronglaq! Apaiq ka pumsongkham na tübaiq tlo ronglaq!” ngutiishe agi lülü she gitrang nongto.
Kiijiishe, Pilat raq hali tsangshiq ma, “Riita, nam hokham we ka ngi riisha mitübaiq ha?” nguta bom ka mungmaiqse kiima hali wai nongto.
Kiijiishe, ramwe jongbi raq, “Naishiq ma hokham ka Roman Hokham we sitlaq kli!” nguta Pilat bom ka tre nongto.
16Kra lot raütiishe, Pilat raq Jesuq ka pumsongkham na tübaiq kai miitu she, tsangshiq jaq na kiinong kuq baiqto.
Jesuq Pumsongkham Na Tübaiqto
(Mot 27.32-44; Mak 15.21-32; Luk 23.26-43)
Krai mren she, phenlanok raq Jesuq ka sheahoto. 17Jesuq raq apaiq pumsongkham kra piraüta chela phai na, “Khurii Hiqlam,” nguta hiq bashi kiina saüli kihoto. (Ara hiq ba ka Hibru bom maq Golgotha nguta ngutlo.) 18Kiijaq, tsangshiq raq apaiq ka pumsongkham na tübaiqto. Kiimaq tsangshiq raq maiq ahinti min wenai pumsongkham na tübaiqto. Jesuq ka aheawea na tiihong raüta, maiq wenai ka Jesuq ma siimko na weshi, siimko na weshi tiihong raüta tübaiqto. 19Pilat aming maq, Jesuq pumsongkham na, “Najareth Hiqti we Jesuq, Jehudinok Hokham we,” nguta, Jesuq ma kha nyantaq kra kha raüpot bomtsi ka, waiq raüta tiikop damto. 20Jesuq tübaiq chang hiq ba kriika chela tho niili riito. Kriikha maq, ara kha nyantaq raüpot bomtsi arka, Jehudinok pahea raq phatto. Kra raüpot ka Jehudinok bom maq, Letin bom maq, kiimaq Griknok bom maq waiq raüta thüto.
21Kra raüpot waiq thütaq kra chhi raütiishe, “Ara kha nyan raüpot arka, ‘Jehudinok Hokham we,’ ngutiika naq waiqkiq li. Shatmaq, arwe apaiq riitiina, ‘Ngi ahata Jehudinok Hokham we,’ nguta apaiq nai apaiq tiina tiingotaq,” nguta ramwe jongbi raq Pilat ma nguto.
22Kiijiishe, “Ngi raq jamlai wa waiqkang ka waiq kang she,” nguta Pilat raq tsangshiq bom ka treto.
23Phenlanok raq, Jesuq ka tübaiqlot raütiishe, tsangshiq raq apaiq dü wa achhut baiq khea thun kriika, manblai na pheato. Manshi ka weshi rii rii na pheato. Kiimaq tsangshiq raq apaiq han tiinap na samchang bannin samtong jong kiimin lamto. Kra samtong jong kaü kriika khea man ka manshi miili ataq. 24Kriikha maq, “Ara khea arka chaimaili jo; arka jurwa milap, kra miitu nashiq raq lang khoti liirong i,” nguta phenlanok liipan na bom ka riichongto. Ara chongtiikai thun mra pin hongtha wantaq arka, Asii Bomtsi na achongthü kra tiiku wan miitu hong wanto. Kiijaq akha waiq thüto:
“Tsangshiq raq i khu i khea ka tsangshiq liipan na riiphea phaqto:
Kiimaq i khea thum ka lap miitu tsangshiq raq lang liito.”
Ara chongthütaq kra phan phan she dea phenlanok raq, Jesuq khea ka riiphea phaqto.
25Kra akhing na, Jesuq pumsongkham tho na chapshatti maiq asi riito. Tsangshiq ka Jesuq ma anyung, anyung ma ano asai kriiri, Kleopas tanyung Meriq ri, kiimaq Magdalani hiqti Meriq ri riito. 26Jesuq raq anyung nai ajaqshi se, apaiq raq kai lungwii tlaq se ka kiijaq chapraq raq chhito. Kra chhi raüta, “Apaiq ka ümse she,” nguta apaiq raq anyung ma chongkuqto.
27Kiimaq hali, “Apaiq ka ümnyung she,” nguta apaiq raq ajaqshi se kiima hali chongkuq nongto. Kra miiphat she, apaiq raq anyung ka, apaiq jam niishe shea wanto. Raüta, anyung shaq miishe tiija raüta, dunghiq wanto.
Jesuq Langpit
(Mot 27.45-56; Mak 15.33-41; Luk 23.44-49)
28Jesuq raq apaiq jaqsham ka thumthum kun kang she nguta asap. Krai mren, Asii bomtsi na awaiq thü bomtsi kra shiiku wan miitu, apaiq raq, “Ngi kham nyangtsi,” nguta kham jaüto.
29Kiijaq khap ashi na, thiinin phan che tiitoshat asi riito. Kiiwa kham tiishup chang naitan phu maq tiishup raüta, hissop lükii na tsom raüta, apaiq nü na thiikuqto. 30Jesuq raq, kra che kra shup nyang raütiishe, “Ümchaü ka thumto she!” nguta bomto.
Kra bomri lishe, apaiq raq akhu ka hiq nü na kusaq riito, kiimaq alang tiipitto.
Jesuq Siimpii Na Piq Maq Shukto
31Kiitiikaq Jehudinok welabi raq Pilat jaq wa pumsongkham na atübaiq wetiim hok kriika, atiingoq bukkai chang, raüta amaa ka pumsongkham wa atiisat diibaiq chang nguta aming jaüto. Tsangshiq raq kra aming jaü wataq kriika, kra ranaiq ka liipan Rabiingi ranaiq riito. Kiimaq, tsangshiq raq Asii Niitiitsak ranaiq na, maiq maa ka pumsongkham na tiipaq shat ka thüro mak phan. Akhek ka kra watlaq Asii Niitiitsak ranaiq kriika, akhek atiitsang asii ranaiq riito. Kriikha maq, kra aming ka jaüto. 32Krai mren, phenlanok ka kiraüta, apha wa we hokpe kra kongkhu tiingoq bukto. Raütiishe, Jesuq rai atübaiq dam maiq we weshi hokpe kriishe tiingoq bukto. 33Raütiishe, tsangshiq ka Jesuq pumsongkham jichong niishe kiraüta liiki kiita, Jesuq ka atsaikai wishe riito. Kriikha maq, tsangshiq raq apaiq hokpe ka tiingoq buk mak dea riito. 34Shatmiitiina, phenlanok phong wa kongti weshi raq, apiq maq Jesuq siimpii na shukto. Kra shuk ri li she, piq mi kriimaq tiijai nai kham ka ajia lili she dongto. 35Ara chong tiikai mra pintaq thun ara, juro apaiq mak maq chhitaq, kriiwe raq bom ka chong tlo. Ara bom chong tlaq arka, namshiq riimin, ara bomchong arma mikam wan laq nguta chong kuq tlo. Apaiq raq jamlai bom wa chongtlaq kriika tengteng. Krai mren, apaiq riika kamto maq tengteng chhikang asap ha nguta chong tlo. 36Ara hongtha wantaq arka, Asii Bomtsi na: “Arok arii riishi min tiingoq mak,” nguta achongthü kra bomtsi ka tiiku wan miitu she hong tha wanto. 37Kiimahali, Asii Lakdap bashi niimin, “Tsangshiq raq piq maq asiimpii na shuk tiiwe sham kli tsangshiq raq milii nong kata,” nguta chong tlo.
Tsangshiq Raq Jesuq Maa Lapto
(Mot 27.57-61; Mak 15.42-47; Luk 23.50-56)
38Arjai miishe, Arimithia chelati Joseph raq Pilat jaq wa, Jesuq maa ka pumsongkham wa tiisat lam miitu she, aming jaüto. Joseph ka ahukse maq, Jesuq jaqshi ma jawanti we. Kriika Jehudinok welabi ma ahaisi kha maq, ahukse maq jawanto. Pilat raq apaiq ma, Jesuq maa kra saiqsam miitu aming kuqto. Krai mren she, Joseph ka kiraüta, Jesuq maa ka diito. 39Kiimaq aphaji na rawa na, Jesuq phana riihumkaiti we Nikodemas kriimin, Joseph rai wadamto. Raüta, apaiq raq süse tapan win ahomwiq phan, maiq maa na nyatke chang phan kriika tok roqtsam tin howan raüta wato. 40Tsang nai raq Jesuq maa ka lam raüta, raihi-nairai khea maq aheawiq, Jehudinok maalap thunglai maq ahom wiq phan süse tapan win maq nyat raüta, amaa ka jobto. 41Jesuq tsea baiq chang tho kiijaq, achhi araq Olip pero ashi asi. Kiijaq maiq maalap chang longsha tiip, maiq maa laphü anye tingsang shaq ashi asi. 42Riita, kra ranaiq ka Asii Niitiitsak ranaiq phaho ma naiqkhu ranaiq she riito. Kiimaq maakho ka kra tho na aje niili kha maq, tsangnai raq Jesuq maa ka kiijaq lap thüto.
Obecnie wybrane:
JOHAN 19: TANGSBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
