Эге дөс 13
13
Лоттуң Аврамдан аңгыланганы
1Ынчан Аврам кадайы-биле кады бүгү өнчү-хөреңгизин ап алгаш, Египеттен Негевче чорупкан. Оларның-биле кады Лот база чорупкан. 2Ол өйде Аврам мал-маган, алдын-мөңгүн-биле дыка бай апарган турган. 3Ол Негевтен көжүп чорупкаш, мооң мурнунда Вефил биле Гайның аразынга майгынын тип алгаш чурттап турган черинге чедип келген. 4Мооң мурнунда-ла өргүл салыр бедигээш тудуп каан черинге ол чедип келген; аңаа Аврам Дээрги-Чаяакчыны мактап, Ооң адын адап кыйгырган. 5Аврам-биле кады көжүп чораан Лоттуң бодунга хамааржыр шээр болгаш бода малы, майгыннары база бар турган. 6Оларның кады чаңгыс черге чурттаары дакпыш апарган, чүге дээрге мал-маганы, эт-хөреңгизи көвүдээш, ол кавыга сыңышпастап эгелээн. 7Ынчангаш Аврамның болгаш Лоттуң кадарчыларының аразынга маргылдаа үнген. (Ол өйде хананей чон болгаш ферез чон база ол черге чурттап турганнар.)
8Аврам Лотка: «Бистиң аравыска база сээң кадарчыларың биле мээң кадарчыларым аразынга алгыш-кырыш турбас ужурлуг, чүге дээрге бистер төрел улус-тур бис#Ыд. ыр. 132:1 – деп чугаалаан. – 9Сээң мурнуңда чер чок эвес. Менден аңгыланып алзыңза кандыгыл? Бир эвес сен солагай талазынче баар болзуңза, мен оң талазынче барайн; а бир эвес сен оң талазынче баар болзуңза, мен солагай талазынче барайн». 10Лот топтап көргеш, Иордан хемниң чоок-кавызында Төгерик шынааны көрүп каан. Ол чер Сигор хоорайга чедир, Дээрги-Чаяакчының сесерлии дег#Э. д. 2:10, египет чер дег, суггаттыг болган. (Ук чер Дээрги-Чаяакчы Содом биле Гоморра хоорайларны узуткап каарынга чедир ындыг турган.)#Э. д. 19:24 11Лот чурттаар кылдыр Иордан хемниң Төгерик шынаазын бодунга шилип алган; ынчангаш Лот чөөн чүкче чорупкан. Ынчалдыр олар бот-боттарындан аңгыланып алганнар. 12Аврам ханаан черге чурттай берген, а Лот Төгерик шынааның хоорайларынга чурттай берген, ынчангаш майгыннарын Содомга чедир тип алган. 13А Содомнуң чурттакчылары каржы база Дээрги-Чаяакчының мурнунга дыка бачыттыг улус турган#Э. д. 18:20.
14Лот аңгыланып алганының соонда, Аврамга Дээрги-Чаяакчы мынча дээн: «Долгандыр көрүп көрем. Ам бо турган чериңден соңгу, мурнуу, чөөн, барыын чүктерже көр. 15Көрүп турар черлериңни Мен сеңээ болгаш сээң салгалыңга мөңгеде бээр мен#Иис. 21:43. 16Сээң салгалыңны черниң элезин-довураа дег хөй санныг кылып каар мен; черниң элезининиң санаттынмазы дег, сээң салгалың база санаттынмас хөй болур#3 Хаан. 3:8. 17Черни узун дургаар база доора дургаар эргий кези, чүге дээрге Мен ону сеңээ бээр болгай мен». 18Аврам бир черден бир черже көжүп чорааш, Хевроннуң чоогунда Мамре деп дуб ыяштыг чер чанынга турумчуп чурттай берген. Аңаа ол Дээрги-Чаяакчыга өргүл салыр бедигээш тудуп алган.
Obecnie wybrane:
Эге дөс 13: TUV
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Институт перевода Библии, Москва, 2011
