Mark 14

Jew ai babada, Iesu i ogei da itavi raḡeni

(Mat 26:1-5; Luk 22:1-2; Jhn 11:45-53)

1Au pom ruaḡa muriai da Raḡona ma Palawa Bagibagina torelai,#14:1 Raḡona/passover Exo 12:1; Palawa Bagibagina/Unleavened Bread Exo 12:17; 23:15 Pirisi Babadai ma Tarawatu Babadai eta i baibaiei da menanare govagovaḡanei Iesu ita vunui. 2Ma i riwa, “Au torela wei kauai eḡa tana kauei, mepa da viḡaiḡaiawa ḡaeḡaena ina tupua.”

Wavine, daji ḡabuḡabuna Iesu au kolana i waḡi

(Mat 26:6-13; Jhn 12:1-8)

3Maranai Iesu au Bet-Ani, Simon i ḡoreḡorei lepeleperana ana au numa i kiala ma i amam. Wavine, wagi wavana alabaster i voai ma i ḡeta ma wagi uana ivo ḡai ma daji ḡabuḡabuna, maiana ḡaeḡaena e ḡoreḡorei nard, Iesu au kolana i waḡi. 4Rava ḡelaui kampa i mamae i ḡaiawa ma i riwa, “Aiwai au baina daji uvi kalokaloei? 5Wei dajina ita gimarei 300 denarii #14:5 Wei lamna me taubagibagi ana maia madeḡa tagogi au baina. ruvana ma manena molamolakai ita verei.” Ma taui, wavine ivi enenei.

6Wate Iesu i riwa, “Onavo terei! Aiwai au baina ovi nuabolai? Tauna, kaua aiaina awariu i kauei. 7Molamolakai awarimi e mamae nonoa ma ona ḡoei ma taui ona voagui. Wate tau awarimi eḡa ata mamae nonoa. 8Wavine ana nola i kauei. Tauna, dajiei tupuau ivo kaukauana nonoei vikokoaga au baina.#14:8 Mai Jew ai kaua da taubeu dajiei e bulobuloi muriai au kokoaga e tereterei. 9A ririwana kauemi, mepa Riwa Aiaina i rau-gugulei dobu au ana tapui, wei wavinena aiwai i kaukauei ina babaniei, ma eḡa nuanuai ina vuru.”

10Judas Iskariotei tauna 12 tagogi, Pirisi Babadai awari i ḡeta da Iesu itavi benabenamei. 11Taui ivi nuaiai kaua maranai wei i nonori ma Judas i parivai-nuaḡani da mane ita verei. Ma Judas i inana da mepa gavogavo ita inanai da Iesu ita amverenei.

Iesu ma taui 12 Raḡona torelana i ani.

(Mat 26:17-25; Luk 22:7-14, 21-23; Jhn 13:21-30)

12Ma Palawa Bagibagina torela inavi karei. Maranai sipu orotoi ḡauboi e vunuvunui Raḡona torelana au baina. Tauvotaḡotaḡo, Iesu i paridadanei, “Mepa u ḡoeḡoei Raḡona torelana anavo kaukauei au baim?”

13Iesu, taui ruaḡa i riwei ma i paritawanei, “Ona nae au Jerusalem ma oroto, waira wagina e avavarai ona inanai ma onavo taḡotaḡoi. 14Au numana e ruiruiana, numa taniwagana ona riwei, ‘Ai tauviararamana i riwa. Numa vokaukauana mepa ma au Tauvotaḡotaḡo maiteni Raḡona torelana ana ani?’ 15Ma tauna, numa vatavatara inavi atataiemi ivo kaukauana nonoei ma kampa au baita ona vokaukaua.”

16Tauvotaḡotaḡo i nae au Jerusalem ma i ririweia nanare i nelaḡai ma Raḡona torelana ivo kaukauei.

17Au i biga ma Iesu i nei taui 12 maiteni. 18Taui au kepakepa i amam ma Iesu i riwa, “Anina a ririwemi. Taumi tagogi inavi benabenameu; tagogi weka maiteni amam.”#Psa 41:9

19Tauvotaḡotaḡo ivi nuabola ma tagotagogiava i pa, “Eḡa tau tapa?”

20Iesu i paribelei, “Taumi tagogi weka palawa evivi galoi au aboma tau maiteni. 21Wariaḡa i girugirumia nanare, Rava Natuna ina iraḡe. Wate aiai da Rava Natuna ivi benabenamei; tauna, kovoḡa ḡaeḡaena ina vaia! I ai da alona avena itavi natunei.”

22Maranai i amam ma Iesu palawa i vaia ma ivi egualau, ivo gimagimai ma Tauvotaḡotaḡo i verei ma i riwa, “Ona vaia; wei tupuau.”

23Anina ma wine kelakana i vaia ma ivi egualau ma i verei da anatapui i umei. 24“Wei tau tarau i toi rava maḡamaḡaui au bai ma au parivai-nuaḡana bagibagina ina vovai-virewapani.#Gen 17:2; Gen 17:7-9; Exo 24:8; Jer 31:31-34 25Anina a ririwemi, wine eḡa melanai ana uma melei da maranai wine vouna ana umai God ana au vigulau.”

26Ma taui voepaepa welana i ravi ma i ḡae au Ola Olives.

Peter, Iesu ina boviei

(Mat 26:31-35; Luk 22:31-34; Jhn 13:36-38)

27Iesu, taui i riwei “I girumi nanare,

God i riwa, ‘Tauviḡamoḡamo anavi raḡeni ma sipu inavi lamonei.’ (Zec 13:7)

Ma nanare anatapumi ona ruba tawaneu. 28Wate au vomairi au murina ana aivinao au Galili.”#Mat 28:16

29Peter i riwa, “Mepa da anatapui ina ruba tawanem, wate eḡa tau!”

30Iesu, Peter i riwei, “A ririwana kauem da amadodo waguvarai muriai da kokorereko ina tou mara ruaḡa; tam mara tonuḡa ma bovieu.”

31Wate Peter, ponana i bagibagi ma i riwa, “Avena mepa da tau, tam maiteni ana iraḡe. Eḡa melanai ana boviem!” Ma taui ḡelaui riwana tagogina i latoni.

Iesu au Getsemani i raraupari

(Mat 26:36-46; Luk 22:39-46)

32Ma au Getsemani i ḡeta ma Iesu, ana tauvotaḡotaḡo i riwei, “Weka ona kiala ma ana raupari.” 33Ma Peter, James ma John i taravaini ma nuanuana i iraḡe ma nuanuana i bola-kauei. 34Ma taui i riwei, “Au nuabola i rata kaua au orau da e vunuvunuiu. Weka ona mae ma onavi neneḡana.”

35Ma aburuna i veraunae ma au doa i peu ma i raupari da mepa da tagotagogina, lamna wei marana apoapoena tauna ita netawanei. 36I riwa i pa, “Abba Amau! Aiwai anatapuna tagotagogina tam awarim. Wei kovoḡa kelakana ma vaitawanei. Wate eḡa tau au ḡoana, wate tam am ḡoana.”

37Ma Iesu i nememei ma taui tonuḡa rarau-nuavurui i nelaḡai. Ma Peter i riwei, “Simon!#14:37 Au Mk 3:16 Simon wavana i virai da Peter. tam aiwai matavena? Mara aburuna utavi neneḡana bo eḡa?” 38Ma Iesu, taui i riwei, “Onavi neneḡana ma ona raupari da eḡa au rauelara ona peu! Arua e ḡoeḡoei, wate tupua i ḡokokokara.”

39Ma i nae me ma parina tagogina i raupariei. 40Maranai i nememei ma i nelaḡai, i matamatave; taui, matai i vitai. Ma taui eḡa ita aramanei aiwai ita riwei.

41Mara vitonuina i nenememei ma taui i riwei, “Taumi amapo ona matamatave ma laumi ina tautau? Anina! Mara i ḡetai, ona inanai. Rava Natuna inavi benabenamei ḡoa-apoapoe ravai au urai. 42Onavo mairi; tana nae; ona inana! Tauvibenabenameu e nenei!”

Iesu i pani

(Mat 26:47-56; Luk 22:47-53; Jhn 18:3-12)

43Iesu i bababani ma Judas, tauna Tauvotaḡotaḡo tagogi i ḡetai. Tauna, patara maiteni i nei ana apiai. Pirisi Babadai ma Tarawatu Babadai ma dogadogara, wei ravai i paritawaneiai. 44Muriai da Iesu awarina ita ḡeta; Judas, patara ai mataira i verei, “Orotona anavi gialaḡolaḡonei; nai tauna. Ona pani ma ona naiei ma ona inana kauei!”

45Maranai Judas i ḡeta ma i nae Iesu awarina ma i riwei, “Tauviararamana!” Ma ivi gialaḡolaḡonei. 46Ma taui, Iesu ivo jijini ma i pani. 47Ma tagogi kampa i maimairi, ana sword i taina lavui ma Pirisi ḡeḡetelarana ana taunola taniḡana i borituini. 48Ma Iesu, taui i riwei, “Taumi ana apiami o nei da ota paniu bo, apamina tau am-kwalakwalau? 49Mara patapatai taumi maiteni ta mamae au Tempol ma avi araramana ma eḡa ota paniu. Ma riwa i girugirumia nanare, ina tupua.”#Luk 19:47; 21:37

50Ma Tauvotaḡotaḡo anatapui, Iesu ivo terei ma i rubatawanei.

51Ma laraga tagogi, gara maiana ḡaeḡaena ivi karekoei ma Iesu ivo taḡotaḡoi. Taui i ḡoei da itavo jijini, 52wate taui ana kareko ivo jijini ma ana kovakovana i ruba.

Taui, Iesu i etarei.

(Mat 26:57-68; Luk 22:54-55, 63-71; Jhn 18:13-14, 19-24)

53Ma taui, Iesu i naiei Pirisi Ḡeḡetelarana, Pirisi Babadai, dogadogara ma Tarawatu Babadai mepa ivi tagogieiana. 54Ma Peter ivo taḡotaḡo da Pirisi ḡeḡetelarana ana numa. Ma ana au debadeba, tauvi pai pai maiteni i kiala ma au ai ivivi airara. 55Pirisi Babadai ma mai Jew ai boru ḡeḡetelarana,#14:55 mai Jew e ḡoreḡorei Sanhedrin. Iesu ana apoapoe i baiei da itavi raḡeni; ma i baiana avei. 56Matamata maḡamaḡaui, Iesu ivi wavu morumoruei, wate ai viwavu taputapunei ava.

57Ma ḡelaui ivo mairi ma wei wavuna morumoruna i kauei Iesu awarina. 58“Tauai a nonori tauna i riwa, ‘Wei Tempolna rava i voavoaia. Tau ana rikai ma au pom tonuḡa au murina, Tempol ḡelauna ana voai ma lamna eḡa rava ita voai.#Jhn 2:19 ’” 59Wate nanare ai viwavu taputapunei ava.

60Pirisi ḡeḡetelarana i mairi taui au naoi ma Iesu ivi taravirevirei, “Wei ravai evivi wavuim ma eḡa aiwai ma paribelei bo?”

61Ma Iesu i genuana ma eḡa ita paribelei.#14:61 Isaiah i parivereta da Kerisoana au iraḡe eḡa ina gagaloana melei. (Isa 53.7). Ma Pirisi ḡeḡetelarana ivi taraviravirana melei, “Tam Keriso bo? Viviaiainana Natuna bo?”

62Iesu i paribelana, “Tau tauna! Ma ‘Rava Natuna ona inanai, Vivirewapanana au oiena ina kiala’ ma ‘mara ladanei ina nei.’#Dan 7:13

63Pirisi ḡeḡetelarana, amlona i ḡaiḡai ma ana gara i sikai ma i riwa, “Aiwai au baina matamata ḡelaui tana ḡoei? 64Taumi, vijiboḡa#Lev 24:16 o nonori ma ami nota aiwai?”

Taui anatapui i riwa, “Tauna ana ḡoa-apoapoe au baina anina da ina iraḡe!”

65Ma ḡelaui i rau-karei ma Iesu i ovai ma naona i purui; i rau-navanavai ma i riwei, “Ma pariverelai, aiai i ravim!” Ma tauvi pai pai, Iesu i vaia ma i vunui.

Peter Iesu i boviei

(Mat 26:69-75; Luk 22:56-62; Jhn 18:15-18, 25-27)

66Ma Peter au gabaura i mamae ma Pirisi ḡeḡetelarana ana taunola guguini i ḡetai. 67Maranai tauna, Peter i inanai ivivi airara; ma i inanatunutunui ma i riwa, “Tam maiteni Iesu Nasaretei, ana tauvotaḡotaḡo.”

68Wate tauna i bovi ma i riwa, “Eḡa ata aramanei aiwai e bababaniei, avi nuanainei!” Ma i tuopu au metaeta ma [kokorereko i tou#14:68Wei riwana buka au wadubo nonoana eḡa ita mamae.].

69Taunola guguini, Peter i inanai ma i rau-karena melei ma rava au ḡereḡere i maimairi i riwei, “Wei ravana, taui tagogi!” 70Wate Peter i bovi me.

Mara aburuna muriai, taui au ḡereḡere i maimairi, Peter i riwana melei, “Tam anina, taui tagogi; au baina tam, Galiliei!” 71Ma Peter i riwa, “God au matana, tau a ririwa kaua, ravana o ririweia avivi nuanainei!”

72Maratagogi kokorereko i tou mara viruaina ma Peter, Iesu riwana i notai, “Muriai da kokorereko ina tou mara ruaḡa, tam mara tonuḡa ma bovieu.” Ma Peter ivi nuabola kaua ma i tou.

Obecnie wybrane:

Mark 14: WEDW

Podkreślenie

Udostępnij

Kopiuj