Эге дөс 7
7
Суг халавы
1Дээрги-Чаяакчы Нойга мынча дээн: «Өг-бүлеңни эдертип алгаш, бажың-хемеге олурувут. Бо-ла бүгү кижилерниң аразында Мээң мурнумга чөптүг-шынныг кижи чаңгыс сен деп көрүп тур мен. 2Арыг дириг амытаннарның чеди-чеди эжеш эр-кыс бүгү хевирлеринден алгылап ал. Оон ыңай арыг эвес дириг амытаннарның бир эжеш эр-кыс хевиринден, 3янзы-бүрү дээрниң куштарының база чеди-чеди эжеш эр-кыс хевирлеринден ап ал. Оларның уксаалары чер кырынга артып калзыннар. 4Чеди хонгаш, Мен черже чаъс чагдырар мен, ол дөртен дүн-хүннүң дургузунда кудуп кээр, ынчалдыр Мен чер кырында чаяап каан бүгү чүвелеримни узуткап каар мен». 5Дээрги-Чаяакчы канчаар айытканыл, Ной дөгерезин ынчаар күүсеткен.
6Ной 600 харлыг турда, чер кырынга суг халавы эгелээн. 7Суг халавындан Ной оолдары, кадайы база кенээттери-биле кады бажың-хемеге олурупкаш, камгаланган. 8-9Арыг болгаш арыг эвес дириг амытаннарның бүгү хевирлерин, куштарны база черниң янзы-бүрү амытаннарын эр-кыс эжеш кылдыр Бурганның айыткалын ёзугаар Нойнуң бажың-хемезинче киирип алганнар. 10Чеди хонук эрткенде, чер кырынга суг халавы эгелээн.
11Нойнуң амыдыралының 600 дугаар чылында, чылдың ийиги айында, айның он чеди дугаар хүнүнде чер адаандан дүп чок ээрем суглар хөме агып кээп, дээрниң эжиктери ажыттына берген. 12Дөртен дүн-хүннүң дургузунда черже чаъс-чайык кудуп келген. 13Ол хүн Ной оолдары – Сим, Хаам база Иафет-биле, кадайы болгаш кенээттери-биле кады бажың-хемеже кирип келген. 14Олар-биле кады янзы-бүрү аң-мең, мал-маган, чалгынныг куштар база соястаарлар шупту кирип келгеннер. 15Амылыг чүве бүрүзү эжеш болуп алгаш, Нойнуң бажың-хемезинче кирип келгеннер. 16Бурганның айыткалы ёзугаар Ной амытаннар бүрүзүнден эр-кыс эжеш кылдыр ап алган. Ынчан Дээрги-Чаяакчы Нойнуң соондан бажың-хемениң эжиин хаапкан.
17Суг халавы дөртен хүн дургузунда чер кырынга уламчылап келген. Суг чыглып, улгаткаш, бажың-хемени көдүрүп келген. Ынчан бажың-хеме черден көдүрүлгеш, сугга салдап чорупкан. 18Суг немежип-ле, черни шып-ла турган. Бажың-хеме сугга салдап чораан. 19Дээр адаанда турар эң-не бедик дагларны безин шыпкыже, суг көдүрлүп-ле орган. 20Суг оларның кырынга он беш кыры дурту көдүрлүп кээрге, даглар суг адаанче кирип, көзүлбейн барган. 21Ынчалдыр черге чурттап чораан дириг чүвелер шупту өлгүлеп калган: куштар-даа, мал-маган-даа, аң-мең-даа, соястаарлар-даа, кижилер-даа. 22Тынып чораан амытан бүрүзү, кургаг черниң чурттакчылары шупту кырлып калган. 23Чер кырынга бар турган чүве шупту – кижилер-даа, мал-маган-даа, соястаарлар-даа, дээрниң куштары-даа – узуткаттынган. Чүгле Ной болгаш ооң-биле бажың-хемеге кады чораан амытаннар дириг артканнар. 24Суг 150 хүн дургузунда чер кырынга тергиидээн.
Obecnie wybrane:
Эге дөс 7: TUV
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Институт перевода Библии, Москва, 2011
