Mako 9

1Yesu epitilizya kulaŵila kuti, “Nukuwuzyani vyendi kuti, alipo ayakine pano afwelini mpaka akawone Ufumu wa Mulungu wawela na mphamvu yake.”

Yesu oyaluka mu mawonekelo ŵake

(Mt 17:1-13; Lk 9:28-36)

2Pa vuli pa masiku asanu na imo, Yesu etola Petulo, Yakobe na Yohane nokwela nawo pa lupili itali kwa ŵeka. Akali kwamene uko mawonekelo ŵa Yesu eyaluka, ŵeve ololesha. 3Vovwala vake veyaluka vongʼanimila notuŵa kuti mbee, kupula munthu aliyense mwangatuŵishile nyula pano pansi. 4Pamene apo asambili ŵake ŵala ewona Eliya na Mose olaŵila na Yesu.

5Petulo ewuzya Yesu kuti, “Labi#9:5 Labi Kutanthauza kuti Asambizyi , ni ciweme kuti sewo tili pano. Timange misasa itatu uyakine wanu uyakine wa Mose uyakine wa Eliya.” 6Elaŵila tetyo cikomo cakuti ecita wowa ukulu ngako.

7Pamene apo pefwika mkumbi, noŵavwinikila, mwimvwika lizu yolaŵila kuti, “Uyu ni Mwana wangu wotemweka, muwomumvwila.” 8Mosaziŵa luweme, pecilolesha pa malo ŵala efwana kuti penzeve munthu aliyense, koma Yesu enze naye.

9Penzoseluka kufuma pa lupili, Yesu eŵalamulila kuti osati auzyeko munthu aliyense veciwona, mpaka Mwana wa Munthu akawuke kwa akufwa. 10Ici ecisunga ngani cisinsi kwa ŵeve ŵeka, etatika kulaŵila va tanthauzo ya “kuwuka kwa akufwa.”

11Asambili ŵake emukonsha Yesu kuti, “Nga asambizyi olaŵililanji kuti Eliya owamila kutangulila kuza?”

12Yesu eyasuka kuti, “Ni cendi, Eliya opangwika kuŵa otatika kuwela, kuzowamya vinthu vonse. Ni cikomo ni cinji kwelembewa kuti Mwana wa Munthu akasawushiwe ngako nokaniwa? 13Koma newo nukuwuzyani kuti, Eliya ewela kale, nipo ŵeve ecita naye vilivonse venzopangwa, ngani Malembo olaŵila va yeve.”

Kupozyewa kwa mulumbwana wokatiwa na ciŵanda

(Mt 17:14-20; Lk 9:37-43)

14Yesu na asambili atatu ŵala peciwelela kwa asambili ŵala ayakine, efwana winji wa ŵanthu uluŵazunguluke. Asambizyi ŵa Matetulo nsita iyi enzosushana na asambili ŵala. 15Peciwona Yesu ŵala, ŵanthu enze etemwa ngako, emuwutukila kuti amupe moni.

16Yesu eŵakonsha kuti, “Musushana nawo va vinji?”

17Munthu muyakine pa winji wala eyasuka kuti, “Asambizyi, naleta mwana wangu kuti mumupozye. Uyu ekatiwa na ciŵanda, cimulonda lizu. 18Ici ciŵanda cikamukata, cumuwishila pansi notatika kufuma povu ku kamwa nokukuta menu na kuti muŵili wake uyuma gwa! Nenze nasenga asambili ŵanu kuti afumye ciŵanda koma akangiwa.”

19Yesu elaŵila kuti, “Nimwe luko iliye cicetekelo! Niŵe namwe kufwika nsita yotyani? Mukalungame nsita yanji, na kuti nipilile mpaka lini? Muleteni kuno mwana uyo.”

20Mulumbwana wala emuleta kwa Yesu. Ciŵanda cala pecewona Yesu cemupoza pansi wala mwana nipo etatika kunyukuma, nomvumvulika uku povu yufuma ku kamwa.

21Yesu ekonsha awisi kuti, “Kansi ivi vetatika lini?”

Awisi elaŵila kuti, “Kutatika akali mtontho. 22Ciŵanda ici nsita zinyinji cankala cumuwisha, payakine pa manzi, payakine pa mulilo kupangwa kumupaya. Koma mwewo keno mungatweshe, mungacitepo ciliconse. Tapapata mucite nase lusungu, tiyavyeni.”

23Yesu elaŵila kuti, “‘Mulaŵililanji kuti, Mungatweshe!’ Mukaikilanji? Vinthu vonse votwesheka kwa ali naco cicetekelo.”

24Awisi ŵa wala mwana elaŵila moŵilikizya kuti, “Nili naco cicetekelo koma ni patontho. Niyavyeni kuti niŵe naco cicetekelo cikulu.”

25Yesu peciwona kuti winji wa ŵanthu watatika kupapatizyana, ecimula ciŵanda cala kuti, “Wewo ciŵanda colesha kulaŵila na kumvwa, nukupingula kuti ufume mwa uyu mwana, osati ukaloŵemo soti mwa yeve.”

26Ciŵanda cala ceŵilikizya nomuzungulusha mwa mphamvu mwana wala, pa vuli pake nofuma. Mwana wala mweciwila celele, ewoneka nga wafwa, ayakine mwa ŵala ŵanthu enzolaŵila kuti wasilizyika. 27Koma Yesu emukata pa kwanja nomuwusha, mwana wala epanama.

28Yesu peciloŵa mu ngʼanda, asambili ŵake emukonsha penze pa ŵeka kuti, “Nga sewo takangiwa tyani kufumya ciŵanda ici?”

29Yesu eyasuka kuti, “Ciŵanda ca mtundu woteti, cipangwika mwalomba, niye pocifumya.”

Yesu olaŵila soti va imfwa na kuwuka kwake

(Mt 17:22-23; Lk 9:43-45)

30Pecifuma ku malo aŵa, Yesu na asambili ŵake epitila mu calo ca Galileya. Koma yeve aliyopangwe kuti ŵanthu aziŵe, 31cikomo cakuti pa nsita iyi, enzosambizya asambili ŵake. Enzoŵawuzya kuti, “Mwana wa Munthu akatwaliwe mu manja mwa ŵanthu, nipo ŵeve akamupaye. Pa vuli pake yeve akawuke pakayopita masiku atatu.” 32Asambili ŵake aliyomvwishishe vecilaŵila Yesu, koma enzocita wowa kuti amukonshe.

Mkulu ni ŵani

(Mt 18:1-5; Lk 9:46-48)

33Yesu na asambili ŵake efwika ku Kapilinamu. Peciloŵa mu ngʼanda, yeve eŵakonsha kuti, “Kansi pa mseu pala mwenzosushananji?” 34Asambili ŵala enze celele, cikomo cakuti venzosushana venze vakuti mkulu ni ŵani pakati pawo.

35Yesu enkhala pansi noŵayita asambili ŵake ŵala kumi na aŵili, noŵawuzya kuti, “Keno kwa opangwa kuŵa mkulu, opangwika kuti alicefye, notumikila wonse.”

36Pecilaŵila tetyo etola mwana, nomunkhazika penze ŵeve nomufukatila, noŵawuzya kuti, 37“Munthu opokelela luweme mwana ngani uyu cikomo ca newo, niye kuti wopokelela luweme newo wamene. Uyo opokelela newo luweme, niyelini kuti wapokela newo koma Atata enituma.”

Osasushana na sewo tili naye pamo

(Lk 9:49-50)

38Yohane ewuzya Yesu kuti, “Asambizyi, tawona munthu muyakine ofumya viŵanda mu zina yanu, koma sewo tamulesha cikomo cakuti oyendalini na sewo.”

39Koma Yesu elaŵila kuti, “Osamulesha yayi, cikomo cakuti munthu angacitelini kuti wacita cokanganisha mu zina yangu, nsita yamene iyo nonitafulila. 40Cikomo cakuti munthu uyu osushanalini nase koma okatizyana nase. 41Nukuwuzyani vyendi kuti, munthu wamene okupani ceso ca manzi cikomo cakuti nimwe ŵake ŵa Kristu, wamene uyo akakangiwelini kupokela cilambu yake.”

Votayishana cicetekelo

(Mt 18:6-9; Lk 17:1-2)

42“Aliyense olengesha ŵana atontho ngani aŵa kutaya cicetekelo mwa newo, ni ciweme munthu uyu kumangiwa mphelo mu mukosi notayiwa mu cimmana. 43Keno kwanja yako yukutayisha cicetekelo, uyitende. Ni ciweme kuyoloŵa ku moyo wosasila na kwanja kumo kupula kuti ukaloŵe ku Gehena yosasila, uli na manja aŵili. [44Kwamene uku vikusi voŵatamanisha vukufwalini, nawo mulilo woŵashoka uzimalini.] 45Keno kwendo yako yukutayisha cicetekelo, uyitende. Ni ciweme kuyoloŵa ku moyo wosasila na kwendo kumo kupula kuti ukaloŵe ku Gehena yosasila, uli na mendo aŵili. [46Kwamene uku vikusi voŵatamanisha vukufwalini, nawo mulilo woŵashoka uzimalini.] 47Keno linso yako yukutayisha cicetekelo, uikoloŵole. Ni ciweme kuyoloŵa mu Ufumu wa Mulungu na linso imo, kupula kuti ukaloŵe ku Gehena yosasila, uli na menso aŵili. 48 Kwamene uku

vikusi voŵatamanisha vukufwalini,

nawo mulilo woŵashoka uzimalini.

49Wonse akatuŵishiwe na mulilo ngani nsembe yutuŵishiwa na munyu.

50“Munyu ni uweme, koma keno munyu wala wasila mphamvu na uweme wake, ungaziwezyelemo tyani? Moyo wanu ukonkhala ngani munyu, nonkhala soti na mtendele na aliyense.”

Obecnie wybrane:

Mako 9: GMN

Podkreślenie

Udostępnij

Kopiuj