Sioné Ko e Talateu
Ko e Talateu
‘Oku fakafōtunga‘i mai ‘a Sīsū ‘i he Kōsipeli ‘a Sioné ko e Folofola ta‘engata ia ‘a e ‘Otuá, ‘a ia na‘á ne “hoko ko e kakano, ‘o ne fokotu‘u hono tāpanekalé ‘i hotau lotolotongá” (1.14). Hangē pē ko e lau ‘a e tohí ni, “Kuo tohi ‘eni, koe‘uhí ke mou tui ko e Kalaisí ‘a Sīsū, ko e ‘Alo ‘o e ‘Otuá; pea ke mou ma‘u ‘i ho‘omou tuí ‘a e mo‘ui ‘i hono huafá” (Vahe 20.31).
‘Oku ‘i ai hono talateu ‘o Sione ‘oku fakamahino‘i ai ko Sīsuú ko e Folofola ta‘engata ia ‘a e ‘Otuá, pea ‘oku hoko atu ai ki he konga ‘uluaki ‘o e Kōsipelí, ‘a ia ‘oku fakamatala‘i mai ai ‘a e ngaahi mana ‘oku fakamo‘oni kia Sīsū ko e Fakamo‘uí ia, ko e ‘Alo ‘o e ‘Otuá. ‘Oku hoko atu ai ‘a e ngaahi fakamatala ‘oku fakamahino‘i ‘aki ‘a e ‘uhinga ‘o e ngaahi mana ‘a Sīsuú. ‘Oku hā he konga ko ‘eni ‘o e tohí ‘a e tui ‘a e ni‘ihi kia Sīsū ‘o nau hoko ko ‘ene kau ako, kae ta‘etui e ni‘ihi ‘o nau fakafepaki kiate ia. Ko e vahe 13-17 ko e fakamatala fakaikiiki ia ki he feohi vāofi ‘a Sīsū mo ‘ene kau akó ‘i he pō na‘e puke ai iá, pea mo ‘ene ngaahi lea na‘á ne teu‘i mo fakalotolahi‘i ‘aki kinautolu ‘i he efiafi ‘o hono kalusefaí. Ko e ngaahi vahe kimui ‘o Sioné ko e fakamatala ia ki hono puke ‘o Sīsū, mo hono fakamāu‘i, mo kalusefaí, mo ‘ene toetu‘ú, mo ‘ene hāhā holo ki he‘ene kau akó ‘i he hili ‘ene toetu‘ú.
Ko e talanoa ki he fefine na‘e ma‘u atu ‘ene fe‘auaki (vahe 8.1-11), ‘oku ha‘i ia koe‘uhí he ‘oku lahi ‘a e ngaahi hiki mo e ngaahi liliu motu‘a ‘o e Kōsipelí ni ‘oku ‘ikai ke ‘asi ai, pea ‘oku fakahū he ngaahi vahe mo e veesi kehekehe ‘i he ngaahi hiki kehe.
‘Oku fakamamafa‘i ‘i he Kōsipeli ‘a Sioné ‘a e me‘a‘ofa ko e mo‘ui ta‘engatá ‘ia Kalaisi, ‘a e me‘a‘ofa ‘oku kamata ‘inasi ai he lolotongá ni pē ‘a kinautolu ‘oku nau tali ‘a Sīsuú pea ‘oku hoko mai kiate kinautolu ‘oku nau tali ‘a Sīsū ko honau hala, mo e mo‘oni, pea mo e mo‘ui. Ko e tapa ‘ilonga ‘o e Kōsipeli ‘a Sioné ko hono ngāue‘aki ai ‘a e ngaahi me‘a maheni faka‘aho ‘o e mo‘uí ke faka‘ilonga‘i ‘aki ‘a e ngaahi mo‘oni fakalaumālie, ‘o hangē ko e vai, mā, maama, mo e tauhi sipi mo ‘ene fanga sipi, pea mo e ngoue vaine mo hono fua.
Ko e Kakano ‘o e Tohí
Talateu (1.1-18)
Ko Sione Papitaiso mo e fuofua kau ako ‘a Sīsū (1.19-51)
Ko e ngāue ‘a Sīsū ki he kakaí (2.1–12.50)
Ko e ngaahi ‘aho faka‘osi ‘o e mo‘ui mo e ngāue ‘a Sīsuú ‘i Selusalema mo e ngaahi feitu‘u ofi ki ai (13.1–19.42)
Ko e toetu‘u ‘a e ‘Eikí mo ‘ene hāhā holó (20.1-31)
Ko e tātuku: ko e toe hā ‘a e ‘Eikí ‘i Kāleli (21.1-25)
Obecnie wybrane:
Sioné Ko e Talateu: TMB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tongan Moulton Bible © Bible Society of the South Pacific, 2011.