Luké 20

Ko e Fehu‘i he Mafai ‘o Sīsuú

(Māt 21.23-27; Ma‘ake 11.27-33)

1PEA ko e ‘aho ‘e taha ‘o e ngaahi ‘aho ko ia, lolotonga ‘ene faiako ki he kakai mo malanga‘aki ‘a e Kōsipeli ‘i he Temipale, na‘e tutu‘u mai ‘a e kau taula‘eiki mo e kau sikalaipe, fakataha mo e kau mātu‘a ‘o nau pehē kiate ia, 2Tala mai pe ko e hā ho tu‘unga ‘oku ke fai ai ‘a e ngaahi me‘a ko ‘eni? pea ko hai ia na‘a ne tuku kiate koe ‘a e tu‘unga ko ia?

3Pea tali ‘e ia, ‘o ne pehē kiate kinautolu, Ka u fai atu mo au ha‘aku fehu‘i, pea mou tali: 4ko e fai papitaiso ‘a Sione, na‘e mei he langi ia, pe mei he tangata?

5Pea nau fealēlea‘aki ai ‘iate kinautolu, ‘o pehē, Kapau te tau tali, Mei langi; te ne pehē, Pea ko e hā ai na‘e ‘ikai te mou tuitala kiate ia? 6Pea kapau te tau pehē, Mei he tangata; ‘e tolongi kitautolu ‘e he kakai Siu kotoa: he ‘oku nau mātu‘aki tui ko Sione ko e palōfita. 7Pea na‘a nau tali, ‘oku ‘ikai te mau ‘ilo pe na‘e mei fē ia.

8Pea pehē ‘e Sīsū kiate kinautolu, pea ‘e ‘ikai ā te u tala atu ‘e au, pe ko e hā hoku tu‘unga ‘oku ou fai ai ‘a e ngaahi me‘a ko ‘eni.

Ko e kau Lisi Ngoue‘anga

(Māt 21.33-46; Ma‘ake 12.1-12)

9Pea ne hanga ‘o lea ki he kakai Siu ‘i he fakatātā ko eni: Tokua ko e tangata na‘a ne tō ha ngoue vaine, pea na‘a ne tuku ke lisi ia ‘e ha kau fa‘a, pea ne ‘alu ki muli, ‘o ne fuoloa ai.#‘Ais 5.1 10Pea ‘i he to‘ukai, na‘a ne fekau ha tamaio‘eiki ki he kau fa‘a, koe‘uhi ke nau tuku kiate ia hono ‘inasi he fua ‘o e ngoue: ka ko e kau fa‘a na‘a nau haha ia, mo fakafoki mola. 11Pea ne fai atu, ‘o fekau mo ha tamaio‘eiki kehe: pea nau haha mo pā‘usi‘i mo fakafoki mola mo e toko taha ko ia. 12Pea ne fai atu, ‘o fekau mai mo hano toko tolu: pea nau taa‘i mo ia, ‘o lī kitua‘ā kuo makafokafo. 13Pea pehē ‘e he ‘eiki ‘o e ngoue vaine, Ko e hā ‘aku ai ‘e fai? ‘ē, ka u fekau atu hoku foha ko e pele: te nau toka‘i nai ia. 14Ka ‘i he vakai ‘a e kau fa‘a kiate ia, na‘a nau fepehē‘aki, Ko e hoko ‘ena; tau tāmate‘i mu‘a ia, kae ‘otautolu ‘a e tofi‘a. 15Pea nau toho ia ki he tua‘ā ngoue, ‘o tāmate‘i, pea ko e hā ai ‘e fai kiate kinautolu ‘e he ‘eiki ‘o e ngoue vaine?

16Te ne hoko mai ‘o faka‘auha ‘a e kau fa‘a ko ia, pea ‘ange ‘a e ngoue vaine ki ha ni‘ihi kehe.

Pea ‘i he‘enau fanongo ki ai, na‘a nau pehē, ‘oua ā foki!

17Pea ne siofia kinautolu, ‘o ne pehē, Ka ko e hā ai ‘eni kuo tohi,#Saame 118.22 Ko e maka ne fakatale‘i ‘e he kau tufunga, Kuo hoko ‘o tuliki tau‘olunga? 18‘Ilonga ha taha te ne tō ki he maka ko ia ‘e mafesifesi; ka ‘ilonga ‘a ia ‘e tō ‘a e maka ki ai, ‘e laiki ke efu.

19Pea ko e kau sikalaipe mo e hou‘eiki taula‘eiki na‘a nau feinga ke ala kiate ia leva ‘i he taimi ko ia; ka na‘a nau manavahē ki he kakai: he na‘a nau ‘ilo kuo ne lea‘aki ‘a e fakatātā ko ia ke tau kiate kinautolu.

Ko e Totongi Tukuhaú

(Māt 22.15-22; Ma‘ake 12.13-17)

20Pea nau lamalama ha faingamālie, ‘o nau fekau ange ha ni‘ihi kuo fale‘i ke nau fakamā‘oni‘oni loi‘i kinautolu, koe‘uhi ke nau mo‘ua ia ‘i ha alea, ka nau tuku ia ki he pule‘anga, pea ke tu‘unganaki ‘aki ‘e he Kōvana. 21Pea nau fakafehu‘i kiate ia, ‘o pehē, Tangata‘eiki, ‘oku mau ‘ilo ‘oku totonu ha‘au lea mo e ako, pea ‘oku ‘ikai te ke filifilimānako; ka ‘oku ke ako totonu ‘aki ‘a e hala ‘o e ‘Otua: 22pe ‘oku ngofua ke mau tukuhau kia Sisa, pe ‘ikai?

23Ka ka vavanga ‘e ia ki he‘enau olo, ‘o ne pehē kiate kinautolu. 24Fakahā mai ha fo‘i pa‘anga. Ko e fofonga mo e hingoa ‘o hai ‘oku ‘i ai?

Pea nau tali, ‘o pehē, ‘o Sisa.

25Pea pehē ‘e ia kiate kinautolu, ‘āua; pe‘i ‘ange kia Sisa ‘a e ngaahi me‘a ‘a Sisa, pea ki he ‘Otua ‘a e ngaahi me‘a ‘a e ‘Otua.

26Pea na‘e ‘ikai te nau lava ke puke ki he‘ene lea ‘i he ‘ao ‘o e kakai: pea nau ofo ‘i he‘ene tali, ‘o nau longo pē.

Ko e Fehu‘i he Toetu‘u mei he Maté

(Māt 22.23-33; Ma‘ake 12.18-27)

27Pea ‘unu‘unu mai ha ni‘ihi ‘o e kau Sātusi, ‘a kinautolu ‘oku faka‘ikai‘i ‘a e toetu‘u; pea na‘a nau fehu‘i kiate ia, ‘o pehē,#Ngā 23.8 28Tangata‘eiki, na‘e tohi mai ‘e Mōsese, Kapau ‘e pekia ha taha ‘i ha tautehina, ‘a ia na‘e fakafinemotu‘a, ka ‘oku ‘ikai ha‘ane fānau, pea ke ma‘u ‘e hono tokoua ‘a e finemotu‘a, ‘o fakatupu ai ha hako ki hono tokoua.#Teu 25.5 29Pea na‘e ai ha tu‘unga me‘a ‘e toko fitu ko e tautehina: pea na‘e ma‘u uaifi ‘a e ‘uluaki, pea na‘e pekia ta‘ehako. 30Ko hono ua foki, mo hono toko tolu na‘a na ma‘u ia: 31pea pehē mo e toko fitu kātoa; na‘e ‘ikai hanau hako, pea nau pekia. 32Pea pekia ki mui mo e fefine. 33Pea ‘i he toetu‘u ‘e hoko ‘a e fefine ko ia ko e uaifi nai ‘o hai ‘iate kinautolu? he ko e toko fitu kātoa na‘a nau ma‘u ia ko honau uaifi.

34Pea pehē ‘e Sīsū kiate kinautolu, Ko e fānau ‘a e maama ko ‘eni ‘oku nau ma‘u uaifi, mo ma‘u husepāniti: 35ka ko kinautolu ‘oku nau lava hono tau ke ma‘u ‘a e maama ko ‘ena, mo e toetu‘u mei he pekia, ‘e ‘ikai te nau ma‘u uaifi, pe ma‘u husepāniti. 36He ‘oku ‘ikai foki te nau kei lava ke pekia, he ‘oku nau ‘ulungātatau mo e kau ‘āngelo; pea ko e fānau kinautolu ‘a e ‘Otua, he ko e fānau ‘a e Toetu‘u. 37Ka ko e me‘a ki he toe fokotu‘u ‘o e pekia, na‘a mo Mōsese ‘oku ne fakahā ia ‘i he vahe ‘oku kau ki he Talatala‘āmoa, he‘ene lau ‘a e ‘Eiki ko e ‘Otua ‘o ‘Epalahame, mo e ‘Otua ‘o ‘Aisake, mo e ‘Otua ‘o Sēkope.#‘Eki 3.6 38Ka ‘oku ‘ikai ko e ‘Otua ia ‘o e mate ka ‘o e mo‘ui: koe‘uhi ‘i he‘ene ‘afio ‘a‘ana ‘oku nau mā‘u‘ui kotoa pē.

39Pea tali ‘e he ni‘ihi ‘o e kau sikalaipe, ‘o nau pehē, Tangata‘eiki, kuo mālō ho‘o lea. 40He na‘e ‘ikai te nau toe fakato‘oto‘a ke fai kiate ia ha momo‘i fehu‘i ‘e taha.

Ko e Foha ‘o Tēvita

(Māt 22.41-46; Ma‘ake 12.35-37)

41Ka ka lea ‘e ia kiate kinautolu, ‘oku fēfē ‘enau lau ko e Mīsaia ko e Hako ‘o Tēvita ia? 42Ka ‘oku lau ‘e Tēvita ‘e ia ‘i he Tohi Saame:#Saame 110.1

43Ne folofola ‘e he ‘eiki ki hoku ‘Eiki,

Nofo koe ‘i hoku to‘omata‘u,

Kae‘oua ke u ngaohi ho ngaahi fili ko ho tu‘ungava‘e.

44Tā ‘oku ui ia ‘e Tēvita ko hono ‘Eiki, pea ko hono hako fēfē ai?

Ko Sīsū mo e Kau Faiako Lao ‘a Mōsesé

(Māt 23.1-36; Ma‘ake 12.38-40; Luk 11.37-54)

45Pea ‘i he kei tokanga ‘a e kakai kotoa na‘a ne pehē kiate kinautolu. 46Mou lamalama ‘a e kau sikalaipe, ‘a ia ko honau manako ke ‘eve‘eva mo e kofu faka‘ilonga, pea nau havala ki he faka‘apa‘apa‘ia ‘i he mala‘e fakatau, mo e nofo ki mu‘a‘i he falelotu, mo e tokoto ki mu‘a ‘i ha kātoanga. 47Ko e fa‘ahinga ‘oku nau folo kotoa ‘a e ngaahi ‘api ‘o si‘i kau uitou, mo nau mounu ‘aki ‘enau lotu lōloa: ‘e ma‘u ‘e he kau siana ko ia ha tautea ‘oku kehe ange.

Obecnie wybrane:

Luké 20: TMB

Podkreślenie

Udostępnij

Kopiuj