KIIMWEBI JAQSHAM 5
5
Ananias Nai Saphira
1Shatmaq, kiijaq maiq weshi asi riito. Apaiq mang ka Ananias. Apaiq raq tsang-nyung Saphira rai kiqshi maq ri raüta, tsangnai hupsam phanshi ra ka asha riito. 2Shatmaq, tsang-nyung rai riichong raüta, Ananias raq kra kampho wa wiijam ka apaiq rii pong na thüho raüta, khokoli kiimwebi jaq na kuqto. 3Kiijiishe, Petar raq apaiq ma waito, “Ananias, ümniiraq namnai tachong hupsam hiqphu sha lanta, kra sha kampho wa khoko ka ümniirii thüho raü, khokoli kuq laüta, Asii Wenyi ma wiita kuqkang nguta arot chong miitu, ümtsantsii ka Thawe thongkhiiq na jaram wa rongki laü? 4Hupsam ka misha haü shaq niimin ümhupsam riimak sha? Kiimaq ashalot jai min kra sha kampho ka ümtsiiq li shatshat riimak sha? Riita, ümniiraq atinkhan ashut ka jamlai nguto klo laü? Arka ümniiraq maiqse ma rot riimak, shatmaq Shiikeawe ma rot laü!” 5Ananias ka ara bomtsi ara tairili, kiijaq chut riwan tlü tsaikito. Kiimaq ara tsütsa taitibi thun maiq tarü ka phiip raq tsaito. 6Kiiwa jerobi thun ka wa raüta, Ananias maa ka jobto. Raüta amaa ka piho raüta lapkito.
7Nari tsam tin sijai maq, tsangnyung ka jamlai mra wa pintaq kra sapmak miili, kiijaq saü wato. 8Petar raq apaiq ma hali wainongto, “Ngi ma chong liita, namnai sinyungwe raq, namnai hupsam sha kampho ka achuli dea sha laplan?”
“Üm, kiichuli dea,” nguta Petar bom ka apaiq raq treto.
9Kra tairaütiishe, Petar raq, “Ümwese namnai raq kiqri lanta, Shiikeawe Asii Wenyi ka jamlai nguto tairai tlan? Liilaq, ümwese maa lapkaiti ka ümchaü maalap rü maq awa, kilam chong niili. Tsangshiq raq ümmaa kiimin ümchaü piho raüta milapki nong!” nguta apaiq bom ka treto. 10Petar bom thum ri, Saphira ka chut Petar khaki na riidungli riwa saq tsaikito. Kiiwa jerobi ka wa raüta liikiita, apaiq ka amaa she riito. Krai mren, tsangshiq raq amaa ka pihoto. Raüta, awese maakho tiinap na lapkito. 11Ara tsütsa tai raüta, Phungtuti ngusaq maiqse tlotli, kiimaq nanok ahinti thun tarü ka, phiipraq atsai haisong wanto.
Awang Chang Nai Amao Chang Jaqsham
12Mungmaiqse liipan na kiimwebi raq awang chang nai amao chang jaqsham pahea sham wanto. Kamasham maiqse thun ka tsantsii ashi maq Solomon Jolitiip na riitam ngato. 13Phung na mishang shaqti Jerusalem wa mungmaiqse ahinti ka phungtu na nyap wan raüta, adam na haisea wandam ka khulot mak ahai riito. Li jiimin, tsangshiq raq Phungmaiqse kong ka ahea dea nguta shomra riito. 14Shatmaq, Tatiwe ma kamwanti maiq pahea maiqwere nai jechakre thun ka, tsangshiq phungtu kiijaq pong wan damto. 15Kiimwebi raq awang chang nai amao chang jaqsham tlaq kra chhi raüta, atsi asiti maiq pahea piho raüta, changdü na nai damsii na tiikon raüta, lamkii tho na tiibum tlo. Kriika, Petar khum raüjaq, apaiq tsaiji nyam raq jiimin, tsangshiq atsiti dü na miham dam laq nguta tiima raüta tiibum wantlo. 16Krai mren, Jerusalem tro na maiqhiq ümchuwa sitlaq kiiwa maiq ka kongta hushhu maq, riitsap riikhat atsi asiti nai abi winji raq arom wanti thun ka, aboq chang aboq, kiimaq ashea chang ashea raüta, Jerusalem na saü wanto. Kra maiq atsiti ümchuwa saü wantaq thun ka thumthum atsi tiihea kuqto.
Kiimwebi Tiichamchaoto
17Arthun ara chhi raütiishe, Ramwe Ajong Pinthum we nai akongtibi kiimaq, kiiwa nokti Sadusinok phung raq kiimwebi ka pinthum makshu rashe miishe shulii wanto. Krai mren, tsangshiq raq kiimwebi ka atiichamchao chang ngutiishe bom ka riichongto. 18Kra riipho wantaq krai mren, tsangshiq raq kiimwebi ka lap raüta, nokmaiqse shaq chang phaqtek na shaqto. 19Shatmaq, kra rawali Tatiwe rase ka kiraüta, phaqtek kilü thun ka dikuq kito. Raüta, kiimwebi ka phaqtek mong wa tiidong sheahoto. Kiimaq rase raq tsangshiq ma, 20“Shomjam kiina kironglaq. Lanta, kiijaq mungmaiqse ma ara rilung anye lamphan bomchong ara chongkuq kirongkiq,” nguta thaüto. 21Krai mren, kiimwebi raq rase aming kra taito. Raüta, ranap na Shomjam na kiraüta, mungmaiqse ma trahokuqto.
Ramwe Ajong Pinthum we nai akongtibi raq Jehudinok Rung welabi thun ka ngongthun rong i nguta Rung na tiiheato. Raütiishe, tsangshiq raq kiimwebi ka Rung na tiichap miitu, phaqtek mong wa sheaki rongkiq nguta peta siihiipbi ma aming kuqto. 22Shatmaq, petanok ka phaqtek mong na kiraüta liiki kiita, kiimwebi ka ahü chhikito. Krai mren, tsangshiq ka jang wan raüta, Rung na ngati welabi ma tsütsa ka, 23“Naishiq phaqtek na kilaita liiki kaita, phaqtek khok kilü thun ka tala maq keaje siisaq. Kiimaq phenlabi raq kilü thun ka kheshat. Shatmaq, naishiq raq kilü thun ka dilaita liikaita, khok ka shaqmii chhiho kai!” nguta chongto. 24Kra tsütsa ka Ramwe jongbi nai Shomjam kheti peta siihiip we raq tairaüta, kiimwebi ka jamkho jakita nguta kai awang riito. 25Kra liipan niili, maiq weshi ka Rung khok na nyap wa raüta welabi ma, “Welabi lei! Namshiq raq phaqtek mong na shaqlan maiqwetiim irka, ümchaü Shomjam na nokmaiqse ma trahoke rea!” nguta tsütsa ka tsangshiq ma tiitaito. 26Kra tairaütiishe, peta siihiip we ka asengi petanok sheaho raüta, kiimwebi ka Rung na shea wanto. Kiitiina, tsangshiq raq ningkun ningkaq ka riimak. Ahea miili shea wanto. Nokmaiqse raq tsangshiq ka long maq tiiqbaiq jiiq nguta tsangshiq min ahai ka asi.
27Petanok raq kiimwebi ka Rung khok na shea wanto. Raüta, Ngong welabi man niishe tiichapto. Kiijiishe, Ramwe Ajong Pinthum we raq kiimwebi ma, 28“Naishiq raq, Jesuq aming holanta, mungmaiqse ma trahoke maimak nguta, tri atsin maq, namshiq ma aming kuq kai. Shatmaq, liirong laq, namshiq raq jamlai wa riilan ara! Namshiq traho bomchong maq, Jerusalem chela ka wiita she tiinyam baiq lan. Kiimaq, namshiq raq apaiq tsaitaq mat kha ka, naishiq khuthaq na tiikü kuq tlan!” ngutiishe tsangshiq ma kha ka nyanto.
29Kra tairaütiishe, Petar nai akongti kiimwebi raq bom ka akha treto, “Naishiq raq Shiikeawe aming tai chang. Maiqse aming ka riimak. 30Namshiq raq Jesuq ka pumsongkham na tübaiq lanta tsatbaiq lan. Shatmaq, natitiim Shiikeawe raq apaiq ka amaa wiishe tiidong wan nongto. 31Raüta, Shiikeawe raq Jesuq ka, apaiq ma jaqtsi nü na, aki miikiim ngachang niishe tiinga wanto. Raüta, Jesuq ka maiqse Rümti nai maiqse Chhiiti miishe shongto. Arka, Israilnok raq, tsangshiq ngarai ka tiidii raüta, tsangshiq mra ka mitiisii laq nguta, lamlu jonghea tankuqto. 32Shiikeawe raq jamlai phan jaq wa shamtaq, kra hakhi kewanti ka naishiq. Kiimaq Shiikeawe aming lang wantibi ma, Shiikeawe apaiq raq kongphiq kuqtaq Asii Wenyi kra riimin, naishiq rai adam maq hakhi kuq damtlo.”
33Riita, Rung na ngati welabi raq ara bomtre ka tai raüta, tsangshiq ka walü wa ikhiishe khiqtrangto. Krai mren, tsangshiq tsankhiq tsi ma, kiimwebi ka kiijiili tiitsea baiq nguta danto. 34Shatmaq, Phorisinok phong na Thungtri shrinketi shra ajong weshi, apaiq mang ka Gamaliel nguta asi. Apaiq ka mung maiqse wiitarü raq kai shreng tlo. Kiijiishe kriiwe ka Rung welabi man na chapha she riito. Raüta, apaiq raq kiimwebi ka heashi miitu kinphai na sheaho ronglaq nguta thaüto. 35Raütiishe, apaiq raq Rung welabi ma tsii ka akhiishe chongkuqto, “I nok i hiq Israil mung ajong ala mungtu shiilangbi lei, welabi lei. Namshiq mung welabi raq arwetiim arka, jamkha riiho wa dan tlan, kra samhea tiima rong laq. 36Namshiq mung welabi raq asap han. Nam-nyangwii ajejetiq Theudas ka wela she dong tiikang nguta, mung na balashise phephiiq raito. Raüta, apaiq jaiphanti, maiq ka shiblaitin raq pong damto. Shatmaq, apaiq ka tsatbaiqto. Krai mren, asengi ka pongpin riipin she pintrangto. Kiimaq apaiq raq aphoqthü phung kriika kiikhiili she mokito. 37Kra jai miihali, Gelili wangti we Judas nguta maiq weshi hali, wela dong tiikang, nguta balashise tsangpii raito. Kriika mungmaiqse mang waiq akhing bala riito. Apaiq riimin mungmaiqse ka pahea tiimiirurangto. Shatmaq, apaiq kiimin tsatbaiqto. Apaiq tsaijai, asengi thun ka pongpin riipin wiita pintrangto. Raüta, mokito. 38Riita, krai mren, ara ümchaü armin, ngi chong i, namshiq raq tsangshiq thaq na asiq areng bom ka naq bom rongkiq. Tsangshiq ka maiqmii singa ngali mirlaq! Tsangshiq raq ümchaü jamlai wa shamtlaq arka, maiqse phaqchi maq adong dea jiika, armin ranaiqshi shi ka, apaiq momo mimoki. 39Shatmaq, arka Shiikeawe jaqsham dea jiika, namshiq raq tsangshiq jaqsham ka tangta lot man mirhan. Kiimaq, namshiq maiqmii kriikhoti, Shiikeawe rai riilong liiq ma mojakai min miraq!” nguta Rung welabi ma tsii ka chongkuqto.
Krai mren, Rung na ngati welabi raq bom ka Gamaliel raq tsii chongkuqtaq kiijiidea tiisupto. 40Tsangshiq raq kiimwebi ka kinphai wa Rung khok na tiiheaki nongto. Raüta, chunpo-nyam chongwai maq petanok ma ninta tiitsatto. Raüta, tsangshiq ma aming atsin maq hali, Jesuq arang maq trahoke maimak nguta aming kuq nongto. Raütiishe, tsangshiq raq kiimwebi ka phaqtek mong wa tiidong baiqto. 41Shiikeawe raq tsangshiq ka, Jesuq mang na chamchao homa howan nai maiq thoda howan miitu dea shiikapto nguta sap raüta, chojong chise maq, Rung khong mong kiiwa donghoto. 42Krai mren, tsangshiq raq wranaiqtek, Shomjam mong maq nai maiqjam maq, Jesuq kiidea Khristo nguta, Tsütsa Ahea kra nungpaq mak phan maq, shrin kuq wanto. Kiimaq traho hokuq wanto.
Obecnie wybrane:
KIIMWEBI JAQSHAM 5: TANGSBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
