Mako 11
11
Yesu oloŵa na mcinzi mu Yelusalemu
(Mt 21:1-11; Lk 19:28-40; Yh 12:12-19)
1Yesu na asambili ŵake penze kufupi na ku Yelusalemu, kufupi na Betifage na Betaniya, ku Lupili ya Olivi. Yesu etuma aŵili mwa asambili ŵala, 2noŵawuzya kuti, “Nkhoyani mu munzi wamuwona uyo. Mukayoloŵamo mukafwane mwana wa bulu womangiwa, akaliyokwelapo munthu kutatikila kale. Mukamumangulule, nakuza naye kuno. 3Aliyense akakukonshani kuti, ‘Mwewo! Mucitilanji tetyo?’ Mwewo mukalaŵile kuti, ‘Asikulu ali naye na nchito, nipo akasilizyana naye amuwezye posataya nsita.’”
4Asambili wala eluta, nopeza mwana wa bulu wala, womangilila pa mulyango mu mbali mwa mseu, nipo ŵeve emumangulula. 5Ŵanthu enzepo eŵakonsha kuti, “Mwewo! Mucitilanji tetyo, kansi bulu mumumangululilanji?” 6Asambili eyasuka ngani mweciŵawuzyila Yesu. Ŵanthu wala eŵalola kuti amumangulule. 7Pecimutwala kwa Yesu mwana wa bulu wala, eyanzikapo vovwala pa mu msana pa bulu wala nipo Yesu enkhalapo. 8Ŵanthu anyinji enzoyanzika vovwala vawo mu njila, ayakine misambo na vitepo vake venzothyola ku sanga. 9 Ŵanthu enze pa nthangu na enze ku vuli enzoŵilikizya kuti,
“Mcinzi kwa Mulungu!#11:9 Mcinzi kwa Mulungu Pa Cigiliki Malizu aŵa ni “Hosana” kutanthauza kuti “tipulumusheni””
“Ni woshukishiwa akuza mu zina ya Leza!”
10“Ushukishiwe Ufumu wa awusu wasu Davide wamene utiuwele lomba!”
“Mcinzi kwa Mulungu Kululu!”
11Yesu peciloŵa mu Yelusalemu, eciyoloŵa mu Ngʼanda ya Mulungu, nololesha ici na ici mu malo wonse. Zuŵa peyeloŵa ku mcingulo Yesu eyima kuluta ku Betaniya pamo na asambili ŵake kumi na aŵili ŵala.
Yesu oshamika mkuyu
(Mt 21:18-19)
12Mmawa mwake, penzofumila ku Betaniya, Yesu ecimvwa njala. 13Peciwona mkuyu patali poteti, cili na vitepo vake, elutapo kuti keno angafwanemo vitwalo, koma aliyofwanemo kanthu cikomo cakuti yenzelini nsita yotwala vitwalo ivi. 14Yesu ewuzya cimuti cala kuti, “We cimuti! Kutatikila lelo mpaka mutatakuya paliye ŵatiakalyeko vitwalo vako.” Asambili ŵake eŵamvwa malizu aŵa.
Yesu ofumya ŵanthu ositishila mu Ngʼanda ya Mulungu
(Mt 21:12-17; Lk 19:45-48)
15Yesu na asambili ŵake efwika ku Yelusalemu, nipo Yesu eloŵa mu Ngʼanda ya Mulungu, etatika kufumya ŵanthu enzocitila malonda mkati. Egudubula posinthishila ndalama, na mipando ya ositisha nkhunda. 16Aliyozomelezye munthu aliyense kupita pa malo aŵa alutwike cinthu. 17 Pa vuli pake etatika kuŵasambizya noŵawuzya kuti, “Pala Malembo olaŵila kuti, ‘Ngʼanda yangu ikayitiwe Ngʼanda ya malombelo ya ŵanthu ŵa mitundu yonse.’ Koma mwewo mwayiyaluzya kuŵa ‘malo ŵa anyankapondo.’”
18Akulu ŵa Ansembe na Asambizyi ŵa Matetulo pecimvwa ivi, esakila njila yakuti amupayilemo. Koma enzocita naye wowa powona kuti ŵanthu wonse enzokanganishiwa navo venzoŵasambizya.
19Pekwetatika kufipa, Yesu na asambili ŵake efumamo mu mzinda mwala.
Sambilo ya nkhuyu woshamikiwa
(Mt 21:20-22)
20Mmawa mwake nsiku yokonkhapo, penzoyenda mu mseu, ewona nkhuyu yala yayumilatu yonse na mizyu kumo. 21Petulo ekumbuka zecitika, nipo ewuzya Yesu kuti, “Asambizyi, onani! Nkhuyu yala yemweshamika kuti yayuma.”
22Yesu eyasuka kuti, “Mukokuŵa na cicetekelo mwa Mulungu. 23Nukuwuzyani vyendi kuti aliyense angalamule lupili iyi kuti, ‘Fuma apa, nkhoya uzitaye mu cimmana,’ akalaŵila na mtima wosakayika, na cicetekelo, vikocitika cendi. 24Nukuwuzyani kuti, mu malombelo ŵanu ciliconse camungasenge, mukocetekela kuti mukopokela, nipo cikaŵe canu. 25Nipo pamusenga, cotatika nikulekelelako muyanu ku viyipa keno emuyifyilani. Mukatetyo, nawo Atata ali Kululu amulekeleleni ku macimo ŵanu. [26Koma mwewo keno mulekelelakolini ayanu, ku macimo ŵawo namwe Atata ali Kululu amulekelelenilini macimo ŵanu.]”
Yesu okonshewa va ulamulilo wake
(Mt 21:23-27; Lk 20:1-8)
27Yesu efwika soti ku Yelusalemu nipo penzoziyendela mu Ngʼanda ya Mulungu, Akulu ŵa Ansembe na Asambizyi ŵa Matetulo pamo na Akulu ŵa Ayuda emukonsha kuti, 28“Kansi ulamulilo wamucitila ivi muwufumya kuni? Keno ni ŵani ekupani ulamulilo pa ivi?”
29Yesu eyasuka kuti, “Nane soti nikukonsheni konsho imo. Mukaniyasuka, niye patinikuwuzyeni kwenetola ulamulilo wanucitila voteti. 30Kansi Yohane penzobatiza, ulamulilo wala ewutola kwa ŵani, kwa Mulungu keno ku ŵanthu? Niyasukeni.”
31Ŵeve etatika kulaŵizyana kuti, “Tikati ewutola kwa Mulungu, yeve alaŵile kuti, ‘Ni cikomo canji, muliyomucetekele Yohane?’ 32Koma soti tikati ezitola ku ŵanthu, apo soti ni mwamenelini.” Elaŵila tetyo pocita wowa na ŵanthu, cikomo cakuti ŵanthu wonse enze kuti Yohane enze mneneli ngaye–ngaye.
33Niye eyingomuyasuka Yesu kuti, “Kaya nase tuziŵalini.”
Yesu elaŵila kuti, “Nane soti nikuwuzyenilini kwenetola ulamulilo wanucitila voteti.”
Obecnie wybrane:
Mako 11: GMN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Nsenga New Testament © The Bible Society of Zambia, 2015.
