GÉNESIS 6
6
Apquiltemaclha almasomcaa enlhitaoc
1Aplhameclhec nic nat enlhitaoc as nalhpop. Apquilvitac nic nat apquitquic quilvanaa. 2Apquilvitac Dios apquitquic altomja altamila quilvanaa mepqui anatamcaa. Apquilyacyesquic nic nat quilvanaa. Inquilyimjapquic nic nat.
3Aptomjac nic nat Dios Apyimtalhnamo: —Am oltamjoc coo eltiyasam enlhitaoc cotmongvoycamlha nelha. Ayinyemaclha apyovoclhojo innac enlhitaoc. Apvancaac eltiyasam acvamlha 120 años— nic nat aptomjac.
4Apquilvitacpec nic nat siclho enlhit apquilvinatem apanco as nalhpop. Ayinyemaclha inquilyimjapamquic nic nat Dios apquitquic quilvanaa enlhit apquitquic. Apquiltamongvocmec nic nat apquitquic. Natamin apquilvitacpec nic nat mocjam enlhit apquilvinatem apanco. Apquilyimnatem apanco ihlnic nat siclho, am nic nat elhnoc poc enlhitaoc.#Nm 13.33.
5Apvitac nic nat Dios Apyimtalhnamo apquiltemaclha apquilmapsomcaa enlhitaoc lhalhma anco. Inquilquitamquic nic nat mataa apquilvalhoc asoc almasomcaa. 6Am nic nat colcac apvalhoc Dios Apyimtalhnamo aptemaclha apquillanay nic nat siclho enlhit. Inyitnocjavoc nic nat apvalhoc.
7Aptomjac nic nat Dios Apyimtalhnamo: —Pac sat osavojo otvacsic aplhamoclhojo enlhitaoc silanay coo. Otvacsic sat aclhamoclhojo ninnatoscama najan asoc alpilhyevaycam nalhpop najan aclhamoclhojo nata. Am colcac evalhoc silanay siclhoc anco aclhamoclhojo asoc— nic nat aptomjac.
8Inlicavoc nic nat apvalhoc Dios Apyimtalhnamo aptemaclha Noé.#Mt 24.37; Lc 17.26; 1 P 3.20.
Yamit aysicsic actiyascam nayingmin
9Eycaso amyaa aptemaclha ilhnic nat Noé. Appeyvomo ilhnic nat Noé. Am nic nat esilhnanacpoc napato Dios Apyimtalhnamo. Am nic nat elhnoc apquictingaycamco lhama. Apyiplovcasquic nic nat Noé apmayjayoclha Dios Apyimtalhnamo.#2 P 2.5. 10Apnatqui ilhnic nat apquitquic Noé: lhama apvisay Sem, apyalhing apvisay Cam, poc apyalhing apvisay Jafet.
11Apquilmapsomcaa ilhnic nat enlhitaoc lhalhma anco. Avanjec nic nat melyascalhma napato Dios Apyimtalhnamo. 12Apvitac nic nat Dios Apyimtalhnamo apquiltemaclha almasomcaa enlhitaoc lhalhma anco. Lhama ilhnic nat apvita Dios Apyimtalhnamo apquiltemaclha apancaoc enlhitaoc.
13Aptomjac nic nat Dios Apyimtalhnamo apcanya Noé: —Pac sat osavojo otvacsic enlhitaoc lhalhma anco. Apquilsilhnanomap apanco najato ayinyema apquiltemaclha apancaoc. Pac sat osavojo otvacsic enlhitaoc najan acyovoclhojo as nalhpop. 14Ilaná sat lhip memong nicjaa yamit aysicsic actiyascam nayingmin. Ilaná sat aclhamoclhojo avalhoc congne. Ilapaoc sat yamit anyi aclhamoclhojo alyancalhcaoc. Ilapaoc sat ayimpejic najan avalhoc barca yamit aysicsic yoyam cotlhejec yingmin. 15Ilyipsitaoc sat acvamlha yoyam elanac barca yamit aysicsic: Ilyipsit sat acvamlha acvinatem 135 metros. Ilyipsit sat acvamlha acyivey 22 metros y medio. Ilyipsit sat acvamlha acvinatem netin 13 metros y medio. 16Ilana sat natqui avalhoc netin. Ilana sat lhama atong ayitcoc actomjaclha nelha netin natqui avalhoc. Ilana sat lhama atong acyivey nicja barca yamit aysicsic. 17Pac ongvapajacsic sat acmamay acvanyam as nalhpop. Cosavojoc sat ayapma as nalhpop. Pac sat osavojoc otvacsic enlhitaoc najan aclhamoclhojo asoc aleyvam lhalhma anco. Colitsapoc sat aclhamoclhojo aleyvam as nalhpop. 18Pac otnesquisic asoc monquinatquiscama sicmayjayoclha ajanco apnaclha lhip. Elantilhic sat barca yamit aysicsic lhip apquitquic najan apnatamcaa. Etlhic sat lhip najan aptava. 19Ilantalhnes sat lhip acvamlha anit moclhama actemaclha asoc aleyvam as nalhpop yoyam colvomoc tap. Lhama sat mataa inquinavo najan lhama inquilvana. 20Moclhama actemaclha asoc aleyvam as nalhpop colantilhic sat barca yamit aysicsic: moclhama actemaclha nata, moclhama actemaclha ninatoscama, moclhama actemaclha asoc alpilhyevaycam nalhpop. Colvomoc sat tap moclhama actemaclha. 21Ingyansiclha sat lhip aclhamoclhojo actemaclha nintom najan actoycaoc asoc alyanca avalhoc barca yamit aysicsic— nic nat aptomjac Dios.
22Apquilyajaclhoc nic nat Noé actemaclha appayvam apcanama Dios.#He 11.7.
Obecnie wybrane:
GÉNESIS 6: ENHL
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
