Metiu 13
13
Orek Fatoftof na Tom Soso
Mak 4:1-9; Luk 8:4-8
1Na biing tom ae, Iesu ka suu tina fel ke ka kiis na baban dan kawil. 2#Luk 5:1-3Tara gur na fanu ri ka la usuf i, pesu ka wof na nenge mon ke ka kiis lo, ma tara gur na fanu ae ri ka soti na kiin. 3Ke ka fas ri ini ifuun e tier ini orek fatoftof ma ka tarah, “Ongen u! Nenge tom soso i la isi saprai kutun wit. 4Aunbiing i sapsaprai, fal ka luut tole sal ke foron man ri ka wofpiek ke ri ka ting tikii u. 5Fal ka luut na olon fatfat ae biil i laumet e nanal lo. Ka rarau sape, wara le nanal biil i to laumet. 6Isau le aunbiing pisiih i popos, ka pose ri ke ri ka mang, wara le biil ti bauli. 7Fale kutun wit ka luut na palgan foron finau ae imel e si. Aunbiing finau i kuum, ka kuruung foron wit. 8Isau le fale kutun wit ka luut na nanal rokap ke ka fua, fal nenge mar e fua, fal iwon e sangful ke fal ituul e sangful. 9Se imel e balbalu, i rokap le in wong ini.”
Wara ae Iesu ka Fafas la ini foron Orek Fatoftof
Mak 4:10-12; Luk 8:9-10
10Berberat na fafausum kia ri ka la unaisa ma ri ka diik u aragii, “Isi sani o ka orek la usuf fanu ini foron orek fatoftof?”
11Ke ka kiliis ri aragii, “God i ta ta tasum usuf gam isi gamen usum na foron tier ae i kum na matanfuntih tinbae na kukulii, isau le biil i ta u usuf fanu tikii igii. 12#Metiu 25:29; Mak 4:25; Luk 8:18; 19:26Se imel e tasum kia, rin falaumet tasum ae sing i, isi tasum kia ik lala laumet. Isau le se ae biil ti tasum kia, rin tel ufu fabiro tasum ae sing i. 13Ia orek usuf ri ini orek fatoftof, wara le:
‘Taftawa ri par, isau le biil ri par failiim ti tier,
ri wong, isau le biil ri ongen failiim ti tier
ke biil ri malal ulo.’
14 #
Aisaia 6:9,10 Ka suut mang e orek ke profet Aisaia ulo ri ae i use ta u aragii:
‘Gamen ongne ma gamek ongne,
isau le biil tom gamen malal.
Ke gamen par ma gamek par,
isau le biil tom gamen iliim ti tier.
15Wara le balan fanu igii ka kutkut tah
ke biil ifasi rin wong ini balbalu ri
ma matri ka kut tah.
Tarama ri ka par failiim ini foron matri,
ri ka ongen failiim tier ini balbalu ri
ke wolwol kiri ik malal
ma rik fis usuf iau ma iak faliu ri.’#Aisaia 6:9-10
16 #
Luk 10:23,24 Isau le gam kalok, wara le gam par ini kolson matmi, ke gam wong ini balbalu gam. 17Tekentu kanaka ia fas gam, ifuun e profet turan foron tom tortores, ri kalkal ta isi rin par sani gam par u, isau le biil ri par u. Ke ri kalkal ta isi rin ongen sani gam ongen u, isau le biil ri to ongen u.
Iesu i Famalal Kamtinan Orek Fatoftof lon Tom Soso
Mak 4:13-20; Luk 8:11-15
18“Gam ongen u, igii e kamtinan orek fatoftof lon tom soso. 19Aunbiing tikas i ongen Rokap na Fafas na matanfuntih ma biil i malal lo, i arae kutun wit ae i luut tole sal. Ke kaltu laulau ka la ma ka tel ufu orek ae ri so ta u na bala. 20Ke kutun wit ae i luut na olon fatfat, i arae nenge kaltu ae i ongen orek ma fanpil ka somangat pes u ini laes. 21Isau le biil i ti dolo, arae wit ae biil ti bauli. Ka luut sape sau, aunbiing i tafe tatawin ke aunbiing fanu ri ta fangungut sing i, wara na orek ke God. 22Kutun wit ae i luut na palgan foron finau ae imel e si, i arae nenge kaltu ae i ongen orek, isau le i mamais kanaka isi foron tier tinaga na piklinbat ma sinangun ier isi in fuun e minsik i fabal u, ke ka aung orek ke God, arae finau i rarau kale wit, ke biil i fua. 23Ke kutun wit ae i luut na nanal rokap, i arae kaltu ae i ongen orek ma ka malal lo. I arae wit ae i luun nenge mar, le iwon e sangful le ituul e sangful e fua.”
Orek Fatoftof na Wit ke Fifih Laulau
24Iesu ka fas ri sabin ini nenge orek fatoftof aragii, “Matanfuntih na kukulii i arae nenge kaltu ae i la isi so foron rokap na kutun wit na mok kia. 25Isau le aunbiing fanu tikii ri borong, tuui kia ka la ma ka so foron kutun fifih laulau na fatpoton foron kutun wit, ke ka la. 26Aunbiing foron kutun wit ri ka kuum ma fatat rik fua, foron fifih laulau sabin ri ka kuum turim tura.
27“Ke foron tom foim ken taman mok ae ri ka la usuf i ma ri ka fas u aragii, ‘Ier, o so ta foron kutun wit rokap sau na mok kiam. Tinga sabin e foron fifih laulau ae ka kuum na mok kiam?’
28“Ka kiliis ri aragii, ‘Nenge tuui i tel u e matngan sinang ae.’
“Ke foron tom foim kia ri ka diik u aragii, ‘Arafah, o ier le kemen la ma kemek fut sarara ufu ri?’
29“Ka tikale ri le, ‘Gong, tarama gam ka fut saraf foron wit sabin turan foron fifih laulau. 30Taftawa bii ruk kuum turim papang na biingen lulus. Na aunbiing mang ae ian fas foron tom lulus le: Gamen fut turim foron fifih laulau famu, ke gamek diit buta, isi gamek fasok ri, namih gamek lus turim foron wit ke gamek siing u na papah kiak.’”
Orek Fatoftof na Kutun Mastet
Mak 4:30-32; Luk 13:18-19
31Ke ka fas ri sabin ini nenge orek fatoftof aragii, “Matanfuntih na kukulii i aragii kutun mastet ae nenge kaltu i kep u ma ka so u na mok kia. 32Kutu i fabiro kanaka na foron kutun au tikii, isau le aunbiing i kuum, ka tapiek nenge au, ma ka liu ufu foron au tikii na palgan mok ae ri so u la. Ma foron man na mua ri ka tel polpolo ri na foron aka.”
Orek Fatoftof na Is
Luk 13:20-21
33Iesu ka fas ri sabin ini nenge orek fatoftof aragii, “Matanfuntih na kukulii i arae is ae nenge fifin i kep u ma ka ikis u turan ifuun e palawa, ma palawa tikii ae ka sut.”
34Foron tier tikii igii Iesu i use u usuf gur na fanu ini foron orek fatoftof sau. Biil i use famalal ti tier usuf ri, biil. I fafas usuf ri ini foron orek fatoftof sau. 35#BukSong 78:2I use u arae una fasuut orek ke profet ae i use ta u aragii:
“Ian orek ini foron orek fatoftof.
Ian use foron tier ae ri mumun,
tipes u tom na aunbiing God i fakiis ta piklinbat.”
Iesu i Famalal Orek Fatoftof na Wit ke Fifih Laulau
36Namih, Iesu ka la koseng gur na fanu ae ma ka kau na fel. Berberat na fafausum kia ri ka la usuf i ma ri ka diik u isi in famalal kamtinan orek fatoftof na foron fifih laulau ae ri kuum na mok.
37Ke ka fas ri aragii, “Kaltu ae i so kutun wit, i e Kalalik ken Kaltu. 38Mok i e piklinbat, ke foron kutun wit, ri arae fanu tinbae na matanfuntih na kukulii. Foron fifih laulau ri arae berberat ken kaltu laulau. 39Ke tuui ae i so ta fifih laulau, i e Satan. Ma aunbiing na lulus e farfarop na biing, ke foron tom lulus e foron angelo.
40“Foron fifih laulau ae ri fut turim ri ma ri ka fasok ri na yiif, in tara sabin arae na farfarop na biing. 41Kalalik ken Kaltu in wuun ufu foron angelo kia, isi rik rap ufu foron tier tikii tina matanfuntih kia, ae i falamlam fanu la isi tel sinang laulau turan foron tom tel sinang laulau tikii. 42Ke rik lin ri una tara yiif, ae rin teng ma rik faririt ngisri aiwa. 43Foron tom tortores rik popos arae pisiih na matanfuntih ke Temri. Se imel e balbalu, i rokap le in wong ini.
Orek Fatoftof na Nenge Rokap na Tier ae ri Fun ta u
44“Matanfuntih na kukulii i arae nenge rokap na tier ae ri fun ta u na nenge falifuh. Aunbiing nenge kaltu i im tafe u, ka fun kiliis u sabin, ke ka la ini laes isi sufii tikii foron minmara, ma pitkalang lo ik fiil pes sun falifu ae ini.
Orek Fatoftof na Kolson Matanwah
45“Ke matanfuntih na kukulii, i arae nenge kaltu sabin i im isi foron rokap na kolson matanwah. 46Aunbiing ka tafe ta nenge kolson matanwah ae i rokap kanaka, ka la ma ka sufii tikii foron minmara, ma pitkalang lo ik fiil pes kolson matanwah ae ini.
Orek Fatoftof na Ubiin
47“Matanfuntih na kukulii sabin i arae nenge ubiin ae ri lin ta u na palgantes, ma marmarsan kok tikii ri ka liil lo. 48Aunbiing ubiin ka fuun, foron tom lin ubiin ri ka dat famasa u, ri ka kiis ma ri ka fule pes fal rokap, ke ri ka siing u na foron sara. Isau le fal laulau ri ka lin u. 49In tara sabin arae na farfarop na biing. Foron angelo rin la, ma rik fule ufu fanu laulau koseng foron tom tortores. 50Ke rik lin fanu laulau una tara yiif ma aiwa, rin teng ke rik faririt ngisri.”
51Iesu ka diik ri aragii, “Arafah, gam malal sabin na sani ae ia ka use ta u?”
Ri ka kiliis u aragii, “Iuu.”
52Ke ka fas ri aragii, “Foron tom fafausum ini nagogon tikii ae ri ka kep tasum ta na matanfuntih na kukulii, ri arae nenge taman fel ae i fasuu foron minsik tina fel kia, fal fuuh turan fal tofe.”
Fan Nasaret biil ri unune lo Iesu
Mak 6:1-6; Luk 4:16-30
53Aunbiing Iesu ka use tikii ta foron orek fatoftof ae, ka la koseng maleh ae 54ma ka fis una maleh tutus kia. Ka fausum fanu aiwa na felun lotu kiri, ke ri ka lala bitit ma ri ka tarah, “Kaltu igii i kep tasum igii tingah? Ke i kep rakrakai una fatapiek foron tier an fabitit igii tingah? 55Kere usum sau le, tama i nenge tom tel fel ke tina e Maria, foron tualik e Jems, Josep, Saimon ke Iudas 56ke foron fenelik igii sau na aisrer. Ma i kep foron tier igii tingah?” 57#Jon 4:44Pesu biil mang ri laes ini.
Isau le Iesu ka fas ri aragii, “Nenge profet ri bulat la lo na fale maleh keskes, isau le na maleh tutus kia ke na matanfel kia tom, biil ri bulat la lo.”
58Ke biil i fatapiek ifuun e tier an fabitit aiwa, wara le biil ri unune lo.
Obecnie wybrane:
Metiu 13: BJP
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2015, 2021 Wycliffe Bible Translators, Inc. All rights reserved
