KIIMWEBI JAQSHAM 3
3
Petar Nai Johan Raq Hokküwe Tiiheato
1Ranaiq shi Petar nai Johan ka Shomjam na ranaiq nari tsam na achu jaü wa wato. Kra akhing ka achu jaü akhing bala. 2Kiijaq, Shomjam rinkea na Shomjam ruk kilamda ashi asi. Kra Kilamda mang ka Atsomwiq Kilamda ngutlo. Kra Kilamda tho na, maiq weshi akü we asi. Apaiq ka anyung pukdong akü dongdii riito. Apaiq ka wranaiqtek anok raq piho lili raüta, Shomjam na wati jaq wa kampho bamhi phaqsiq laq nguta, Kilam chong na tiinga thüho lili riitlo. 3Apaiq raq Petar nai Johan ka Shomjam mong na wawan kra chhi raüta, tsangnai raq apaiq ma phanshi ra kuq raüjaq nguta jaüto. 4Kiijiishe, tsangnai raq apaiq ka tiqtiq liito. Raüta, Petar raq, “Nanai ara liilaq!” nguta apaiq ma chongto. 5Krai mren, tsangnai raq phanshi ra mikuq sham nguta tiima raüta, apaiq raq tsangnai pha nü na liito. 6Shatmaq, Petar raq apaiq ka thaüto, “I jaq na kampho lakshii ka jam min ahü. Shatmaq, i jaq na jamlai phan wa asi, kra ümniima ümchaü kuqtiikang. Najareth hiqti Jesuq Khristo mang na, ngi raq ümniima aming kuqtiikang, tiidolaq, laüta khumlaq!” 7Kra ngo lam miili she, Petar raq akü we ka ajaq jaqtsi nü maq hitjoq raüta tiichapto. Krai mren, maklii liipan niili, akü we hok nai ajidang ka hongsaq li she heakito. 8Krai mren, apaiq ka adoq haha she, kriijaq akhum ashiim she doqsiq wanto. Raüta, chojong chise miishe, tsangnai rai Shomjam mong na, adoq adit wa lam maq, “Shiikeawe dea ajong,” nguta Shiikeawe tiitsam kam lam maq, Shomjam mong niishe wawan damto. 9Kiijaq maiq pahea Shomjam na Shiikeawe shomnoqti raq, apaiq ka akhum ashiim lam maq, “Shiikeawe dea ajong” nguta Shiikeawe tiitsam kam rea kra chhito. 10Kiimaq tsangshiq raq apaiq ka, Atsomwiq Kilamda na nga raüta maiq hiseati poraki we ira nguta, tiitsangto. Raüta apaiq thatsi heakai kra chhi raüta, tsangshiq tarü ka kai awang rai nai amaorai riito.
Petar Raq Shomjam Maq Trahoto
11Kriiwe ka Petar nai Johan rai napshnap miishe, Solomon Jolitiip ngutlaq kiijaq, riikong khum wan dam ka chhi raüta, nokmaiqse ka kai amao rai lam maq, tsangtsam pha nü kiiniishe jutrang raüta, riitsap khat wanto. 12Petar raq nokmaiqse riitsap khat rai wan tlaq kra chhi raütiishe, apaiq raq tsangshiq ma akha ngutiishe trahokuq hoto, “I nok i hiq Israil mungti lei; namshiq ka ara maiqwe thatsi heakai kra chhi lanta, jam nguto wangrai tlan? Kiimaq namshiq raq naishiq ka jamlai nguto liirat holan? Arka naishiq ningkun maq nai naishiq ka kechu maiqse kha maq, arwe thatsi ara tiihea kuqto ngutiisha tiima tlan? 13Natitiim Abraham, Isak kiimaq Jakob Shiikeawe kiimaq natitiim Shiikeawe raq Ajaqshi se Jesuq ma, Shiikeawe apaiq asii khushü ngao kriika ake kun she. Shatmaq, namshiq raq, apaiq ka lap lanta, Jehudinok jaq na kiinong kuq lan. Kiimaq, lanta, Pilat raq apaiq ka namshiq makki na, apaiq dü na kha ahü, atiidong baiq chang nguta, kha ka photo. Shatmaq, namshiq raq apaiq ka atiidong baiq raa mak dongdii ngutiishe, tiishaü baiq lan. 14Apaiq ka asii kiimaq kechu maiqse. Shatmaq, namshiq raq apaiq ka tiishaü baiq lan. Kiimaq, namshiq raq apaiq la na, matwe ashi phaqtek mong na ashaq kriiwe kra khoti tiidongke raa nguta, Pilat jaq wa shiichut jaü lan. 15Namshiq raq maiqse ma tsitsü raüchong tiichamketi we kriika, atsea riibaiq lan. Shatmaq, Shiikeawe raq apaiq ka amaa wiishe hali tiidong wan nongto. Kiimaq, apaiq ka amaa wa dong wantaq kra chhi wantibi hakhi ka naishiq sitiikai. 16Riita, ümchaü ara akü we hoktsi heakitaq arka, kriiwe mang na ningkun asi kha maq, kra ningkun raq tiihea kuqto. Ümchaü namshiq maiqmii raq jamlai wa chhi tlan kiimaq sap wan tlan arka, kriiwe mang ningkun na kamtsantsii thü tiikai kra lümaq atiihea kuq chhi tlan. Arka, Jesuq ma kamtsantsii rüm tiikai kra lümaq, apaiq ka heato. Ümchaü ka namshiq tarü raq, maiqmii mak maq chhi lan she.
17“Riita, ümchaü min, i phu i notiim lei, namwelabi raq nai namshiq raq, Jesuq tsatbaiq lan kriika, namshiq raq ajiq dea klo kai nguta sap man kha miili dea, kiimung lan nguta ngi raq asap ha. 18Arka, Shiikeawe raq rathup rapha niiphü dongdii, apaiq shammibi tarü nübok maq, apaiq Khristo ngutlaq kriika, pinthum chamchao raütiitiq tsai chang dongdii miraq, nguta tiithai chong jeshe dongdii. Krai mren, Shiikeawe raq shammibi lümaq tiithai chongkuqtaq kra phan phan she dea, ara mra ka pin wanto. 19Riita, ümchaü min, ara chong tiikai arai mren, namshiq raq maiqmii ngarai ka tiidii tlo ronglaq. Lanta, Shiikeawe wokhong na nyap wan tlo ronglaq. Kra riihan jiitiq, Shiikeawe raq namshiq ngarai kra midii kuq. Namshiq raq kra riihan jiila, 20Tati Shiikeawe raq namshiq ma wenyi rilung na phintsaqtsaq hea miishe siwan miitu, akhing ahea mikuq. Apaiq raq namshiq miitu, Jesuq ka Khristo nguta man niiphü ashong wan kun she dongdii. Krai mren, apaiq ka namshiq phaniishe mitiiki. 21Shiikeawe raq awokhong na siti asii shammibi nübok maq, man na rathup rapha richü pat na, riisham bom tiichongtaq kra phanphan, Jesuq ka ramungtan na siruqli she misi wan. Apaiq ka Shiikeawe raq, ara phanrap ra nai hiq sitlaq ara, tingsang anye ma tiija wan rahiq akhing saü tlaq kiijaq saüli, ramungtan niili she mitiisi. 22Arka, man na Mosheq raq chongkuq thütaq kriishe hong wanto. Mosheq raq akha chong thüto, ‘Tati Shiikeawe raq ngi ka namshiq miitu shammi ma jamkho shongtaq, kiikhiisii hali, apaiq raq namshiq miitu shammiwe weshi hali mishongkuq wan nong. Kiimaq apaiq ka namshiq nok phan wa mitsea wan. Namshiq nok raq, apaiq aming kra wiita phaqchii nichii maq lang chang miraq. 23Juwa kra shammiwe aming wokhong na simak, kriiti ka, Shiikeawe sengi phong wa ashleq mirbaiq. Raüta apaiq ka atsea mirbaiq,’ nguta chongtlo chhi tiikai. 24Kiimaq, Shiikeawe raq atiichong tsütsa chongketi shammibi thun wiitarü raq, Shammi we Samuel pat maq pha raüta, apaiq jai na shammibi ümchuwa dong wantaq kriiti thun wiita raq, ara ümchaü bala jamlai phan mra wa pinrai wantaq, arthun arka, mihong wan dongdii nguta chongke wanje she dongdii riito. 25Namshiq ka shammi lai ala nok sitlan. Kiimaq Shiikeawe raq namtitiim rai tongshong wantaq kra ramkham maq tiibok wanje she. Shiikeawe raq Abraham ma, ‘Ümsaü ümsetiim lümaq, ngi raq mangjong maiqse tlotli ma achu mishman kuq ha,’ nguta kiqkham kuqto. 26Riita, ara chongtiikai arai mren, Shiikeawe raq Akoli se ka shongto. Raüta, apaiq ka namshiq phana kongkhu tiikito. Ara tiikitaq arka, namshiq ma achu shiiman kekai tiikito. Kiimaq namshiq ka maiqmii ngarai lamphan kra miimbaiq thü lanta, Shiikeawe wokhong na tiijang shea kai nong miitu tiikito.”
Obecnie wybrane:
KIIMWEBI JAQSHAM 3: TANGSBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
