Ioane 4
4
O Iesu ma le Fafine Samaria
1‘Ua fa‘alogo faresaio ‘ua to‘atele so‘o ‘ua maua e Iesu ma papatisoina i lo Ioane. 2Peita‘i e leai se isi na papatisoina e Iesu; ‘ae na o ona so‘o sa papatiso atu. 3‘Ina ‘ua fa‘afofoga Iesu i lenā mea, sa tu‘ua loa Iutaia e ia ‘ae toe fo‘i atu i Kalilaia. 4E tatau ‘ona ui atu o ia i Samaria.
5‘Ua o‘o atu o ia i le ‘a‘ai o Samaria, o Sukara le igoa, e lē mamao ma le fanua na avatu e Iakopo i lona atali‘i o Iosefa. 6Sa i ai le vai‘eli o Iakopo i ‘ina, ‘ua vāivāi Iesu i lana malaga, ‘ona nofo lea o ia i tafatafa o le vai‘eli. E tusa o le itūlā e sefulu ma le lua i le aoauli.
7Na alu ane se fafine Samaria e utu vai, ‘ona fetalai atu lea o Iesu ‘iā te ia, “Aumai sina vai mo a‘u.” 8Auā na ō atu ona so‘o i le ‘a‘ai e fa‘atau mea‘ai.
9‘Ua tali mai le fafine Samaria, “O oe o le Iutaia, a o a‘u o le Samaria a e fa‘apefea ‘ona e ōle mai ‘iā te a‘u mo se vai inu?” Auā e leai ni mea e fe‘avea‘i a Iutaia ma Samaria.
10‘Ua tali atu Iesu, “ ‘Ana e iloa le meaalofa a le Atua, ma lē ‘ua fai atu ‘iā te oe, ‘Aumai ia se‘i ‘ou inu,’ se manū ‘ua e ōle mai ‘iā te ia, ‘ona foa‘i atu lea ‘iā te oe o le vaiola.”
11‘Ua fai mai le fafine, “Le Ali‘i e, e leai sau pakete, ‘ae maulalo fo‘i le vai‘eli. O fea la ‘e te maua ai lenā vaiola? 12Na aumai ‘iā te i matou e Iakopo lo matou tamā le vai‘eli lenei, ma sa feinu ai fo‘i o ia ma ona atali‘i ma ana manu. E sili ‘ea oe ‘iā te ia?”
13‘Ua tali atu Iesu, “So o se isi e inu i lenei vai e toe fia inu; 14‘ae peita‘i o lē e inu i le vai ‘ou te avatu ‘iā te ia, e lē toe fia inu o ia. Auā o le vai ‘ou te avatu ‘iā te ia, o le a ‘avea ma vaipuna e ola i totonu ‘iā te ia, e puna pea e o‘o i le fa‘avavau.”
15‘Ua tali mai le fafine, “Le Ali‘i e, aumai ia ‘iā te a‘u lenā vai! ‘Ona ‘ou lē toe fia inu ai lea, ma ‘ou lē toe sau ‘i‘inei e asu vai.”
16‘Ua fetalai atu Iesu ‘iā te ia, “Alu e vala‘au lau tane ma ō mai ‘i‘inei.”
17‘Ua tali mai le fafine, “E leai sa‘u tane.”
‘Ua tali atu Iesu, “ ‘Ua sa‘o lava a oe ‘ina ‘ua e fai mai e leai sau tane. 18Sa ‘iā te oe tane e to‘alima, ma o lē fo‘i o lo‘o ‘iā te oe nei, e lē sau tane o ia.”
19‘Ua fai mai le fafine ‘iā te ia, “Le Ali‘i e, ‘ua ‘ou iloa o oe o le perofeta.#1 Kori 14.24,25; Ioane 9.17 20O matou tamā sa tapua‘i i le Atua i lenei mauga, peita‘i o ‘outou tagata Iutaia, ‘ua ‘outou fai mai o Ierusalema, o le mea e ao ‘ona tatou tapua‘i ai i le Atua.”
21‘Ua tali atu Iesu ‘iā te ia, “Funa e, talitonu mai ia ‘iā te a‘u, o le a o‘o mai le taimi e lē toe tapua‘i ai tagata i le Tamā i lenei mauga po o Ierusalema fo‘i. 22O ‘outou tagata Samaria, ‘ua ‘outou matuā le iloa lē o lo‘o ‘outou tapua‘i i ai; a o matou tagata Iutaia, ‘ua matou iloa lē ‘ua matou tapua‘i i ai; auā e tupu mai i Iutaia le fa‘aolataga. 23Peita‘i, o le a o‘o mai le taimi, ‘ua o‘o nei lava i ai, o ē e tapua‘i moni, e tapua‘i i latou i le Tamā i le agaga ma le fa‘amaoni, auā o lo‘o sā‘ili le Tamā i ē e tapua‘i fa‘apenā ‘iā te ia. 24O le Atua o le Agaga o ia, o ē e tapua‘i ‘iā te ia; e ao ‘ona tapua‘i atu i le Agaga ma le fa‘amaoni.”
25‘Ua fai mai le fafine ‘iā te ia, “ ‘Ua ‘ou iloa o le a maliu mai le Mesia, lē ‘ua ta‘ua o le Keriso. ‘Āfai o le a maliu mai, o le a fa‘ailoa mai e ia ‘iā te i tatou mea uma.”
26‘Ua tali atu Iesu, “O a‘u lava lea o lo‘o tautala atu nei ‘iā te oe.”
27Na toe fo‘i ane so‘o o Iesu i lenā lava taimi, na matuā ofo i latou ‘ina ‘ua latou maua o talanoa o ia ma le fafine. ‘Ae peita‘i e le‘i fai atu se isi i le fafine, “O le ā le mea o lo‘o e sā‘ilia?” Po o le fesili atu fo‘i ‘iā Iesu, “ ‘Ua ‘oulua talanoa aiseā ma le fafine?”
28‘Ona tu‘ua lea e le fafine lana fagu vai, ‘ua toe fo‘i atu i le ‘a‘ai, ma fai atu i tagata o lo‘o ai, 29“O mai e va‘ai i le tagata ‘ua na ta‘u mai ‘iā te a‘u mea uma lava na ‘ou faia. Pe lē o le Keriso ‘ea lenei?” 30‘Ona tu‘ua loa lea e i latou le ‘a‘ai ‘ae ō atu ‘iā Iesu.
31Sa ōle atu ona so‘o ‘iā te ia i lea lava taimi, “Le A‘oa‘o e, taumafa ia sina mea‘ai!”
32A ‘ua tali atu Iesu, “O lo‘o ‘iā te a‘u mea‘ai tou te lē iloa.”
33Sa amata loa ‘ona fetautalatala‘i o so‘o, “Pe na avatu ‘ea e se isi se mea‘ai ‘iā te ia?”
34‘Ua fetalai atu Iesu ‘iā te i latou, “O la‘u mea‘ai, o le faia lea o le finagalo o lē na ‘auina mai a‘u, ma fa‘aumaina le galuega na ‘auina mai a‘u ‘ou te faia. 35Tou te le‘i fai ane ‘ea, ‘Toe fa masina ‘ona o‘o lea i le seleselega’? ‘Ou te fai atu ‘iā te ‘outou, se‘i ‘outou va‘ai lelei i le fanua: ‘ua matua le fuata ma ‘ua sauni mo le seleselega. 36O lē e selesele e maua e ia le totogi, e fa‘aputuina fo‘i e ia le fua mo le ola e fa‘avavau; ‘ina ‘ia tau fai fiafia lē na totōina ma lē e selesele. 37O le tulaga moni lenei ‘ua fa‘amaonia ai le ‘upu: ‘E totō e le tasi tagata, ‘ae selesele e le isi tagata.’ 38‘Ua ‘ou ‘auina atu ‘outou e selesele le fuata i le fanua tou te le‘i galulue ai; o lo‘o galulue ai nisi, ma o lo‘o manuia ai ‘outou mai a latou galuega.”
39E to‘atele tagata Samaria sa i lea ‘a‘ai na talitonu ‘iā Iesu, ‘ona o le molimau a le fafine Samaria; “ ‘Ua fa‘aali mai e ia ‘iā te a‘u mea uma na ‘ou faia.” 40O lea, ‘ina ‘ua ō mai tagata Samaria ‘iā te ia, sa ōle atu i latou ‘ina ‘ia latou nonofo; ‘ona nofo ai lea o Iesu i inā i aso e lua.
41E to‘atele fo‘i nisi na talitonu ‘ona o lana tala‘iga, 42na fai atu fo‘i i latou i le fafine, “ ‘Ua matou talitonu nei, e lē ‘ona o mea ‘ua e fai mai ai, ‘ae na matou fa‘alogo lava ‘iā te ia, ma ‘ua matou iloa ai o ia lava o le Fa‘aola moni o le lalolagi.”
‘Ua Fa‘amālōlōina e Iesu le Atali‘i o se Ali‘i Mautofi o le Mālō
43‘Ua mavae aso e lua, ‘ona tu‘ua lea e Iesu lea mea ‘ae maliu atu i Kalilaia. 44Auā ‘ua fetalai lava Iesu ia, “E lē mamalu se perofeta i lona lava nu‘u.”#Mata 13.57; Mare 6.4; Luka 4.24 45‘Ina ‘ua taunu‘u atu i Kalilaia, sa talia o ia e tagata; auā o i latou fo‘i na ō atu i le Tausamiga o le Paseka i Ierusalema, sa va‘ai ai i latou i mea uma na faia e ia i lea Tausamiga.
46‘Ona toe maliu atu lea o Iesu i Kana i Kalilaia, i le mea na liliuina ai e ia le suāvai e fai ma uaina. Sa i ai i ‘ina se ali‘i mautofi o le mālō, o lo‘o ma‘i lona atali‘i i Kapanaumi. 47‘Ina ‘ua fa‘alogo o ia ‘ua tu‘ua e Iesu Iutaia ‘ae maliu atu i Kalilaia, na alu atu loa o ia ma ōle atu ‘iā te ia ‘ia maliu atu i Kapanaumi, ma fa‘amālōlō lona atali‘i ‘ua toeitiiti oti. 48‘Ua fetalai atu Iesu ‘iā te ia, “E leai se isi o ‘outou e talitonu, vaganā ‘ua ‘outou va‘ai i galuega tetele ma le matagofie a le Atua.”
49‘Ua tali mai le ali‘i mautofi o le mālō, “Le Ali‘i e, maliu mai ia ta o manū e le‘i oti lo‘u atali‘i.”
50‘Ua fetalai atu Iesu ‘iā te ia, “Alu ia, ‘ua ola lou atali‘i!”
Na alu loa o ia, ‘ua talitonu i le ‘upu a Iesu. 51A o alu atu o ia i lona ‘āiga, na feiloa‘i o ia ma nisi o ana ‘au‘auna ‘ua ō mai ma se tala, “ ‘Ua ola lou atali‘i!”
52Na fesili atu o ia i ‘au‘auna, po o le ā tonu le taimi na toe manuia ai lona atali‘i; na tali atu i latou, “O le itūlā e tasi i le aoauli ananafi, na te‘a ai lona ma‘i vevela.” 53‘Ona manatua loa lea e le tamā, o le itūlā tonu lava lea na fetalai atu ai Iesu ‘iā te ia, “ ‘Ua ola lou atali‘i.” Na talitonu loa o ia ma lona ‘āiga ‘atoa.
54O lona lua lea o fa‘ailoga tetele na faia e Iesu, talu ai lona tu‘ua o Iutaia ‘ae maliu atu i Kalilaia.
Obecnie wybrane:
Ioane 4: SCNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Samoan Contemporary New Testament © Bible Society of the South Pacific, 2009.
