Mat 14

Imfwa ya Yohane Mbatizi

(Mk 6:14-29; Lk 9:7-9)

1Pa nsita iyo, Mfumu Helode ecimvwa va Yesu, 2nipo ewuzya anyanchito ŵake kuti, “Uyu ni Yohane Mbatizi. Wawukishiwa kwa akufwa, ni cikomo cake ali na mphamvu zokanganisha.” 3Pala Helode ekata Yohane nomumangilila nomuyika mu jele.

Helode ecita tetyo cikomo ca Helodiyasi mwanakazi wa mkwawo Filipo. 4Yohane Mbatizi enzomuwuzya Helode kuti, “Ni ciwemelini kulungula mwanakazi wa mkwanu.” 5Koma cukanga Helode enzopangwa kumupaya, enzoyopa ŵanthu, pakuti enzomutola kuti ni mneneli.

6Koma pa malyelelo okumbukila nsiku yovyalika kwa Helode, mwana wa Helodiyasi evina pa ŵanthu wonse, nipo etemwesha Helode. 7Tetyo Helode emulayizya na vilumbilo kuti amupe ciliconse catiasenge. 8Anyina pecimuwuzya catiasenge, yeve elaŵila kuti, “Munipe mutu wa Yohane Mbatizi pa mbale pamene pano.” 9Mfumu yecita citinthi, koma cikomo ca vilumbilo na woyitiwa elamulila kuti amupe. 10Etuma ŵanthu kuti Yohane atendewe mutu mu jele. 11Mutu wake weikiwa pa mbale noletewa ku msimbi, nipo ewutwala kwa anyina. 12Asambili ŵake ŵa Yohane ewela notola citanda noyika mu manda, noluta kuyowuzya Yesu.

Yesu olyesha ŵanthu myanda isanu (5,000)

(Mk 6:30-44; Lk 9:10-17; Yh 6:1-14)

13Yesu pecimvwa ivi, efumako kwala na wato nakuya kwa yeka kusapita–pita ŵanthu. Koma winji pewicimvwa, wimukonkha na mendo kufuma mu minzi. 14Yesu pecitawuka ewona winji wa ŵanthu, nipo eŵacitila citinthi, nopozya ŵanthu ŵawo wolwala.

15Lomba pekwifipa, asambili ewela kwake nomuwuzya kuti, “Kuno ni ku sanga, nipo kwafipa. Ŵawuzyeni ŵanthu alute mu minzi asiteko vakulya vawo.”

16Koma Yesu eŵawuzya kuti, “Opangwikalini kuya. Ŵamene mwewo ŵapeni vakulya.”

17Asambili eyasuka kuti, “Pano tili na mikate isanu na masaŵi aŵili.”

18Yesu eŵawuzya soti kuti, “Vileteni kuno.” 19Nipo ewuzya winji wala kuti unkhale pansi pa uzu. Tetyo, etola mikate isanu na masaŵi aŵili, nololesha Kululu notembezya Mulungu. Tetyo, esuna–suna mkate nakupa asambili, nipo asambili eyaŵila ŵanthu.

20Aliyense ecilya nipo ekuta. Asambili etola vitundu kumi na viŵili va vakulya vesalapo. 21Ecilya enze pafupi–fupi myanda isanu analume kufumyako anakazi na ŵana.

Yesu oyenda pa manzi

(Mk 6:45-52; Yh 6:15-21)

22Mcingulo mwamene umo, Yesu elamulila asambili kuti aloŵe mu wato, atangule alute ku silya iyakine ya cimmana, nipo enzowuzya ŵanthu kuti aŵekuya kwawo. 23Pecilayilana nawo ŵala ŵanthu, eluta ku lupili kuyolomba kwa yeka. Pekwetatika kufipa, Yesu enze kwamene kwala yeka. 24Pa nsita iyi, wato wenze ukali patali na ku silya, nipo wenzokankhiwa na matambazi pakuti wenzokuya kwewenzofumila mphepo.

25Mu matemwakuca Yesu enzokuza kwa ŵeve, oyenda pa manzi. 26Asambili wake pecimuwona kuti oyenda pa manzi eyopa, nolaŵila kuti, “Ni cimuwuka!” nipo elila na wowa.

27Pamene apo Yesu eŵawuzya kuti, “Tangʼani mitima, ni newo. Osacita wowa.”

28Petulo elaŵila kuti, “Asikulu, keno ni mwewo, niloleni niwele kwa mwewo pa manzi.”

29Yesu eyasuka kuti, “Wela.”

Tetyo, Petulo efuma mu wato notatika kuyenda pa manzi nakuya kwenze Yesu. 30Koma peciwona cimphepo, eyopa notatika kumbila, pamene apo elila kuti, “Asikulu! Nipulumusheni!”

31Yesu etambulula kwanja kwake nomukata nomuwuzya kuti, “Wewo wa cicetekelo citontho, wakayikilanji?”

32Peciloŵa mu wato, cimphepo cesila. 33Ŵala enze mu wato emulambila, nolaŵila kuti, “Ni cendi, niwe Mwana wa Mulungu.”

Yesu opozya olwala ku Genesaleti

(Mk 6:53-56)

34Pecitawuka, efwika ku malo oyitiwa kuti Genesaleti. 35Ŵanthu ŵa kwala emuzindikila, notuma malizu vitwa vonse va kwala. Emuletela ŵanthu enzolwala 36nomusenga kuti akateko tyala msono wa covwala cake. Wonse enzoukata enzopola.

Obecnie wybrane:

Mat 14: GMN

Podkreślenie

Udostępnij

Kopiuj